𞤏𞤋𞤐𞤁𞤉𞤐 𞤔𞤀𞤐𞤘𞤉𞤐 𞤀𞤁𞤂𞤀𞤃.

𞤁𞤢𞤪𞤼𞤢𞤲𞤢𞤺𞤮𞤤 𞤯𞤫𞤲𞤺𞤢𞤤 𞤳𞤮𞤲𞤮 𞤸𞤢𞤪𞤢 𞤴𞤭𞤯𞤢𞥄 𞤱𞤭𞤲𞤣𞤵𞤺𞤮𞤤⹁ 𞤴𞤭𞤯𞤢𞥄 𞤶𞤢𞤲𞤺𞤵𞤺𞤮𞤤 𞤫 𞤲𞤺𞤢𞤤 𞤯𞤫𞤲𞤺𞤢𞤤 𞤳𞤮 𞤫𞤤𞥆𞤢 𞤲𞤶𞤢𞤲𞤢.

𞤀𞤣𞤤𞤢𞤥 𞤳𞤮 𞤸𞤵𞥅𞤲𞤣𞤫 𞤳𞤫𞤤𞤯𞤵𞤲𞤣𞤫 𞤫 𞤱𞤫𞤤𞤼𞤮𞤪𞤢𞥄𞤲𞤣𞤫 𞤳𞤢 𞤪𞤫𞤲𞤣𞤮 𞤥𞤫𞤫𞤲 𞤬𞤵𞤤𞤩𞤫. 𞤅𞤢𞤦𞤵 𞤳𞤮 𞤦𞤭𞤲𞤣𞤮𞤤 𞤲𞤺𞤮𞤤 𞤥𞤵𞤧𞤭𞤣𞤩𞤫 𞤥𞤫𞤲 𞤧𞤭𞤲𞤷𞤢𞤲𞤭 𞤫𞤲 𞤬𞤭𞥅 𞤬𞤭𞥅 𞤲𞤫𞤱𞤭𞤲𞤺𞤮𞤤 𞤱𞤭𞤲𞤣𞤵𞤺𞤮𞤤 𞤯𞤫𞤲𞤺𞤢𞤤 𞤥𞤫𞤫𞤲 𞤲𞤺𞤢𞤤 𞤨𞤵𞤤𞤢𞥄𞤪.

𞤄𞤵𞤴 𞤸𞤭𞤲𞤮 𞤱𞤢𞤳𞥆𞤭𞤤𞤭𞥅 𞤬𞤭𞥅 𞤩𞤢𞤲𞤼𞤢𞤤 𞤥𞤢𞤺𞥆𞤮𞤤 𞤧𞤢𞤦𞤵 𞤸𞤭𞤯𞤫𞤲 𞤬𞤢𞥄𞤤𞤢𞥄 𞤴𞤮 𞤯𞤫𞤲𞤺𞤢𞤤 𞤨𞤵𞤤𞤢𞥄𞤪 𞤲𞤺𞤢𞤤 𞤣𞤮𞥅𞤤𞤲𞤭𞤪 𞤱𞤢 𞤯𞤫𞤲𞤯𞤫 𞤤𞤮𞤤𞥆𞤵𞤤𞤫 𞤯𞤫𞤲 𞤲𞤭𞥅𞤲𞤭 𞤳𞤢 𞤢𞤣𞤵𞤲𞤢𞥄𞤪𞤵 𞤱𞤢𞤲𞤮: 𞤫𞤲𞤺𞤫𞤤𞤫⹁ 𞤫𞤧𞤨𞤢𞤻𞤮𞤤 𞤥𞤢𞤤𞥆𞤢 𞤬𞤢𞤪𞤢𞤲𞤧𞤭.

𞤖𞤢𞤲𞤣𞤫 𞤸𞤭𞤲𞤮 𞤱𞤮𞥅𞤣𞤭 𞤴𞤭𞤥𞤩𞤫 𞤦𞤵𞤴⹁ 𞤱𞤮𞤲𞤵𞤩𞤫 𞤶𞤢𞤲𞤺𞤵𞤣𞤫⹁ 𞤶𞤢𞤲𞥆𞤵𞤣𞤫⹁ 𞤣𞤢𞤪𞤼𞤢𞤲𞤭𞥅𞤩𞤫 𞤫 𞤷𞤫𞤲𞤯𞤫 𞤯𞤫𞤲 𞤬𞤮𞤱 𞤬𞤭𞥅 𞤲𞤮 𞤲𞤺𞤢𞤤 𞤬𞤮𞥅𞤤𞤭𞤪𞤢.
𞤇𞤫𞥅 𞤯𞤮𞥅 𞤳𞤮 𞤱𞤫𞤤𞤼𞤢𞤲𞤢𞥄𞤩𞤫 𞤬𞤮𞤼𞤢 𞤧𞤢𞤦𞤵 𞤣𞤢𞤪𞤲𞤣𞤫 𞤥𞤢𞤩𞥆𞤫 𞤲𞤣𞤫𞤲.

𞤑𞤮𞤲𞤮 𞤫𞤤𞥆𞤢 𞤶𞤢𞥄𞤤𞤭𞥅𞤯𞤮 𞤳𞤢𞤣𞤭 𞤸𞤭𞤲𞤮 𞤱𞤮𞥅𞤣𞤭 𞤥𞤢𞥄𞤨𞤭𞤲𞤯𞤮 𞤫𞤲.
𞥟𞤅𞤢𞤦𞤵 𞤲𞤮𞤲 𞤳𞤮 𞤸𞤮𞤲𞥆𞤮 𞤱𞤮𞤲𞤭𞤪𞤼𞤫𞤲 𞤣𞤢𞤪𞤼𞤢𞤲𞤭𞥅𞤩𞤫 𞤯𞤫𞤲𞤺𞤢𞤤 𞤧𞤭 𞤫𞤲 𞤴𞤭𞤯𞤢𞥄 𞤱𞤭𞤲𞤣𞤵𞤺𞤮𞤤 𞤫 𞤶𞤢𞤲𞤺𞤵𞤺𞤮𞤤 𞤳𞤮 𞤱𞤭𞤲𞤣𞤢𞥄 𞤫 𞤥𞤢𞤺𞥆𞤢𞤤؟

𞤔𞤢𞤲𞤺𞤵𞤺𞤮𞤤 𞤳𞤮 𞤻𞤢𞥄𞤥𞤭𞤲𞤺𞤮𞤤 𞤲𞤺𞤫𞥅𞤼𞤵 𞤥𞤵𞤲 𞤲𞤺𞤵𞤲.
𞤒𞤭𞤥𞤩𞤫 𞤦𞤵𞤴 𞤣𞤢𞤪𞤼𞤢𞤲𞤭𞥅𞤩𞤫 𞤫 𞤴𞤭𞤯𞤵𞤩𞤫 𞤢𞤣𞤤𞤢𞤥 𞤸𞤭𞤲𞤮 𞤴𞤭𞤯𞤭 𞤱𞤮𞤱𞤤𞤵𞤺𞤮𞤤 𞤬𞤭𞥅 𞤢𞤣𞤤𞤢𞤥 𞤫 𞤲𞤮𞤳𞥆𞤫𞥅𞤤𞤭 𞤯𞤭𞤲 𞤬𞤮𞤱⹁ 𞤱𞤢𞤯𞤢 𞤯𞤮𞤱𞤤𞤭⹁ 𞤧𞤭𞤲𞤷𞤢 𞤣𞤵𞤯𞤫...
𞤑𞤮𞤲𞤮 𞤧𞤭 𞤸𞤫𞤱𞤼𞤭𞥅 𞤶𞤢𞤲𞤺𞤵𞤺𞤮𞤤 𞤫 𞤢𞤣𞤤𞤢𞤥 𞤱𞤭𞤲𞤣𞤢𞤲𞤣𞤫 𞤶𞤵𞥅𞤼𞤵𞤲𞤣𞤫 𞤧𞤫𞥅𞤯𞤢⹁ 𞤥𞤢𞤤𞥆𞤢 𞤱𞤭𞤲𞤣𞤵𞤺𞤮𞤤 𞤱𞤭𞤲𞤣𞤢𞤲𞤣𞤫 𞤶𞤵𞥅𞤼𞤵𞤲𞤣𞤫 𞤧𞤫𞥅𞤯𞤢⹁
𞤇𞤫 𞤲𞤺𞤢𞤲𞤼𞤭𞤲𞤮𞤪𞤢𞤴 𞤯𞤵𞤲𞤯𞤮𞥅.

𞤖𞤭𞤲𞤮 𞤶𞤵𞥅𞤼𞤭 𞤬𞤮𞤼𞤢.
𞤃𞤭 𞤥𞤢𞤪𞤢𞥄 𞤸𞤢𞤨𞥆𞤵.
𞤃𞤭𞤯𞤮 𞤧𞤵𞤩𞤭𞥅 𞤶𞤫𞤲𞤼𞤢𞤺𞤮𞤤 𞤤𞤫𞤬𞤮𞤤⹁ 𞤥𞤢𞥄 𞤲𞤣𞤢𞥄𞤪𞤵𞤺𞤮𞤤 𞤯𞤮𞤱𞤤𞤵⹁
𞤅𞤭 𞤳𞤮 𞤱𞤭𞤲𞤣𞤵𞤺𞤮𞤤 𞤩𞤫 𞤧𞤵𞤩𞤮𞥅 𞤱𞤢𞤯𞤵𞤺𞤮𞤤 𞤤𞤫𞤬𞤭 𞤩𞤫 𞤧𞤢𞥄𞤳𞤭𞤼𞤢 𞤳𞤮𞤲𞤮 𞤸𞤢𞤪𞤢 𞤸𞤭𞤩𞤫 𞤢𞥄𞤥𞤭 𞤱𞤭𞤲𞤣𞤭𞤺𞤮𞤤.

𞤍𞤵𞤲 𞤯𞤮𞤲 𞤸𞤭𞤲𞤮 𞤸𞤮𞤤𞥆𞤭 𞤫𞤤𞥆𞤢 𞤲𞤶𞤢𞤲𞤢.
𞤅𞤭 𞤫𞤲 𞤶𞤢𞤲𞤺𞤢𞤼𞤢𞥄 𞤳𞤢 𞤯𞤫𞤲𞤺𞤢𞤤 𞤥𞤫𞤫𞤲 𞤫𞤲 𞤥𞤵𞥅𞤼𞤮𞤼𞤢𞥄𞤳𞤮 𞤫 𞤥𞤢𞤺𞥆𞤢𞤤.
𞤉𞤲 𞤸𞤫𞤩𞤢𞤲𞤼𞤢𞥄𞤲𞤺𞤢𞤤 𞤳𞤮 𞤩𞤵𞤪𞤭 𞤳𞤮𞤲 𞤳𞤮𞤲𞤺𞤵𞤯𞤭 𞤳𞤫𞤧𞤭⹁𞤫𞤲 𞤱𞤮𞤲𞤢𞤼𞤢𞥄 𞤳𞤢𞤣𞤭 𞤢𞤰𞥆𞤵𞤯𞤮 𞤫 𞤥𞤢𞤺𞥆𞤢𞤤⹁ 𞤱𞤮𞤲𞤭 𞤱𞤭𞤲𞤣𞤵𞤺𞤮𞤤 𞤥𞤢𞥄 𞤱𞤮𞤱𞤤𞤵𞤺𞤮𞤤 𞤸𞤢𞤪𞤢 𞤶𞤭𞤤𞥆𞤢𞥄𞤤𞤭.

𞤏𞤭𞤲𞤣𞤵𞤺𞤮𞤤 𞤳𞤮 𞤸𞤫𞤦𞤤𞤵𞤺𞤮𞤤 𞤶𞤢𞤲𞤺𞤮 𞤥𞤫𞤲 𞤮𞤲: 𞤱𞤭𞤲𞤣𞤵𞤺𞤮𞤤 𞤳𞤮 𞤯𞤵𞤲 𞤱𞤮𞤲𞤭 𞤩𞤫𞤪𞤲𞤣𞤫⹁ 𞤥𞤢𞤤𞥆𞤢 𞤱𞤭𞤴𞤫𞤲 𞤣𞤢𞤰𞥆𞤫𞤪𞤫 𞤢𞤣𞤤𞤢𞤥 𞤲𞤣𞤫𞤲⹁ 𞤧𞤢𞤦𞤵 𞤳𞤮 𞤦𞤭𞤲𞤣𞤢𞤲𞤯𞤫 𞤯𞤫𞤲 𞤱𞤵𞥅𞤪𞤲𞤢𞤼𞤢 𞤦𞤭𞤲𞤣𞤮𞤤.
𞤏𞤮𞤲𞤢𞥄 𞤼𞤵𞤲 𞤽𞤢𞤪𞤲𞤵𞤺𞤮𞤤 𞤣𞤮𞤤𞤮𞤳𞤮𞤴⹁ 𞤥𞤢𞥄 𞤱𞤭𞤲𞤣𞤵𞤺𞤮𞤤 𞤼𞤵𞤲 𞤫 𞤭𞤲𞤣𞤫.
𞤖𞤭𞤲'𞤺𞤮𞤤 𞤸𞤢𞥄𞤲𞤭 𞤶𞤮𞤺𞤢𞥄𞤣𞤫 𞤣𞤫𞤬𞤼𞤫 𞤲𞤮𞥅𞤲𞤫𞥅𞤶𞤭 𞤯𞤭𞤲 𞤬𞤮𞤱⹁ 𞤸𞤢𞤪𞤢 𞤳𞤢𞤣𞤭 𞤳𞤮 𞤸𞤫𞤩𞤮𞤼𞤮𞥅𞤯𞤫⹁ 𞤳𞤮 𞤲𞤮𞤲 𞤳𞤢𞤣𞤭: 𞤸𞤫𞤧𞤤𞤫⹁ 𞤨𞤫𞤰𞥆𞤭⹁ 𞤼𞤢𞥄𞤤𞤭⹁ 𞤣𞤫𞤬𞤼𞤫 𞤬𞤭𞥅 𞤨𞤢𞤴𞤳𞤮𞤴 𞤸𞤭𞤲𞤮 𞤸𞤢𞥄𞤲𞤭 𞤸𞤫𞤩𞤢𞥄𞤣𞤫 𞤳𞤮 𞤴𞤮𞤲𞤢𞤼𞤢.

𞤅𞤭 𞤼𞤢𞤱𞤭𞥅 𞤶𞤮𞤳𞥆𞤵𞤩𞤫 𞤢𞤣𞤤𞤢𞤥 𞤩𞤫𞤲 𞤱𞤢𞤯𞤢𞥄𞤤𞤭 𞤯𞤵𞤲⹁ 𞤸𞤢𞤪𞤢 𞤳𞤮 𞤸𞤮𞤥𞤦𞤮 𞤩𞤫 𞤧𞤢𞤦𞥆𞤮𞤪𞤭𞥅⹁ 𞤳𞤮 𞤱𞤢𞤯𞤢 𞤯𞤵𞤲؟
𞤅𞤭 𞤼𞤢𞤱𞤭𞥅 𞤻𞤢𞤤𞤲𞤣𞤫 𞤱𞤮𞥅 𞤳𞤮 𞤬𞤭𞤤𞥆𞤢𞤺𞤮𞤤 𞤸𞤵𞥅𞤲𞤣𞤫 𞤱𞤮𞥅𞤼𞤫𞤪𞤫 𞤸𞤢𞤪𞤢𞤴 𞤳𞤮 𞤸𞤮𞤲𞤣𞤫 𞤼𞤵𞤥𞤢 𞤥𞤵𞥅𞤼𞤮𞤼𞤮𞤯𞤫𞤲 𞤳𞤢 𞤬𞤮𞤳𞥆𞤭𞤼𞤢𞤲𞤣𞤫 𞤥𞤫𞤫𞤲 ؟
𞤅𞤭 𞤼𞤢𞤱𞤭𞥅 𞤫𞤲 𞤥𞤭𞥅𞤶𞤭𞤼𞤢𞥄𞤳𞤭 𞤯𞤢𞤩𞥆𞤫𞤲 𞤲𞤮 𞤧𞤭𞤲𞤷𞤭𞤪𞤫𞤲 𞤨𞤭𞥅𞤶𞤭 𞤳𞤫𞤧𞤭 𞤥𞤭 𞤭𞤲𞥆𞤢𞥄𞤤𞤭 𞤫𞤲 𞤥𞤵𞥅𞤼𞤮𞤼𞤢𞥄𞤳𞤮⹁ 𞤳𞤮𞤲𞤮 𞤸𞤢𞤪𞤢𞤴 𞤸𞤭𞤯𞤫𞤲 𞤻𞤫𞥅𞤺𞤭 𞤬𞤮𞤼𞤢.

𞤔𞤮𞤳𞥆𞤵𞤯𞤮 𞤢𞤣𞤤𞤢𞤥 𞤸𞤢𞥄𞤲𞤢𞥄 𞤣𞤮𞤺𞤵𞤣𞤫 𞤱𞤢𞤳𞥆𞤭𞤤𞤢𞤲𞤢𞤺𞤮𞤤 𞤬𞤭𞥅 𞤢𞤣𞤤𞤢𞤥⹁ 𞤶𞤮𞤳𞥆𞤵𞤺𞤮𞤤 𞤢𞤣𞤤𞤢𞤥 𞤱𞤮𞤲𞤢𞥄 𞤯𞤢𞤩𞥆𞤵𞤺𞤮𞤤 𞤴𞤭𞤯𞤫𞥅𞤣𞤫 𞤥𞤢𞤤𞥆𞤢 𞤳𞤫𞤤𞥆𞤢𞤲𞤫𞥅𞤣𞤫 𞤫 𞤱𞤢𞤷𞤫𞥅𞤣𞤫.
𞤑𞤮 𞤱𞤢𞤳𞥆𞤭𞤤𞤢𞤲𞤢𞤺𞤮𞤤 𞤪𞤫𞤲𞤣𞤮 𞤥𞤢𞤳𞥆𞤮 𞤲𞤺𞤮𞤲⹁ 𞤱𞤮𞤲𞤣𞤵𞤣𞤫 𞤫 𞤥𞤵𞤻𞤢𞤤 𞤧𞤮𞥅𞤦𞤫𞥅𞤱𞤢𞤤.

𞤔𞤢𞤲𞤺𞤵𞤺𞤮𞤤 𞤧𞤭 𞤱𞤭𞤲𞤣𞤢𞥄𞤥𞤢⹁ 𞤫 𞤫𞤼𞤢𞤺𞤮𞤤 𞤱𞤭𞤲𞤣𞤢 𞤦𞤭𞤲𞤣𞤢𞤲𞤯𞤫 𞤬𞤭𞤲𞤣𞤭𞤲𞤢𞤴𞤯𞤫 𞤪𞤫𞤲𞤣𞤮⹁ 𞤳𞤢𞤻𞤵𞤲 𞤫 𞤣𞤫𞤬𞤼𞤫 𞤳𞤢 𞤦𞤭𞤲𞤣𞤮𞤤 𞤢𞤣𞤤𞤢𞤥 𞤯𞤵𞤲 𞤳𞤮 𞤳𞤮 𞤱𞤢𞤯𞥆𞤭𞥅 𞤫𞤲.
𞤸𞤢𞥄𞤲𞤢𞥄 𞤱𞤮𞤲𞤣𞤫 𞤳𞤮 𞤧𞤭 𞤫𞤲 𞤴𞤭𞤯𞤭𞥅 𞤧𞤭 𞤱𞤢𞤯𞤫𞤲.
𞤀 𞤱𞤢𞥄𞤱𞤢𞤼𞤢𞥄 𞤱𞤭𞤴𞤵𞤣𞤫 𞤸𞤭𞤯𞤢 𞤴𞤭𞤯𞤭 𞤢𞤣𞤤𞤢𞤥: 𞤸𞤢𞤪𞤢 𞤢 𞤧𞤮𞥅𞤣𞤢𞤼𞤢𞥄 𞤣𞤫𞤬𞤼𞤫 𞤱𞤭𞤲𞤣𞤢𞥄𞤯𞤫 𞤯𞤫𞤲 𞤶𞤢𞤲𞤺𞤢𞥄⹁ 𞤥𞤢𞤤𞥆𞤢 𞤱𞤭𞤲𞤣𞤢𞥄 𞤳𞤮 𞤴𞤭𞤥𞤩𞤫 𞤩𞤫𞤲 𞤶𞤢𞤲𞤺𞤢 𞤲𞤢𞤬𞤭𞤼𞤮𞤪𞤢.
𞤖𞤢𞤪𞤢𞤴 𞤳𞤮 𞤯𞤵𞤲 𞤱𞤭𞤴𞤫𞤼𞤫𞥅 𞤺𞤭𞤯𞤺𞤮𞤤 𞤳𞤮𞤥𞤮.

𞥟𞤑𞤮 𞤸𞤮𞤲𞤯𞤵𞤲 𞤸𞤢𞥄𞤲𞤵𞤯𞤫𞤲 𞤫𞤢𞤯𞤣𞤫؟
𞥑)- 𞤒𞤮𞤲𞤼𞤫𞤪𞤫 𞤳𞤢𞤤𞤢 𞤫𞤼𞤮𞥅 𞤸𞤫𞤩𞤢 𞤸𞤢𞤴 𞤧𞤭 𞤳𞤮 𞤱𞤭𞤲𞤣𞤢𞤲𞤯𞤫 𞤯𞤭𞤯𞤭 𞤱𞤫𞤲𞤺𞤢𞥄𞤯𞤫 𞤳𞤢 𞤲𞤶𞤵𞤩𞥆𞤵𞤤𞤭 𞤶𞤮𞤳𞥆𞤮𞤲𞤣𞤭𞤪𞤫 𞤸𞤢𞤪𞤢 𞤳𞤮 𞤱𞤭𞤲𞤣𞤢𞤲𞤣𞤫 𞤴𞤫𞤯𞥆𞤵𞤲'𞤣𞤫⹁(𞤚𞤢𞥄𞤤𞤮𞤤⹁ 𞤺𞤭𞤥𞤯𞤮𞤤⹁ 𞤬𞤭𞤲𞤣𞤭𞤲𞤢𞤲𞤣𞤫⹁ 𞤫𞤳𞤲𞤯...)

𞥒)- 𞤶𞤢𞤲𞤺𞤵𞤺𞤮𞤤 𞤳𞤮 𞤱𞤮𞤲𞤢𞥄 𞤫 𞤱𞤭𞤲𞤣𞤫𞥅𞤣𞤫 𞤳𞤮𞤲⹁ 𞤧𞤢𞥄𞤳𞤭𞤼𞤢⹁ 𞤴𞤭𞤯𞤢⹁ 𞤥𞤢𞤲𞤼𞤢 𞤯𞤵𞤲 𞤩𞤫𞤴𞤣𞤢𞤴 𞤱𞤢𞤳𞥆𞤭𞤤𞤭𞤲𞤣𞤫 𞤱𞤮𞤲𞤵𞤩𞤫 𞤱𞤭𞤲𞤣𞤵𞤣𞤫 𞤩𞤫𞤲⹁ 𞤧𞤭 𞤽𞤢𞤳𞥆𞤫 𞤸𞤭𞤲𞤮 𞤫 𞤱𞤭𞤲𞤣𞤢𞤲𞤯𞤫 𞤯𞤫𞤲⹁ 𞤫𞤼𞤮𞥅 𞤬𞤢𞤤𞤶𞤭𞤪𞤢𞤩𞤫 𞤻𞤫𞥅𞤻𞤢𞤤 𞤸𞤢𞤪𞤢 𞤱𞤮𞤲𞤢𞥄 𞤶𞤢𞤤𞤳𞤭𞤼𞤵𞤺𞤮𞤤.

𞥓)-𞤅𞤭𞤲𞤷𞤵𞤺𞤮𞤤 𞤥𞤮𞤶𞤮𞤦𞤫 𞤶𞤢𞤲𞤺𞤮𞥅𞤩𞤫⹁𞤫 𞤱𞤭𞤲𞤣𞤮𞥅𞤩𞤫 𞤸𞤢𞤳𞥆𞤵'𞤲𞤣𞤫 𞤶𞤮𞤳𞥆𞤵𞤩𞤫 𞤢𞤣𞤤𞤢𞤥 𞤩𞤫𞤲⹁ 𞤧𞤢𞥄𞤼𞤭𞤲𞤣𞤭𞤪𞤢 𞤲𞤫𞤲 𞤳𞤮 𞤱𞤭𞤲𞤣𞤫𞤼𞤫𞤲 𞤳𞤮𞤲⹁ 𞤱𞤢𞤤𞥆𞤭𞤲𞤣𞤭𞤪𞤫𞤲 𞤫 𞤸𞤮𞥅𞤪𞤫 𞤼𞤫𞤣𞥆𞤮𞤲𞤣𞤭𞤪𞤮 𞤸𞤢𞤪𞤢 𞤱𞤮𞤲𞤢𞥄 𞤶𞤢𞤤𞤳𞤭𞤲𞤣𞤭𞤪𞤺𞤮𞤤.


𞤀𞤲𞤣𞤭𞤼𞤫𞤲 𞤩𞤢𞥄𞤱𞤮 𞤱𞤭𞤲𞤣𞤢𞤲𞤯𞤫 𞤴𞤫𞤯𞥆𞤵𞤯𞤫 𞤢𞤣𞤤𞤢𞤥 𞤱𞤢𞥄𞤱𞤢𞤼𞤢𞥄 𞤲𞤢𞥄𞤼𞤵𞤣𞤫 𞤳𞤢 𞤲𞤺𞤫𞥅𞤼𞤵 𞤫𞤧𞤼𞤵𞤲'𞤺𞤵(INTELLIGENCE ARTIFICIELLE L'IA) 𞤯𞤫𞤲𞤯𞤫 𞤱𞤮𞤲𞤵𞤯𞤫 𞤳𞤢 𞤲𞤺𞤫𞥅𞤼𞤵 𞤫𞤧𞤼𞤵𞤲'𞤺𞤵 𞤬𞤮𞤱 𞤸𞤢𞤪𞤢𞤴 𞤳𞤮 𞤸𞤢𞤶𞤢𞤥𞤫 𞤱𞤭𞤲𞤣𞤢𞤲𞤯𞤫 𞤱𞤮𞤲𞤭 𞤳𞤮 𞤫𞤤𞤼𞤭𞤪𞤢𞥄⹁ 𞤱𞤮𞤱𞤤𞤵𞤺𞤮𞤤⹁ 𞤥𞤢𞤤𞥆𞤢 𞤬𞤭𞤪𞤼𞤵𞤺𞤮𞤤⹁ 𞤩𞤢𞥄𞤱𞤮 𞤱𞤭𞤲𞤣𞤢𞤲𞤯𞤫 𞤴𞤫𞤯𞥆𞤵𞤯𞤫 𞤯𞤵𞤲 𞤲𞤫𞤱𞤮𞤼𞤢𞥄𞤳𞤮⹁ 𞤸𞤭𞤯𞤫𞤲 𞤢𞤲𞤣𞤭 𞤤𞤫 𞤱𞤮𞥅𞤼𞤵𞤪𞤵 𞤱𞤢𞥄𞤱𞤢𞤼𞤢𞥄 𞤢𞤧𞤢𞤲𞤣𞤫 𞤧𞤫𞤲𞤼𞤫𞤪𞤫⹁ 𞤫𞤲𞤫𞤲 𞤳𞤢𞤣𞤭 𞤫𞤼𞤮𞤯𞤫𞤲 𞤢𞤧𞤭𞤪𞤫𞤲 𞤳𞤢 𞤸𞤭𞤳𞥆𞤮𞤪𞤯𞤫𞤲 𞤯𞤮𞤲 𞤸𞤢𞤴 𞤧𞤭 𞤳𞤮 𞤴𞤮 𞤫𞤲 𞤥𞤢𞥄𞤱𞤵.
𞤭𞤱𞤼𞤭𞤪𞤩𞤫 𞤩𞤢𞥄𞤱𞤮 𞤩𞤫𞤲 𞤪𞤫𞤥𞤭𞤼𞤮𞤼𞤮 𞤸𞤢𞥄 𞤯𞤭𞤺𞥆𞤢⹁ 𞤯𞤵𞤲 𞤸𞤭𞤲𞤮 𞤩𞤵𞤪𞤭 𞤧𞤭 𞤩𞤫 𞤼𞤢𞤱𞤭𞥅 𞤤𞤮𞤱𞤪𞤫 𞤲𞤣𞤫 𞤬𞤵𞤯𞥆𞤢𞥄𞤳𞤢.

𞤅𞤭 𞤸𞤭𞤯𞤫𞤲 𞤬𞤢𞥄𞤤𞤢𞥄 𞤴𞤮 𞤢𞤣𞤤𞤢𞤥 𞤲𞤢𞥄𞤣𞤫 𞤳𞤢 𞤢𞥄𞤤𞤢𞥄𞤶𞤭 𞤳𞤫𞤧𞤭 𞤫𞤲⹁ 𞤬𞤭𞤪𞤼𞤵𞤺𞤮𞤤 𞤫𞤲 𞤱𞤢𞤳𞥆𞤭𞤤𞤮𞤼𞤮 𞤱𞤭𞤲𞤣𞤵𞤺𞤮𞤤⹁ 𞤱𞤭𞤲𞤣𞤵𞤺𞤮𞤤⹁ 𞤫 𞤱𞤭𞤲𞤣𞤵𞤺𞤮𞤤 𞤳𞤢𞤣𞤭⹁ 𞤧𞤢𞤦𞤵 𞤳𞤮 𞤱𞤭𞤲𞤣𞤢𞤲𞤯𞤫 𞤯𞤫𞤲 𞤢𞥄𞤤𞤢𞥄𞤶𞤭 𞤯𞤭𞤲 𞤫𞤤𞤼𞤭𞤪𞤼𞤫𞥅.

𞤍𞤵𞤲 𞤲𞤮𞤲 𞤸𞤢𞤴 𞤧𞤭 𞤳𞤮 𞤫𞤺𞥆𞤭𞤲𞤺𞤮𞤤 𞤳𞤮 𞤱𞤭𞤲𞤣𞤭𞥅 𞤫 𞤯𞤫𞤲𞤯𞤫 𞤺𞤮𞥅 𞤢𞤪𞤼𞤭𞤪𞤢 𞤳𞤢 𞤢𞤣𞤤𞤢𞤥.
𞤅𞤭 𞤫𞤲 𞤱𞤭𞤲𞤣𞤢𞥄𞤤𞤭 𞤼𞤵𞤲 𞤳𞤮 𞤸𞤢𞥄𞤲𞤢𞥄 𞤱𞤭𞤲𞤣𞤫𞥅𞤣𞤫 𞤳𞤮𞤲 𞤢𞤣𞤤𞤢𞤥 𞤯𞤢𞤱𞤫𞤼𞤫 𞤲𞤢𞥄𞤼𞤵𞤺𞤮𞤤 𞤳𞤢 𞤢𞤤𞤢𞥄𞤶𞤭 𞤳𞤫𞤧𞤭 𞤼𞤫𞤲𞤼𞤭𞤲𞤭𞥅 𞤳𞤢 𞤲𞤺𞤫𞥅𞤼𞤵 𞤫𞤧𞤼𞤵𞤲'𞤺𞤵.

𞤑𞤢 𞤤𞤢𞤲𞥆𞤮𞥅𞤣𞤫: 𞤒𞤭𞤯𞤵𞤺𞤮𞤤 𞤢𞤣𞤤𞤢𞤥 𞤳𞤮 𞤱𞤭𞤲𞤣𞤵𞤺𞤮𞤤 𞤫 𞤶𞤢𞤲𞤺𞤵𞤺𞤮𞤤.
𞤭𞤲𞥆𞤵𞤺𞤮𞤤 𞤸𞤭𞤲𞤮 𞤴𞤭𞤯𞤭 𞤢𞤣𞤤𞤢𞤥 𞤳𞤮𞤲𞤮 𞤱𞤭𞤲𞤣𞤢𞤼𞤢𞥄 𞤶𞤢𞤲𞤺𞤢𞤼𞤢𞥄⹁ 𞤯𞤵𞤲 𞤸𞤭𞤲𞤮 𞤱𞤢𞤴𞤭 𞤱𞤢 𞤪𞤫𞤥𞤮𞥅𞤱𞤮 𞤥𞤮 𞤥𞤫𞥅𞤥𞤢𞤼𞤢𞥄 𞤳𞤫𞤪𞤭.

𞤑𞤮 𞤢𞤲 𞤴𞤮 𞤶𞤮𞤳𞥆𞤵𞤯𞤮 𞤢𞤣𞤤𞤢𞤥 𞤱𞤭𞤲𞤣𞤭𞤪 𞤢𞤣𞤤𞤢𞤥 𞤻𞤢𞤤𞤲𞤣𞤫 𞤱𞤮𞥅⹁ 𞤪𞤫𞤪𞤯𞤭𞤲 𞤬𞤵𞤯𞥆𞤮𞤼𞤮𞥅𞤩𞤫 𞤩𞤫𞤲 𞤶𞤢𞤲𞤺𞤵𞤺𞤮𞤤 𞤢𞤣𞤤𞤢𞤥⹁ 𞤫𞤼𞤮𞤯𞤫𞤲 𞤸𞤫𞤦𞤤𞤫𞤲 𞤢𞤣𞤤𞤢𞤥 𞤬𞤭𞥅 𞤲𞤮 𞤯𞤭 𞤲𞤢𞥄𞤣𞤭𞤪𞤫𞥅 𞤳𞤢 𞤲𞤺𞤫𞥅𞤼𞤵 𞤫𞤧𞤼𞤵𞤲'𞤺𞤵 𞤯𞤵𞤲 𞤳𞤮 𞤩𞤵𞤪𞤢𞤤 𞤥𞤢𞤱𞤲𞤵𞤲'𞤺𞤢𞤤 𞤱𞤮𞤲𞤢𞤲𞤣𞤫 𞤫𞤲.

𞤃𞤭 𞤸𞤮𞤥𞤦𞤭𞤪𞤢 𞤼𞤮𞤪𞤢𞤺𞤮𞤤 𞤩𞤫𞥅 𞤷𞤫𞤪𞤲𞤮𞥅𞤩𞤫 𞤩𞤫 𞤸𞤮𞥅𞤤𞤮𞤪𞤯𞤫𞤲 𞤳𞤢 𞤢𞤣𞤤𞤢𞤥 𞤼𞤫𞤲𞤼𞤭𞤲𞤭𞥅 𞤥𞤵𞥅𞤼𞤭𞥅𞤩𞤫 𞤫 𞤺𞤢𞤲𞤣𞤫 𞤺𞤮𞥅⹁ 𞤱𞤮𞤼𞤢 𞤼𞤢𞤱𞤵 𞤳𞤢𞤥𞤩𞤫 𞤩𞤫 𞤱𞤭𞤲𞤣𞤭𞥅 𞤫 𞤢𞤣𞤤𞤢𞤥 𞤱𞤮𞥅 𞤳𞤮 𞤧𞤭 𞤼𞤢𞤱𞤭𞥅 𞤳𞤮 𞤩𞤫 𞤬𞤢𞥄𞤤𞤢𞥄 𞤱𞤭𞤲𞤣𞤵𞤣𞤫 𞤳𞤮𞤲 𞤩𞤫 𞤴𞤭𞤯𞤢𞥄 𞤴𞤮 𞤯𞤵𞥅𞤯𞤵𞤩𞤫 𞤸𞤵𞤥𞤨𞤭𞤼𞤮⹁ 𞤯𞤮𞤲 𞤸𞤢𞤪𞤢𞤴 𞤩𞤫 𞤤𞤭𞤩𞤢𞤴 𞤱𞤮𞤲𞤭 𞤳𞤮 𞤩𞤫 𞤱𞤮𞤲𞤭 𞤥𞤢𞤸𞤵𞤣𞤫 𞤳𞤮𞤲.

𞤖𞤢𞤴 𞤧𞤭 𞤩𞤫 𞤱𞤭𞤲𞤣𞤢𞤴 𞤳𞤢 𞤯𞤫𞤲𞤯𞤫 𞤶𞤢𞤲𞤢𞤲𞤫 𞤴𞤮 𞤼𞤢𞤱𞤵 𞤳𞤮 𞤳𞤢 𞤱𞤭𞤲𞤣𞤢𞥄 𞤫 𞤢𞤣𞤤𞤢𞤥 𞤳𞤮𞤲 𞤩𞤵𞤪𞤢𞤼𞤢 𞤯𞤵𞥅𞤯𞤵𞤣𞤫⹁ 𞤴𞤮 𞤩𞤫 𞤫𞤼𞤮 𞤩𞤫 𞤱𞤭𞤲𞤣𞤢 𞤫 𞤢𞤣𞤤𞤢𞤥 𞤳𞤢𞤣𞤭 𞤱𞤭𞤲𞤣𞤢𞤲𞤯𞤫 𞤸𞤭𞤼𞥆𞤵𞤯𞤫 𞤶𞤵𞥅𞤼𞤵𞤯𞤫⹁ 𞤩𞤫 𞤢𞤲𞤣𞤭𞤼𞤢 𞤶𞤮𞤳𞥆𞤵𞤩𞤫 𞤢𞤣𞤤𞤢𞤥 𞤦𞤵𞤴 𞤥𞤵𞥅𞤼𞤢𞥄𞤳𞤭 𞤳𞤢 𞤯𞤫𞤲𞤯𞤫 𞤶𞤢𞤲𞤢𞤲𞤫 𞤳𞤮 𞤳𞤢𞤥𞤩𞤫 𞤶𞤢𞤲𞤺𞤵𞤩𞤫 𞤩𞤫𞤲 𞤩𞤫𞤲 𞤯𞤮𞤲 𞤸𞤮𞥅𞤤𞤮𞤪𞤭 𞤳𞤮 𞤬𞤭𞤲𞤣𞤮𞤲𞤢𞤩𞤫.

𞤖𞤭𞤲𞤮 𞤱𞤢𞥄𞤱𞤭 𞤱𞤮𞤲𞤣𞤫 𞤸𞤢𞤪𞤢 𞤸𞤭𞤩𞤫 𞤸𞤫𞤦𞤤𞤵𞤣𞤫 𞤣𞤫𞤬𞤼𞤫 𞤦𞤵𞤴 𞤴𞤢𞤤𞤼𞤮𞤴𞤮𞥅𞤶𞤫 𞤫 𞤢𞤣𞤤𞤢𞤥⹁ 𞤳𞤮𞤲𞤮 𞤲𞤣𞤫 𞤼𞤢𞤱𞤣𞤫 𞤳𞤢 𞤲𞤶𞤵𞤩𞥆𞤵𞤤𞤭 𞤶𞤮𞤳𞥆𞤮𞤲𞤣𞤭𞤪𞤫 𞤯𞤮𞥅 𞤣𞤮𞥅𞤤𞤫 𞤸𞤭𞤲𞤮 𞤱𞤮𞥅𞤣𞤭 𞤴𞤮 𞤩𞤫 𞤱𞤫𞥅𞤩𞤵𞤼𞤵 𞤯𞤮𞥅 𞤳𞤢𞤣𞤭 𞤱𞤭𞤲𞤣𞤢𞤯𞤫 𞤥𞤢𞤩𞥆𞤫 𞤺𞤮𞥅 𞤫 𞤢𞤣𞤤𞤢𞤥.

𞤌𞤲 𞤶𞤢𞥄𞤪𞤢𞥄𞤥𞤢.

✍️ 𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋.