𞤏𞤫𞤤𞤮-𞤱𞤫𞤤𞤮 𞤨𞤮𞤥𞤨𞤭𞤼𞤫𞥅𞤪𞤭 𞤲𞤣𞤫𞤪 𞤃𞤢𞥄𞤤𞤭 𞤴𞤫𞤥𞤦𞤫𞤪𞤫𞤲 𞤬𞤵𞤯𞥆𞤭𞥅:𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥔 𞤫 𞤦𞤢𞤤𞥆𞤢𞤤 𞤁𞤉𞤐𞤚𞤀𞤂 𞤅𞤓𞥅𞤑𞤀𞥄𞤄𞤉 𞤂𞤓𞥅𞤈𞤀. 𞤐𞤺𞤮𞥅𞤯𞤮𞥅 𞤱𞤫𞤤𞤮-𞤱𞤫𞤤𞤮 𞤳𞤮 𞤲𞤺𞤢𞤥𞤵 𞤲𞤢𞤩𞤪𞤵𞤺𞤮𞤤 𞤣𞤫𞤥𞤢𞤤 𞤨𞤮𞤥𞤨𞤭𞤼𞤫𞥅𞤪𞤭 𞤲𞤺𞤢𞤤 𞤴𞤫𞥅𞤧𞤮 𞤫 𞤲𞤣𞤫𞤪 𞤃𞤢𞥄𞤤𞤭 𞤴𞤫𞤥𞤦𞤫𞤪𞤫𞤲⹁ 𞤧𞤢𞤦𞤵 𞤨𞤫𞤰𞥆𞤮𞤤 𞤬𞤭𞥅 𞤨𞤮𞤥𞤨𞤭𞤼𞤫𞥅𞤪𞤭 𞤲𞤮 𞤶𞤵𞥅𞤼𞤭 𞤫 𞤲𞤣𞤫𞤪 𞤯𞤢𞤤𞤭𞥅𞤪𞤫 𞤲𞤣𞤫𞤲.
𞤀𞥄𞤱𞤪𞤵 𞤢𞤪𞤢𞤲𞤵𞤪𞤵 𞤨𞤮𞤥𞤨𞤭𞤼𞤫𞥅𞤪𞤭 𞤫 𞤲𞤣𞤫𞤪 𞤃𞤢𞥄𞤤𞤭 𞤴𞤫𞤥𞤦𞤫𞤪𞤫𞤲 𞤳𞤮 𞤬𞤫𞤱𞤲𞤣𞤮 𞤲𞤶𞤢𞤺𞥆𞤵 𞤨𞤮𞤪𞤼𞤮 𞤼𞤫𞤤𞤫𞤲 𞤸𞤭𞤼𞤢𞥄𞤲𞤣𞤫 𞥑𞥙𞥒𞥐.
𞤏𞤫𞤤𞤮-𞤱𞤫𞤤𞤮 𞤲𞤺𞤮𞤲 𞤳𞤮 𞤱𞤢𞤯𞤢𞤼𞤢⹁ 𞤳𞤮 𞤸𞤭𞤼𞤢𞥄𞤲𞤣𞤫 𞤳𞤢𞤤𞤢 𞥑𞥔 𞤫 𞥑𞥕 𞤧𞤭𞥅𞤤𞤼𞤮. 𞤉 𞤸𞤭𞤲𞤮 𞤶𞤢𞤩𞥆𞤫𞥅 𞤫 𞤲𞤺𞤮𞤲 𞤱𞤫𞤤𞤮-𞤱𞤫𞤤𞤮 𞤴𞤭𞤥𞤩𞤫 𞤯𞤵𞥅𞤯𞤵𞤩𞤫 𞤰𞤫𞥅𞤱𞤢𞤴𞤩𞤫 𞤲𞤺𞤵𞥅 𞤻𞤢𞤤𞤲𞤺𞤵⹁ 𞤭𞤱𞤢𞤴𞤩𞤫 𞤲𞤮𞤳𞥆𞤫𞥅𞤤𞤭 𞤬𞤮𞤱 𞤫 𞤲𞤣𞤫𞤪 𞤤𞤫𞤧𞤣𞤭 𞤺𞤭𞤲𞤫🇬🇳 𞤫 𞤤𞤫𞤧𞤯𞤫 𞤸𞤫𞤣𞥆𞤭𞥅𞤯𞤫 𞤺𞤮𞥅 𞤸𞤢𞥄 𞤳𞤢 𞤺𞤢𞤯𞤢 𞤥𞤢𞥄𞤶𞤫.
𞤚𞤢𞤱𞤼𞤭 𞤳𞤢𞤣𞤭 𞤩𞤭𞤩𞥆𞤫 𞤥𞤢𞥄𞤤𞤭 𞤴𞤫𞤥𞤦𞤫𞤪𞤫𞤲 𞤯𞤵𞥅𞤯𞤵𞤩𞤫 𞤭𞤱𞤢𞤴 𞤳𞤢 𞤶𞤢𞤲𞤢𞤲𞤭𞤪𞤭 𞤬𞤭𞥅 𞤼𞤢𞤱𞤣𞤫𞤬𞤮𞤤 𞤫 𞤧𞤫𞤥𞤦𞤭𞤲𞤺𞤮𞤤 𞤻𞤢𞤤𞤯𞤫 𞤯𞤫𞤲.
𞤖𞤭𞤲𞤲𞤣𞤫 𞤱𞤫𞤤𞤼𞤮𞤪𞤫𞥅 𞤧𞤢𞤦𞤵 𞤧𞤮𞤻𞤭𞤼𞤵𞤺𞤮𞤤 𞤨𞤮𞤥𞤨𞤭𞤼𞤫𞥅𞤪𞤭 𞤫 𞤲𞤺𞤫𞥅𞤴𞤺𞤵 𞤥𞤵𞤲⹁ 𞤳𞤮𞤲𞤮 𞤳𞤢𞤣𞤭 𞤸𞤭𞤲𞤮 𞤸𞤮𞤤𞥆𞤭𞤪𞤫𞥅 𞤫 𞤥𞤢𞤴𞤪𞤫 𞤨𞤭𞤲𞤢𞤤 𞤫 𞤷𞤮𞤧𞤢𞥄𞤲𞤫 𞤲𞤮𞤳𞥆𞤵𞥅𞤪𞤫 𞤲𞤣𞤫𞤲.
𞤐𞤺𞤮𞥅 𞤱𞤫𞤤𞤮-𞤱𞤫𞤤𞤮 𞤨𞤮𞤥𞤨𞤭𞤼𞤫𞥅𞤪𞤭 𞤫 𞤲𞤣𞤫𞤪 𞤃𞤢𞥄𞤤𞤭 𞤴𞤫𞤥𞤦𞤫𞤪𞤫𞤲 𞤸𞤭𞤲𞤮 𞤸𞤫𞥅𞤱𞤭 𞤺𞤮𞤤𞥆𞤫 𞤧𞤫𞤪𞤼𞤵𞤯𞤫⹁ 𞤪𞤫𞤲𞤣𞤭𞤲𞤯𞤫 𞤨𞤭𞤲𞤢𞤤 𞤫 𞤷𞤮𞤧𞤢𞥄𞤲𞤫.
𞤉 𞤸𞤭𞤲𞤮 𞤯𞤮𞥅 𞤴𞤮𞤺𞤢 𞤫 𞤺𞤮𞤤𞥆𞤫 𞤱𞤢𞤯𞤫𞤼𞤫𞥅𞤯𞤫 𞤫 𞤲𞤣𞤫𞤪 𞤻𞤢𞤤𞤯𞤭 𞤯𞤭𞤲.
𞥑– 𞤙𞤢𞤲𞤼𞤢𞤺𞤮𞤤(𞤆𞤢𞤪𞤢𞤺𞤮𞤤) 𞤫 𞤤𞤫𞥅𞤰𞤢𞤺𞤮𞤤: 𞤅𞤵𞤳𞤢𞥄𞤩𞤫 𞤲𞤮𞤳𞥆𞤵𞤪𞤫(𞤏𞤮𞤪𞤩𞤫 𞤫 𞤪𞤫𞤱𞤩𞤫)𞤲𞤮𞤳𞥆𞤵𞥅𞤪𞤫 𞤲𞤣𞤫𞤲 𞤼𞤢𞤱𞤫𞤼𞤫 𞤸𞤢𞤪𞤢 𞤸𞤭𞤩𞤫 𞤩𞤮𞤪𞤲𞤭𞥅 𞤷𞤮𞤲𞤷𞤭 𞤬𞤭𞤲𞤢𞥄 𞤼𞤢𞤱𞤢𞥄(𞤏𞤢𞤲𞤮 𞤤𞤫𞤨𞥆𞤭⹁ 𞤬𞤢𞥄𞤼𞤢 𞤫 𞤨𞤵𞥅𞤼𞤮) 𞤳𞤢𞤻𞤵𞤲 𞤫 𞤥𞤮𞥅𞤪𞤯𞤭 𞤥𞤵𞤲 𞤱𞤢𞤲𞤮 𞤶𞤵𞤦𞤢𞥄𞤯𞤫 𞤫 𞤳𞤲𞤯... 𞤩𞤫 𞤱𞤢𞤲𞤺𞤮𞥅 𞤴𞤫𞥅𞤧𞤮 𞤢𞤪𞤢𞤴𞤩𞤫 𞤩𞤫𞤲⹁ 𞤳𞤢 𞤱𞤫𞤤𞤮-𞤱𞤫𞤤𞤮 𞤬𞤭𞥅 𞤸𞤮𞤤𞥆𞤭𞤪𞤺𞤮𞤤 𞤽𞤢𞤪𞤭 𞤫 𞤨𞤭𞤲𞤫 𞤥𞤢𞤩𞥆𞤫 𞤯𞤫𞤲.
𞥒– 𞤊𞤮𞥅𞤤𞤮𞤼𞤭𞤪𞤮 𞤣𞤫𞤥𞤢𞤤: 𞤈𞤫𞤥𞤮𞥅𞤩𞤫 𞤲𞤮𞤳𞥆𞤵𞥅𞤪𞤫 𞤲𞤣𞤫𞤲 𞤸𞤭𞤲𞤮 𞤱𞤫𞥅𞤩𞤭𞤼𞤢 𞤷𞤮𞤻𞤫 𞤥𞤢𞤩𞥆𞤫 𞤩𞤵𞤪𞤯𞤫 𞤳𞤫𞤤𞤯𞤵𞤣𞤫 𞤯𞤫𞤲⹁ 𞤳𞤢𞤤𞤢 𞤩𞤵𞤪𞤯𞤮 𞤶𞤮𞤺𞤢𞥄𞤣𞤫 𞤨𞤮𞤥𞤨𞤭𞤼𞤫𞥅𞤪𞤭𞥅𞤶𞤫 𞤲𞤶𞤢𞤲𞤫⹁ 𞤦𞤢𞤲𞤼𞤢𞤪𞤢 𞤲𞤶𞤢𞤲𞤫⹁ 𞤃𞤢𞤤𞥆𞤢 𞤨𞤵𞤼𞤫𞥅𞤶𞤫 𞤲𞤶𞤢𞤲𞤫 𞤸𞤭𞤲𞤮 𞤱𞤢𞤯𞤢𞤲𞤫𞥅 𞤲𞤦𞤢𞤪𞤶𞤢𞥄𞤪𞤭⹁ 𞤲𞤺𞤢𞤥𞤵 𞤩𞤵𞤪𞤼𞤵𞤺𞤮𞤤 𞤥𞤮 𞤪𞤫𞤪𞤯𞤭𞤲𞤣𞤫 𞤳𞤢 𞤣𞤫𞤥𞤢𞤤.
𞥓–𞤑𞤮𞤤𞤭𞤼𞤺𞤮𞤤: 𞤸𞤢𞤪𞤢𞤴 𞤳𞤢𞤣𞤭 𞤷𞤢𞥄𞤤𞤭𞥅𞤶𞤭 𞤲𞤮 𞤱𞤢𞤯𞤢𞥄 𞤬𞤭𞥅 𞤱𞤫𞥅𞤩𞤼𞤵𞤺𞤮𞤤 𞤫 𞤴𞤫𞥅𞤴𞤵𞤺𞤮𞤤 𞤪𞤫𞤥𞤢𞤼𞤫𞥅𞤪𞤭 𞤲𞤣𞤭𞤲⹁ 𞤫 𞤢𞤱𞤣𞤭𞥅𞤶𞤭⹁ 𞤀𞥄𞤤𞤢𞥄𞤶𞤭 𞤪𞤫𞤥𞤭𞤪𞤯𞤭⹁ 𞤫 𞤧𞤭𞤲𞤷𞤵𞤩𞤫 𞤨𞤭𞥅𞤶𞤭 𞤳𞤫𞤧𞤭 𞤱𞤢𞤤𞥆𞤭𞤼𞤮𞤪𞤯𞤭 𞤳𞤢 𞤣𞤫𞤥𞤢𞤤⹁ 𞤳𞤢𞤣𞤭 𞤸𞤭𞤲𞤮 𞤱𞤫𞥅𞤩𞤭𞤼𞤢 𞤤𞤭𞤺𞥆𞤫 𞤥𞤵𞤲⹁ 𞤫 𞤱𞤢𞥄𞤶𞤵𞥅𞤶𞤭 𞤥𞤵𞤲 𞤲𞤺𞤢𞤥 𞤱𞤢𞤤𞥆𞤭𞤼𞤢𞤺𞤮𞤤 𞤪𞤫𞤥𞤮𞥅𞤩𞤫 𞤩𞤫𞤲.
𞥔–𞤆𞤭𞤶𞤭𞤪𞤤𞤫 𞤬𞤭𞤲𞤢𞥄ـ 𞤼𞤢𞤱𞤢𞥄: 𞤘𞤭𞤥𞤭 𞤫 𞤺𞤢𞤥𞤭 𞤳𞤢𞤻𞤵𞤲 𞤥𞤢𞤺𞤮𞥅𞤶𞤭(théâtre) 𞤲𞤮 𞤱𞤢𞤯𞤫𞥅 𞤲𞤺𞤢𞤥𞤵 𞤸𞤮𞤤𞥆𞤭𞤪𞤺𞤮𞤤 𞤨𞤭𞤲𞤫 𞤯𞤢𞤤𞤭𞥅𞤪𞤫 𞤲𞤣𞤫𞤲.
𞥕–𞤃𞤫𞥅𞤯𞤵𞤺𞤮𞤤(𞤻𞤢𞥄𞤥𞤵𞤺𞤮𞤤): 𞤚𞤢𞤱𞤣𞤢𞥄𞤩𞤫 𞤩𞤫𞤲 𞤸𞤭𞤲𞤮 𞤱𞤢𞥄𞤱𞤭 𞤥𞤫𞤼𞥆𞤢𞥄𞤣𞤫 𞤴𞤮𞤺𞤢 𞤫 𞤣𞤫𞤬𞤵𞥅𞤶𞤭 𞤱𞤢𞤯𞤭𞤪𞤢𞥄𞤯𞤭 𞤨𞤮𞤥𞤨𞤭𞤼𞤫𞥅𞤪𞤭 𞤯𞤭 𞤴𞤭𞤥𞤩𞤫 𞤲𞤮𞤳𞥆𞤵𞤪𞤫 𞤲𞤣𞤫𞤲 𞤣𞤫𞤬𞤭.
𞥖–𞤎𞤢𞥄𞤲𞤢𞤤: 𞤊𞤮𞥅𞤤𞤮𞤼𞤭𞤪𞤫 𞤰𞤢𞥄𞤲𞤢𞤤 𞤲𞤮 𞤴𞤵𞤩𞥆𞤭𞤲𞤫𞥅⹁ 𞤱𞤢𞤲𞤮 𞤣𞤮𞤺𞤣𞤵⹁ 𞤫 𞤤𞤢𞤼𞤵𞤺𞤮𞤤 𞤥𞤵𞤤𞥆𞤫𞤪𞤫 𞤲𞤺𞤢𞤥𞤵 𞤱𞤫𞤤𞤼𞤭𞤲𞤺𞤮𞤤 𞤼𞤢𞤱𞤣𞤢𞥄𞤩𞤫 𞤩𞤫𞤲.
𞥗– 𞤔𞤫𞤱𞤼𞤫 𞤫 𞤲𞤦𞤢𞥄𞤶𞤵𞥅𞤶𞤭: 𞤀𞤲𞤼𞤢𞤥𞤩𞤫 𞤬𞤭𞥅 𞤣𞤫𞤥𞤢𞤤 𞤸𞤭𞤲𞤮 𞤮𞤳𞥆𞤭𞤪𞤢 𞤺𞤢𞤲𞤣𞤫 𞤥𞤵𞤲 𞤬𞤭𞥅 𞤪𞤫𞤥𞤵𞤪𞤵⹁ 𞤩𞤫 𞤱𞤢𞤯𞤢𞤲𞤢 𞤳𞤢𞤣𞤭 𞤪𞤫𞤥𞤮𞥅𞤩𞤫 𞤩𞤫𞤲 𞤫𞤤𞤼𞤮⹁ 𞤼𞤫𞤲𞤼𞤭𞤲𞤭𞥅 𞤬𞤭𞥅 𞤣𞤫𞤥𞤢𞤤 𞤨𞤮𞤥𞤨𞤭𞤼𞤫𞥅𞤪𞤭 𞤫 𞤲𞤮 𞤯𞤫 𞤥𞤢𞤪𞤭𞤪𞤼𞤫𞥅 𞤸𞤢 𞤦𞤮𞤲𞤢𞤼𞤢𞥄 𞤼𞤭𞤲𞥆𞤢.
𞤐𞤺𞤮𞥅 𞤱𞤫𞤤𞤮-𞤱𞤫𞤤𞤮 𞤳𞤮 𞤬𞤢𞤪𞤼𞤢𞤽𞥆𞤫 𞤥𞤢𞤱𞤯𞤮 𞤲𞤺𞤢𞤥𞤵 𞤴𞤭𞤴𞤼𞤵𞤺𞤮𞤤 𞤨𞤭𞤲𞤫 𞤫 𞤣𞤫𞤥𞤢𞤤 𞤫 𞤲𞤣𞤫𞤪 𞤃𞤢𞥄𞤤𞤭 𞤴𞤫𞤥𞤦𞤫𞤪𞤫𞤲.
𞤉𞤲 𞤢𞤲𞤣𞤭𞤼𞤭𞤲𞤢𞤴 𞤼𞤵𞤲 𞤃𞤢𞥄𞤤𞤭 𞤴𞤫𞤥𞤦𞤫𞤪𞤫𞤲 𞤳𞤮 𞤯𞤮𞤲 𞤨𞤮𞤥𞤨𞤭𞤼𞤫𞥅𞤪𞤭 𞤩𞤵𞤪𞤫𞤼𞤫𞤲𞤮𞥅 𞤪𞤫𞤥𞤫𞥅𞤣𞤫⹁ 𞤸𞤢𞤴 𞤬𞤭𞥅 𞤶𞤮𞥅𞤲𞤭 𞤼𞤭𞤥𞤦𞤭 𞤥𞤢𞤣𞤭𞥅𞤲𞤢 𞤩𞤵𞤪𞤼𞤭𞤳𞤫 𞤩𞤫⹁ 𞤳𞤮𞤲𞤮 𞤲𞤮 𞤶𞤫𞤴𞤢𞥄 𞤫 𞤳𞤮 𞤽𞤢𞤳𞥆𞤭𞤲𞤭 𞤣𞤫𞤥𞤢𞤤 𞤨𞤮𞤥𞤨𞤭𞤼𞤫𞥅𞤪𞤭 𞤲𞤺𞤢𞤤 𞤫 𞤲𞤣𞤫𞤪 𞤥𞤢𞥄𞤤𞤭 𞤴𞤫𞤥𞤦𞤫𞤪𞤫𞤲 𞤢𞤲𞤺𞤢𞤤 𞤤𞤢𞥄𞤱𞤮𞤤 𞤳𞤫𞤤𞤯𞤵𞤺𞤮𞤤⹁ 𞤳𞤮 𞤯𞤵𞤲 𞤱𞤢𞤯𞤭 𞤸𞤢𞥄 𞤪𞤫𞤥𞤢𞤴𞤩𞤫 𞤦𞤵𞤴 𞤼𞤫𞤪𞤼𞤭𞥅⹁ 𞤧𞤢𞤦𞤵 𞤸𞤢𞤴 𞤧𞤭 𞤩𞤫 𞤪𞤫𞤥𞤭𞥅 𞤳𞤮 𞤩𞤵𞤪𞤭 𞤳𞤮𞤲 𞤦𞤮𞤲𞤭𞤪𞤢𞤴𞤩𞤫.
𞤑𞤮𞤲𞤮 𞤲𞤮𞤲 𞤲𞤮 𞤹𞤭𞤪𞥆𞤭𞤼𞤢𞥄 𞤨𞤮𞤥𞤨𞤭𞤼𞤫𞥅𞤪𞤭 𞤳𞤮 𞤫 𞤲𞤣𞤫𞤪 𞤥𞤢𞥄𞤤𞤭 𞤴𞤫𞤥𞤦𞤫𞤪𞤫𞤲 𞤩𞤵𞤪𞤢𞤼𞤢 𞤥𞤮𞤰𞥆𞤵𞤣𞤫⹁ 𞤳𞤮 𞤼𞤮𞤲 𞤳𞤢𞤣𞤭 𞤨𞤮𞤥𞤨𞤭𞤼𞤫𞥅𞤪𞤭 𞤲𞤶𞤢𞤲𞤫 𞤩𞤵𞤪𞤢𞤼𞤢 𞤸𞤫𞤩𞤢𞥄𞤣𞤫.
𞤑𞤮𞤲𞤮 𞤲𞤮𞤲 𞤶𞤮𞥅𞤲𞤭 𞤲𞤺𞤮𞥅 𞤱𞤫𞤤𞤮-𞤱𞤫𞤤𞤮 𞤱𞤢𞤴𞤤𞤭𞤳𞤫 𞤲𞤮 𞤱𞤮𞥅𞤱𞤭𞤪𞤲𞤮𞥅 𞤲𞤮𞤲 𞤧𞤢𞤦𞤵 𞤶𞤮𞥅𞤲𞤭 𞤬𞤢𞤴𞤣𞤢 𞤳𞤮 𞤬𞤭𞤶𞤵𞤲'𞤣𞤢𞥄𞤪𞤵 𞤫 𞤨𞤵𞤴𞤲𞤣𞤢𞤲 𞤼𞤵𞤲 𞤱𞤮𞤲𞤭 𞤫 𞤥𞤵𞤲 𞤧𞤮𞥅𞤦𞤫𞥅 𞤮𞤲 𞤸𞤢𞤪𞤭 𞤸𞤭𞤲𞤮 𞤯𞤵𞤴𞤼𞤭𞥅 𞤫 𞤯𞤭𞥅 𞤣𞤵𞥅𞤩𞤭 𞤬𞤫𞤰𞥆𞤵𞤯𞤭 𞤯𞤮𞥅 .
𞤑𞤮𞤲𞤮 𞤸𞤭𞤳𞥆𞤢 𞤸𞤢𞤤𞤬𞤢𞥄𞤯𞤮 𞤶𞤢𞥄𞤺𞤮𞤪𞤢𞤤 𞤺𞤭𞤲𞤫 𞤲𞤺𞤢𞤤 𞤦𞤢𞥄 𞤱𞤵𞥅𞤪𞤭 𞤫 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤣𞤫𞤥𞤢𞤤 𞤃𞤀𞤈𞤋𞤒𞤀𞤃𞤀 𞤅𞤋𞤈𞤉𞥅 𞤅𞤋𞤂𞥆𞤀𞥄 𞤸𞤭𞤲𞤮 𞤼𞤢𞤱𞤣𞤢𞥄 𞤫 𞤱𞤫𞤤𞤮-𞤱𞤫𞤤𞤮 𞤲𞤺𞤮𞤲⹁ 𞤦𞤫𞤤𞤢 𞤶𞤮𞥅 𞤮𞤫𞤸𞤫 𞤳𞤫𞤤𞤯𞤵𞤯𞤫 𞤬𞤭𞥅 𞤣𞤫𞤥𞤢𞤤 𞤨𞤮𞤥𞤨𞤭𞤼𞤫𞥅𞤪𞤭 𞤳𞤢 𞤰𞤫𞤼𞥆𞤫𞥅 𞤬𞤭𞥅 𞤱𞤢𞤤𞥆𞤭𞤼𞤢𞤺𞤮𞤤 𞤪𞤫𞤥𞤮𞥅𞤩𞤫 𞤩𞤫𞤲⹁ 𞤸𞤢𞤪𞤢 𞤱𞤮𞤲𞤢𞥄 𞤲𞤣𞤵𞤲𞤺𞤵 𞤼𞤵𞤲 𞤩𞤫 𞤪𞤫𞤥𞤭𞤪𞤼𞤢.
✍️𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋
#ADLaM #pulaar #mo_dougoussaly
𞤐𞤮 𞤱𞤮𞤯𞤭 𞤧𞤢𞤲𞥆𞤫