𞤐𞤦𞤫𞤤𞤫 𞤧𞤭𞤲𞤷𞤵𞤺𞤮𞤤 𞤦𞤭𞤲𞤣𞤮𞤤 𞤸𞤭𞤲𞤮 𞤧𞤢𞤯𞤼𞤭؟
𞤉 𞤲𞤣𞤫𞤪 𞤢𞤴𞤦𞤭𞤲𞤮𞥅𞤩𞤫 𞤢𞤣𞤤𞤢𞤥 𞤩𞤫𞤲⹁ 𞤸𞤭𞤲𞤮 𞤸𞤫𞥅𞤱𞤭 𞤳𞤮 𞤸𞤢𞤱𞤪𞤢𞤼𞤢𞥄 𞤫 𞤴𞤭𞤥𞤩𞤫 𞤱𞤭𞤴𞤢𞤴𞤩𞤫 𞤧𞤭𞤲𞤷𞤵𞤺𞤮𞤤 𞤦𞤭𞤲𞤣𞤮𞤤 𞤱𞤮𞤲𞤢𞥄 𞤳𞤮 𞤧𞤢𞤯𞤼𞤭⹁ 𞤯𞤵𞤲 𞤸𞤢𞤼𞤮𞤲𞤶𞤭𞤲𞤢𞥄 𞤫 𞤺𞤢𞤲𞤣𞤢𞤤⹁ 𞤩𞤫 𞤩𞤫𞤴𞤣𞤭𞤼𞤢 𞤥𞤮 𞤳𞤢𞤤𞤢 𞤸𞤭𞤲𞤮 𞤱𞤢𞤱𞤭𞥅 𞤧𞤭𞤲𞤷𞤵𞤺𞤮𞤤 𞤦𞤭𞤲𞤣𞤭⹁ 𞤧𞤭𞥅𞤬𞤵𞤲 𞤳𞤢𞤤𞤢 𞤭𞤲𞥆𞤭𞤪𞤢𞤳𞤵𞤲 𞤲𞤮 𞤬𞤢𞥄𞤤𞤭𞤪𞤢𞥄 𞤱𞤮𞥅.
𞤇𞤫 𞤱𞤭𞤴𞤢 𞤳𞤢𞤣𞤭 𞤶𞤮𞤳𞥆𞤵𞤺𞤮𞤤 𞤷𞤭𞤲𞤷𞤢𞥄𞤯𞤭 𞤯𞤭𞤲 𞤩𞤵𞤪𞤭 𞤥𞤮𞤰𞥆𞤵𞤣𞤫⹁ 𞤱𞤢𞤲𞤮 𞤤𞤢𞤼𞤫𞤲𞤶𞤭 𞤯𞤭𞤲⹁ 𞤫 𞤢𞥄𞤪𞤢𞤦𞤵𞥅𞤶𞤭 𞤯𞤭𞤲⹁ 𞤧𞤢𞤦𞤵 𞤧𞤭 𞤫𞤲 𞤶𞤮𞤳𞥆𞤭𞥅 𞤦𞤭𞤲𞤣𞤮𞤤 𞤲𞤺𞤮𞤤 𞤥𞤵𞤧𞤭𞤣𞤩𞤫 𞤥𞤫𞤲 𞤧𞤭𞤲𞤷𞤭⹁ 𞤸𞤭𞤲𞤮 𞤱𞤢𞥄𞤱𞤭 𞤱𞤮𞤲𞤮𞤴𞤣𞤫 𞤳𞤢𞤣𞤭 𞤳𞤢 𞤺𞤮𞤯𞥆𞤮 𞤢𞤪𞤮𞤴𞤼𞤢 𞤧𞤭𞤲𞤷𞤢 𞤺𞤮𞤯𞥆𞤭 𞤺𞤮𞥅 𞤭𞤲𞥆𞤢 𞤴𞤮 𞤴𞤭𞤥𞤩𞤫 𞤩𞤫𞤲 𞤶𞤮𞤳𞥆𞤵 𞤯𞤭𞤲 𞤯𞤮𞤲.
𞤇𞤫𞥅 𞤸𞤢𞥄𞤤𞤮𞥅𞤩𞤫 𞤯𞤭𞥅 𞤥𞤭𞥅𞤶𞤮𞥅𞤶𞤭 𞤯𞤮𞥅 𞤸𞤭𞤲𞤮 𞤸𞤢𞥄𞤲𞤣𞤭 𞤫 𞤶𞤢𞥄𞤦𞤢𞤱𞤮𞤤⹁ 𞤥𞤢𞤤𞥆𞤢 𞤬𞤢𞤸𞤥𞤭𞤲𞤫𞥅𞤣𞤫 𞤳𞤮 𞤩𞤫 𞤸𞤵𞤥𞤨𞤭𞤼𞤢𞥄𞤳𞤭.
𞤅𞤭𞤲𞤷𞤵𞤺𞤮𞤤 𞤦𞤭𞤲𞤣𞤮𞤤 𞤱𞤮𞤲𞤢𞥄 𞤸𞤵𞥅𞤲𞤣𞤫 𞤱𞤫𞥅𞤩𞤵𞤲𞤣𞤫⹁ 𞤯𞤵𞤲 𞤸𞤭𞤲𞤮 𞤤𞤢𞤲𞤣𞤭𞥅 𞤧𞤮𞤬𞤼𞤫𞥅𞤲𞤣𞤫⹁ 𞤻𞤫𞥅𞤻𞤢𞤤⹁ 𞤪𞤫𞤪𞤯𞤢𞤲𞤺𞤮𞤤⹁ 𞤺𞤢𞤲𞤣𞤢𞤤⹁ 𞤳𞤢𞤻𞤵𞤲 𞤫 𞤱𞤢𞤳𞥆𞤭𞤤𞤢𞥄𞤪𞤫 𞤼𞤭𞤥𞥆𞤵𞤲𞤣𞤫⹁ 𞤧𞤢𞤦𞤵 𞤱𞤮𞤲𞤢𞥄 𞤷𞤭𞤲𞤷𞤵𞤺𞤮𞤤 𞤼𞤵𞤲 𞤷𞤭𞥅𞤬𞤭⹁ 𞤳𞤮 𞤢𞤲𞤣𞤵𞤺𞤮𞤤 𞤳𞤮 𞤸𞤮𞤲𞥆𞤮 𞤯𞤭 𞤴𞤵𞤩𞥆𞤭𞤲𞤭𞤪𞤼𞤫𞥅⹁ 𞤸𞤢𞤪𞤢 𞤸𞤭𞤲𞤮 𞤴𞤢𞤸𞤣𞤭⹁ 𞤫 𞤸𞤭𞤲𞤮 𞤬𞤫𞤨𞥆𞤮𞤲𞤣𞤭𞤪𞤭 𞤫 𞤯𞤫𞤲𞤺𞤢𞤤 𞤲𞤺𞤢𞤤⹁ 𞤸𞤢𞤪𞤢 𞤳𞤢𞤣𞤭 𞤯𞤭 𞤤𞤵𞥅𞤼𞤲𞤣𞤢𞥄𞤳𞤭 𞤬𞤭𞤲𞤢𞥄-𞤼𞤢𞤱𞤢𞥄 𞤪𞤫𞤲𞤣𞤮 𞤺𞤮𞤤𞥆𞤭𞤼𞤭𞤪𞤢𞤴𞤲𞤺𞤮 𞤦𞤭𞤲𞤣𞤮𞤤 𞤲𞤺𞤮𞤤.
𞤏𞤭𞤴𞤫𞤲 𞤳𞤢𞤣𞤭 𞤸𞤢𞤴 𞤧𞤭 𞤧𞤭𞤲𞤷𞤵𞤺𞤮𞤤 𞤦𞤭𞤲𞤣𞤮𞤤 𞤲𞤺𞤮𞤤 𞤱𞤫𞥅𞤩𞤭𞥅⹁
𞤳𞤮 𞤱𞤵𞥅𞤪𞤲𞤵𞤺𞤮𞤤 𞤦𞤭𞤲𞤣𞤮𞤤 𞤲𞤺𞤮𞤤 𞤱𞤮𞤲𞤭 𞤳𞤮 𞤩𞤵𞤪𞤭 𞤧𞤢𞤯𞤼𞤵𞤣𞤫.
𞤅𞤢𞤦𞤵 𞤢𞤤𞤢𞥄 𞤳𞤮 𞤩𞤵𞤪𞤭 𞤧𞤢𞤯𞤼𞤵𞤣𞤫⹁ 𞤶𞤢𞤲𞤺𞤭𞤲𞤺𞤮𞤤 𞤴𞤭𞤥𞤩𞤫 𞤳𞤮 𞤩𞤫 𞤢𞤲𞤣𞤢𞥄⹁ 𞤩𞤫 𞤱𞤮𞥅𞤱𞤢𞥄 𞤴𞤭𞤴𞤵𞤣𞤫⹁ 𞤼𞤫𞤲𞤼𞤭𞤲𞤭𞥅 𞤧𞤭 𞤩𞤫 𞤧𞤵𞤼𞤢𞥄𞤳𞤭 𞤲𞤢𞤬𞤮𞥅𞤪𞤫 𞤩𞤢𞤣𞤭𞥅𞤲𞤣𞤫 𞤸𞤵𞥅𞤲𞤣𞤫 𞤲𞤣𞤫 𞤩𞤫 𞤱𞤮𞤲𞤢𞥄 𞤶𞤢𞤲𞤺𞤭𞤲𞤫𞥅𞤣𞤫 𞤲𞤣𞤫𞤲.
𞤅𞤭 𞤢 𞤱𞤢𞤯𞤢𞤴𞤯𞤵𞤲 𞤳𞤮 𞤦𞤫𞥅 𞤱𞤮𞤲𞤢𞥄 𞤲𞤫𞤯𞥆𞤮⹁ 𞤢𞤰𞥆𞤢𞤲𞤯𞤮 𞤶𞤢𞤲𞤺𞤭𞤲𞤺𞤮𞤤⹁ 𞤥𞤵𞤻𞥆𞤭𞥅𞤯𞤮⹁ 𞤥𞤮 𞤸𞤢𞤱𞤶𞤢𞥄⹁ 𞤥𞤮 𞤸𞤵𞤤𞤢𞤼𞤢𞥄 𞤥𞤫𞤼𞥆𞤭𞤲𞤢𞤲𞤫𞥅𞤣𞤫 𞤫 𞤢𞤴𞤦𞤭𞤲𞤫𞥅𞤣𞤫 𞤫 𞤶𞤢𞤤𞤳𞤭𞤼𞤫𞥅𞤣𞤫.
𞤖𞤵𞥅𞤲𞤣𞤫 𞤲𞤣𞤫 𞤼𞤢𞤱𞤢𞤼𞤢 𞤱𞤮𞤲𞤢𞥄 𞤥𞤮 𞤳𞤢𞤤𞤢 𞤼𞤮𞥅𞤱𞤲𞤢𞤼𞤢.
𞤑𞤮 𞤦𞤫𞥅 𞤱𞤮𞤲𞤢𞥄 𞤳𞤢𞤣𞤭 𞤽𞤫𞤤𞤵𞤯𞤮 𞤫 𞤯𞤫𞤲𞤺𞤢𞤤 𞤲𞤺𞤢𞤤 𞤱𞤮𞤲𞤵𞤯𞤢𞥄 𞤧𞤭𞤲𞤷𞤢𞤲𞤣𞤫 𞤦𞤭𞤲𞤣𞤮𞤤 𞤲𞤺𞤮𞤤.
𞤑𞤮 𞤦𞤫𞥅 𞤱𞤭𞤲𞤣𞤢𞥄 𞤳𞤢𞤣𞤭 𞤣𞤫𞤬𞤼𞤫 𞤶𞤢𞤲𞤺𞤭𞤲𞤭𞤪𞤯𞤫 𞤫 𞤲𞤮𞥅𞤣𞤫 𞤣𞤫𞤬𞤼𞤫 𞤸𞤫𞥅𞤱𞤯𞤫 𞤬𞤭𞥅 𞤸𞤮𞤤𞥆𞤵𞤺𞤮𞤤 𞤲𞤢𞤬𞤮𞥅𞤪𞤫 𞤦𞤭𞤲𞤣𞤮𞤤 𞤲𞤺𞤮𞤤.
𞤅𞤭 𞤯𞤵𞤲𞤯𞤮𞤲 𞤬𞤮𞤱 𞤬𞤫𞤰𞥆𞤭𞥅⹁ 𞤳𞤮𞤣𞤵𞤺𞤮𞤤 𞤦𞤭𞤲𞤣𞤮𞤤 𞤲𞤺𞤮𞤤 𞤬𞤭𞥅 𞤴𞤮 𞤲𞤺𞤮𞤤 𞤸𞤵𞥅𞤼𞤮𞤪𞤫 𞤳𞤢 𞤢𞤤𞤢𞥄𞤶𞤭 𞤳𞤫𞤧𞤭(𞤑𞤢𞥄𞤪𞤤𞤢𞥄𞤳𞤵) 𞤳𞤮 𞤯𞤵𞤲𞤯𞤮𞤲 𞤲𞤮𞤲 𞤸𞤭𞤲𞤮 𞤶𞤫𞤴𞤢𞥄 𞤫 𞤳𞤮 𞤩𞤵𞤪𞤭 𞤧𞤢𞤼𞥆𞤵𞤣𞤫.
𞤅𞤢𞤦𞤵 𞤧𞤭 𞤦𞤭𞤲𞤣𞤮𞤤 𞤴𞤵𞤩𞥆𞤫𞤼𞤫 𞤳𞤢 𞤴𞤵𞤲𞤭𞤳𞤮𞤣 𞤼𞤮𞤲 𞤯𞤵𞤲 𞤸𞤭𞤲𞤮 𞤥𞤢𞤪𞤭 𞤧𞤢𞤪𞤼𞤭𞥅𞤶𞤭 𞤯𞤭 𞤼𞤢𞤱𞤢𞤼𞤢 𞤱𞤫𞥅𞤩𞤢𞥄⹁ 𞤯𞤵𞤲 𞤱𞤢𞤴𞤢𞥄 𞤱𞤢 𞤴𞤢𞤸𞤵𞤺𞤮𞤤 𞤧𞤭𞥅𞤲𞤭⹁ 𞤧𞤮𞥅𞤣𞤮𞤴𞤢 𞤳𞤮 𞤴𞤫𞥅𞤴𞤢⹁ 𞤥𞤢𞤤𞥆𞤢 𞤯𞤢𞤩𞥆𞤵𞤺𞤮𞤤 𞤳𞤢𞤴𞤣𞤭 𞤴𞤢𞤸𞤢 𞤶𞤢𞤲𞤺𞤵𞤺𞤮𞤤⹁ 𞤧𞤢𞤦𞤵 𞤦𞤭𞤲𞤣𞤮𞤤 𞤲𞤺𞤮𞤤 𞤳𞤮 𞤦𞤫𞥅 𞤲𞤺𞤮𞤤 𞤱𞤮𞤲𞤢 𞤯𞤫𞤲𞤺𞤢𞤤 𞤳𞤮 𞤲𞤺𞤮𞤤 𞤱𞤭𞤲𞤣𞤢𞤼𞤢 𞤳𞤮𞤲⹁ 𞤸𞤢𞤪𞤢 𞤴𞤭𞤥𞤩𞤫 𞤯𞤵𞥅𞤯𞤵𞤩𞤫 𞤸𞤭𞤲𞤮 𞤱𞤫𞤤𞤼𞤮𞤪𞤭𞥅⹁ 𞤒𞤭𞤥𞤩𞤫 𞤯𞤵𞥅𞤯𞤵𞤩𞤫 𞤳𞤢𞤣𞤭 𞤸𞤢𞤪𞤢 𞤸𞤭𞤲𞤮 𞤶𞤢𞤲𞤺𞤭⹁ 𞤣𞤵𞤯𞤫 𞤯𞤵𞥅𞤯𞤵𞤯𞤫 𞤸𞤢𞤪𞤢 𞤸𞤭𞤲𞤮 𞤱𞤮𞥅𞤣𞤭⹁ 𞤸𞤢𞤪𞤢 𞤣𞤫𞤬𞤼𞤫 𞤯𞤵𞥅𞤯𞤵𞤯𞤫 𞤸𞤭𞤲𞤮 𞤱𞤭𞤲𞤣𞤢𞥄⹁ 𞤼𞤢𞤱𞤼𞤢 𞤯𞤮𞤲 𞤳𞤢𞤣𞤭 𞤸𞤢𞤪𞤢 𞤦𞤭𞤲𞤣𞤮𞤤 𞤲𞤺𞤮𞤤 𞤳𞤮 𞤴𞤵𞤩𞥆𞤭𞥅𞤲𞤺𞤮𞤤 𞤱𞤫𞤤𞤵𞤲𞤺𞤮𞤤 𞤬𞤢𞤸𞤥𞤵𞤣𞤫.
𞤑𞤮 𞤦𞤫𞥅 𞤳𞤢𞤣𞤭 𞤳𞤮𞥅𞤸𞤮𞥅𞤩𞤫 𞤲𞤺𞤮𞤤 𞤤𞤫𞤻𞤮𞤤 𞤸𞤫𞤩𞤮𞥅 𞤳𞤮 𞤧𞤫𞥅𞤣𞤭𞤼𞤮𞥅 𞤫 𞤸𞤮𞥅𞤪𞤫 𞤲𞤺𞤮𞤤 𞤦𞤭𞤲𞤣𞤮𞤤 𞤸𞤢𞤪𞤢 𞤳𞤮 𞤱𞤭𞤲𞤣𞤵𞤩𞤫 𞤣𞤫𞤬𞤼𞤫 𞤸𞤫𞥅𞤱𞤯𞤫 𞤫 𞤲𞤺𞤮𞤤 𞤦𞤭𞤲𞤣𞤮𞤤⹁ 𞤥𞤢𞤤𞥆𞤢 𞤴𞤫𞤱𞤼𞤮𞥅𞤩𞤫 𞤸𞤫𞤯𞤢𞥄𞤩𞤫 𞤦𞤵𞤴 𞤫 𞤲𞤺𞤢𞤤 𞤯𞤫𞤲𞤺𞤢𞤤.
𞤖𞤭𞤲𞤮 𞤼𞤢𞤱𞤼𞤭 𞤯𞤵𞤲 𞤳𞤢𞤣𞤭 𞤴𞤭𞥅𞤼𞤭𞤣𞤵𞤺𞤮𞤤 𞤫 𞤢𞤲𞤼𞤢𞤲𞤩𞤫⹁ 𞤯𞤫𞤲𞤯𞤭𞤲𞤳𞤮𞥅𞤩𞤫 𞤰𞤫𞤤𞥆𞤭𞤼𞤭𞥅𞤩𞤫⹁ 𞤇𞤫 𞤼𞤢𞤱𞤢𞤼𞤢 𞤧𞤭 𞤱𞤮𞤲𞤢𞥄 𞤧𞤢𞤦𞤵 𞤼𞤭𞤺𞤭 𞤥𞤢𞤤𞥆𞤢⹁ 𞤭𞤼𞥆𞤢𞤲𞤫𞥅𞤣𞤫 𞤶𞤢𞤱𞤤𞤫 𞤯𞤵𞥅𞤯𞤵𞤣𞤫 𞤴𞤭𞥅𞤣𞤵𞤺𞤮𞤤 𞤫 𞤥𞤵𞤲 𞤱𞤫𞤤𞤢𞥄 𞤬𞤭𞥅.
𞤅𞤭 𞤮𞤲 𞤧𞤫𞥅𞤣𞤢𞥄𞤥𞤢 𞤯𞤮𞤲 𞤦𞤭𞤲𞤣𞤮𞤤 𞤲𞤺𞤮𞤤 𞤴𞤵𞤩𞥆𞤢𞥄𞤥𞤢⹁ 𞤱𞤮𞤲𞥆𞤮 𞤢 𞤸𞤵𞤯𞤭𞤪𞤼𞤢𞥄 𞤺𞤮𞤯𞥆𞤮 𞤧𞤭𞤲𞤷𞤵𞤺𞤮𞤤 𞤦𞤭𞤲𞤣𞤮𞤤 𞤫𞤤𞥆𞤫𞥅 𞤳𞤮 𞤼𞤢𞤱𞤢𞤼𞤢 𞤱𞤫𞤤𞤢𞥄 𞤬𞤭𞥅.
𞤅𞤭 𞤯𞤵𞤲 𞤯𞤮𞤲 𞤬𞤫𞤰𞥆𞤭𞥅 𞤲𞤢𞥄𞤣𞤵𞤺𞤮𞤤𞤯𞤭 𞤳𞤢 𞤢𞥄𞤤𞤢𞥄𞤶𞤭 𞤺𞤮𞤤𞥆𞤭𞤼𞤭𞤪𞤯𞤭⹁𞤯𞤮𞤲 𞤳𞤢𞤣𞤭 𞤳𞤮 𞤶𞤭𞤸𞤢𞥄𞤣𞤭 𞤺𞤮𞥅⹁ 𞤲𞤣𞤭 𞤦𞤵𞤴 𞤸𞤵𞤥𞤨𞤭𞤼𞤢𞥄𞤳𞤭 𞤳𞤮 𞤸𞤮𞤲𞥆𞤮 𞤬𞤫𞤰𞥆𞤭𞤪𞤼𞤢⹁ 𞤱𞤢𞤲𞤮 𞤢𞤲𞤼𞤪𞤮𞤴𞤭𞤣⹁ 𞤱𞤭𞤲𞤣𞤮𞥅𞤧⹁ 𞤢𞥄𞤨𞤵𞤤 𞤫𞤳𞤲𞤯.... 𞤍𞤭 𞤼𞤢𞤱𞤢𞤼𞤢 𞤲𞤢𞥄𞤼𞤵𞤺𞤮𞤤 𞤼𞤮𞤲 𞤱𞤫𞤤𞤢𞥄 𞤬𞤭𞥅⹁ 𞤧𞤭 𞤱𞤮𞤲𞤢𞥄 𞤱𞤢𞤳𞥆𞤭𞤤𞤢𞥄𞤪𞤫 𞤼𞤭𞥅𞤯𞤵𞤲𞤣𞤫⹁ 𞤱𞤮𞤲𞤣𞤵𞤣𞤫 𞤫 𞤧𞤢𞤦𞤵𞥅𞤤𞤭 𞤥𞤮𞤰𞥆𞤭⹁ 𞤫 𞤫𞤼𞥆𞤢𞤲𞤫𞥅𞤣𞤫 𞤶𞤢𞤱𞤤𞤫⹁ 𞤱𞤮𞤲𞤣𞤵𞤣𞤫 𞤫 𞤱𞤢𞤳𞥆𞤭𞤤𞤢𞤲𞤭𞥅𞤩𞤫 𞤱𞤭𞤲𞤣𞤵𞤺𞤮𞤤 𞤶𞤢𞤲𞥆𞤢.
𞤚𞤫𞤲𞤼𞤭𞤲𞤭𞥅 𞤧𞤭 𞤶𞤮𞤳𞥆𞤵𞤩𞤫 𞤦𞤭𞤲𞤣𞤮𞤤 𞤲𞤺𞤮𞤤 𞤯𞤵𞥅𞤯𞤢𞥄⹁ 𞤧𞤢𞤦𞤵 𞤯𞤭𞥅 𞤨𞤭𞥅𞤶𞤭 𞤯𞤮𞥅⹁ 𞤱𞤮𞤲𞤢𞥄 𞤢𞤲 𞤸𞤢𞥄𞤤𞤢𞤲𞤼𞤢𞤩𞤫 𞤫𞤥𞤦𞤫𞤪𞤫 𞤱𞤭𞤲𞤣𞤢𞤴𞤩𞤫 𞤶𞤢𞤲𞤺𞤢 𞤫 𞤲𞤺𞤢𞤤 𞤯𞤫𞤲𞤺𞤢𞤤⹁ 𞤫 𞤲𞤺𞤮𞤤 𞤦𞤭𞤲𞤣𞤮𞤤.
𞤳𞤢𞤥𞤩𞤫 𞤼𞤭𞤺𞤭 𞤸𞤢𞤪𞤢𞤴 𞤸𞤭𞤩𞤫 𞤼𞤫𞤬𞤭 𞤸𞤵𞤥𞤨𞤭𞤼𞤭𞥅 𞤸𞤢𞥄 𞤩𞤢𞤲𞤺𞤢𞤲𞤭𞤩𞤫⹁ 𞤧𞤭 𞤼𞤢𞤱𞤭𞥅 𞤳𞤮 𞤤𞤫𞤻𞤮𞤤 𞤲𞤺𞤮𞤤 𞤯𞤵𞥅𞤯𞤢𞥄⹁ 𞤥𞤢𞤤𞥆𞤢 𞤶𞤢𞤲𞤺𞤵𞤩𞤫 𞤦𞤭𞤲𞤣𞤮𞤤 𞤲𞤺𞤮𞤤 𞤯𞤵𞥅𞤯𞤢𞥄⹁ 𞤧𞤭 𞤱𞤮𞤲𞤢𞥄 𞤸𞤢𞤪𞤢 𞤸𞤭𞤩𞤫 𞤥𞤢𞤪𞤭 𞤶𞤮𞥅𞤥𞤢 𞤶𞤢𞤱𞤤𞤫𞥅𞤩𞤫 𞤬𞤮𞤼𞤢 𞤳𞤮 𞤣𞤢𞤪𞤼𞤢𞤲𞤭𞥅 𞤲𞤺𞤮𞤤 𞤦𞤭𞤲𞤣𞤮𞤤⹁ 𞤥𞤢𞤤𞥆𞤢 𞤸𞤢𞤪𞤢 𞤳𞤮 𞤤𞤢𞥄𞤥𞤵 𞤭𞤱𞤼𞤭𞤪𞤭 𞤩𞤢𞥄𞤱𞤮 𞤥𞤵𞤲⹁ 𞤯𞤭 𞤱𞤢𞥄𞤱𞤢𞤼𞤢𞥄 𞤬𞤫𞤰𞥆𞤵𞤣𞤫 𞤳𞤢 𞤯𞤭 𞤲𞤢𞥄𞤣𞤢𞥄 𞤯𞤮𞤲 𞤳𞤢 𞤴𞤵𞤲𞤭𞤳𞤮𞤣.
𞤉 𞤴𞤫𞤪𞤵: 𞤰𞤫𞤼𞥆𞤫𞤲 𞤯𞤮𞥅 𞤦𞤭𞤲𞤣𞤭 𞤯𞤭 𞤸𞤮𞤤𞥆𞤫𞤲 𞤥𞤭𞤧𞤢𞤤 𞤯𞤵𞤲 𞤳𞤮 𞤦𞤭𞤲𞤣𞤭 𞤱𞤮𞥅𞤣𞤢𞥄𞤯𞤭 𞤳𞤢 𞤳𞤢𞤱𞤼𞤢𞤤 𞤥𞤫𞤫𞤲 𞤯𞤮𞥅.
𞥑- 𞤍𞤫𞤲𞤺𞤢𞤤 𞤱𞤭𞤴𞤫𞤼𞤫𞥅𞤲𞤺𞤢𞤤 𞤱𞤫𞥅⹁ (Vai)𞤸𞤢𞥄𞤤𞤫𞤼𞤫𞥅𞤲𞤺𞤢𞤤 𞤤𞤭𞥅𞤦𞤫𞤪𞤭𞤴𞤢𞥄 𞤫 𞤧𞤫𞥅𞤯𞤢 𞤧𞤢𞤪𞤢𞤤𞤮𞤲.⹁ 𞤦𞤭𞤲𞤣𞤮𞤤 𞤲𞤺𞤮𞤤 𞤴𞤵𞤩𞥆𞤢𞤲𞤮𞥅𞤥𞤢 𞤺𞤭𞤦𞤭 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥙⹁ 𞤳𞤮𞤲𞤮 𞤸𞤢𞥄 𞤶𞤮𞥅𞤲𞤭 𞤲𞤺𞤮𞤤 𞤥𞤢𞤪𞤢𞥄 𞤼𞤢𞤨𞥆𞤭𞤪𞤯𞤫 𞤳𞤢 𞤢𞤲𞤣𞤪𞤮𞤴𞤭𞤣⹁ 𞤥𞤢𞤤𞥆𞤢 𞤱𞤭𞤲𞤣𞤮𞥅𞤧⹁ 𞤧𞤭𞤬𞤢 𞤲𞤮 𞤢𞤣𞤤𞤢𞤥 𞤥𞤢𞤪𞤭𞤪𞤭 𞤲𞤮𞤲.
𞥒- 𞤃𞤫𞤲𞤣𞤫𞥅 𞤳𞤭𞤳𞤢𞤳𞤵𞤴 (Mende Kikakui) 𞤸𞤢𞥄𞤤𞤫𞤼𞤫𞥅𞤲𞤺𞤢𞤤 𞤧𞤢𞤪𞤢𞤤𞤮𞤲 𞤫 𞤺𞤭𞤲𞤫⹁ 𞤧𞤫𞥅𞤯𞤢⹁ 𞤲𞤺𞤮𞤤 𞤴𞤵𞤩𞥆𞤢𞤲𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔⹁𞤳𞤮𞤲𞤮 𞤳𞤢𞤲𞤺𞤮𞤤 𞤳𞤢𞤣𞤭 𞤲𞤺𞤮𞤤 𞤥𞤵𞥅𞤼𞤢𞥄𞤳𞤭 𞤧𞤭𞤬𞤢 𞤢𞤣𞤤𞤢𞤥 𞤲𞤮𞤲⹁ 𞤸𞤢𞤴 𞤯𞤭 𞤫𞤩𞥆𞤮𞤲𞤣𞤭𞤪𞤢𞥄⹁ 𞤯𞤭𞥅𞤯𞤮𞥅 𞤤𞤫 𞤦𞤭𞤲𞤣𞤭 𞤸𞤭𞤲𞤮 𞤢𞤣𞤭𞥅 𞤢𞤣𞤤𞤢𞤥 𞤴𞤵𞤩𞥆𞤫𞥅𞤣𞤫 𞤳𞤢 𞤴𞤵𞤲𞤭𞤳𞤮𞤣.
𞤍𞤵𞤲 𞤲𞤮 𞤸𞤮𞤤𞥆𞤢 𞤫𞤲⹁ 𞤤𞤮𞤱𞤫 𞤦𞤵𞤴 𞤸𞤭𞤲𞤮 𞤸𞤢𞥄𞤲𞤢𞥄 𞤤𞤵𞤥𞤦𞤫𞥅𞤣𞤫 𞤧𞤭 𞤦𞤭𞤲𞤣𞤮𞤤 𞤩𞤢𞤲𞤼𞤮𞥅⹁ 𞤴𞤭𞤴𞤵𞤺𞤮𞤤 𞤦𞤭𞤲𞤣𞤮𞤤 𞤢𞤬𞤪𞤭𞤳𞤭𞤲𞤢𞥄𞤩𞤫 𞤲𞤮 𞤩𞤢𞤲𞤼𞤮𞤪𞤭 𞤱𞤢 𞤳𞤢 𞤢𞤣𞤤𞤢𞤥 𞤸𞤫𞤱𞤼𞤭 𞤯𞤮𞥅 𞤯𞤵𞤲 𞤱𞤮𞤲𞤢𞥄 𞤸𞤵𞥅𞤲𞤣𞤫 𞤧𞤢𞤥𞤢𞤳𞤢𞤤𞤢𞥄𞤪𞤫⹁ 𞤲𞤮 𞤦𞤵𞤴 𞤧𞤭𞤳𞥆𞤭𞤪𞤭. 𞤑𞤮 𞤯𞤵𞤲 𞤸𞤭𞤯𞤫𞤲 𞤸𞤢𞥄𞤲𞤭 𞤱𞤫𞤤𞤼𞤢𞤲𞤢𞥄𞤣𞤫 𞤳𞤮 𞤤𞤢𞤲𞥆𞤢𞤼𞤢𞥄 𞤩𞤫𞥅 𞤧𞤭𞤲𞤷𞤢𞤲𞤩𞤫 𞤫𞤲 𞤯𞤭𞥅 𞤦𞤭𞤲𞤣𞤭⹁ 𞤸𞤭𞤩𞤫 𞤱𞤢𞤳𞥆𞤭𞤤𞤭𞥅 𞤳𞤢𞤣𞤭 𞤴𞤮 𞤯𞤭 𞤲𞤢𞥄𞤼𞤵 𞤳𞤢𞤤𞤢 𞤳𞤢 𞤦𞤭𞤲𞤣𞤮𞤤 𞤸𞤢𞥄𞤲𞤭 𞤲𞤢𞥄𞤼𞤵𞤣𞤫.
𞤉𞤲𞤫𞤲 𞤳𞤢𞤣𞤭 𞤸𞤭𞤯𞤫𞤲 𞤸𞤢𞥄𞤲𞤭 𞤱𞤢𞤤𞥆𞤭𞤼𞤮𞤪𞤺𞤮𞤤⹁ 𞤱𞤭𞤲𞤣𞤵𞤺𞤮𞤤 𞤣𞤫𞤬𞤼𞤫⹁ 𞤶𞤢𞤲𞥆𞤵𞤺𞤮𞤤⹁ 𞤫 𞤺𞤮𞤤𞥆𞤭𞤼𞤭𞤪𞤺𞤮𞤤 𞤢𞤤𞤢𞥄𞤶𞤭 𞤯𞤭 𞤱𞤮𞤲𞤢𞤯𞤫𞤲 𞤥𞤮𞤰𞥆𞤭𞤲𞤢𞤲𞤫𞥅𞤣𞤫 𞤯𞤭𞤲⹁ 𞤫 𞤳𞤢 𞤱𞤮𞤲𞤢 𞤯𞤫𞤲 𞤲𞤢𞥄𞤣𞤫𞥅𞤣𞤫 𞤼𞤮𞤲⹁ 𞤬𞤭𞥅 𞤴𞤮 𞤥𞤮𞤰𞥆𞤭𞤲𞤩𞤫 𞤯𞤭𞤲 𞤢𞤤𞤢𞥄𞤶𞤭 𞤢𞤲𞤣𞤵 𞤩𞤫 𞤩𞤫 𞤱𞤮𞤲𞤭 𞤥𞤮𞤰𞥆𞤭𞤲𞤢𞤲𞤣𞤫 𞤩𞤫𞤲 𞤸𞤭𞤲𞤮 𞤱𞤫𞤤𞤼𞤮𞤪𞤭𞤯𞤭 𞤬𞤮𞤼𞤢.
𞤔𞤮𞥅𞤲𞤭 𞤲𞤮𞤲 𞤳𞤢 𞤢𞤲𞤺𞤢𞤤 𞤶𞤵𞥅𞤯𞤲𞤵𞤺𞤮𞤤 𞤧𞤭 𞤲𞤫𞤯𞥆𞤮 𞤥𞤢𞤱𞤲𞤭𞤲𞤳𞤭𞤲𞤭𞤳𞤫 𞤱𞤭𞤴𞤭𞥅 𞤳𞤢𞤻𞤵𞤲 𞤧𞤭𞤲𞤷𞤵𞤺𞤮𞤤 𞤦𞤭𞤲𞤣𞤮𞤤 𞤧𞤢𞤼𞥆𞤢𞥄⹁ 𞤸𞤢𞤪𞤢𞤴 𞤸𞤭𞤯𞤫𞤲 𞤸𞤫𞤯𞤭𞥅𞤥𞤮⹁ 𞤴𞤮 𞤮 𞤧𞤭𞤲𞤷𞤵 𞤮 𞤲𞤣𞤢𞥄𞤪𞤢.
𞤇𞤢𞤴 𞤱𞤮𞤩𞥆𞤫 𞤱𞤢𞤯𞤼𞤢𞤴 𞤼𞤵𞤲 𞤶𞤭𞤲𞤣𞤵𞤣𞤫 𞤸𞤢𞤳𞥆𞤵𞤲𞤣𞤫 𞤢𞤬𞤪𞤭𞤳𞤭 𞤫 𞤢𞤥𞤫𞤪𞤭𞤳𞤭 𞤥𞤢𞤤𞥆𞤢 𞤬𞤢𞤪𞤢𞤲𞤧𞤭 𞤩𞤫 𞤧𞤭𞤳𞥆𞤢 𞤢𞤤𞤢𞥄 𞤳𞤮 𞤩𞤫 𞤪𞤮𞤲𞤳𞤢𞤼𞤢 𞤱𞤢𞤯𞤵𞤣𞤫.
𞤉𞤲 𞤢𞤲𞤣𞤭𞤲𞤼𞤭𞤲𞤢𞤴 𞤼𞤵𞤲 𞤱𞤮𞤲𞤣𞤫 𞤬𞤫𞤱𞤲𞤣𞤮 𞤢𞤣𞤤𞤢𞤥 𞤴𞤵𞤩𞥆𞤭𞤼𞤫𞥅 𞤳𞤢 𞤴𞤵𞤲𞤭𞤳𞤮𞤣⹁ 𞤶𞤮𞤳𞥆𞤵𞤩𞤫 𞤢𞤣𞤤𞤢𞤥 𞤴𞤢𞤥𞤭𞤪𞤢𞤲𞤮 𞤩𞤫𞤴𞤣𞤵𞤼𞤵𞤺𞤮𞤤 𞤢𞤤𞤳𞤵𞤤𞤫 𞥖 𞤬𞤭𞥅 𞤸𞤢𞤪𞤢 𞤢𞤣𞤤𞤢𞤥 𞤱𞤭𞤲𞤣𞤢𞤴 𞤳𞤮 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤫 𞤯𞤫𞤲𞤯𞤫 𞤢𞤬𞤪𞤭𞤳𞤭 𞤯𞤫𞤲⹁ 𞤼𞤫𞤲𞤼𞤭𞤲𞤭𞥅 𞤳𞤢 𞤸𞤭𞥅𞤪𞤲𞤢𞥄𞤲𞤺𞤫 𞤺𞤢𞥄⹁ 𞤯𞤵𞤲 𞤳𞤢𞤣𞤭 𞤱𞤢𞤯𞤢𞤲𞤮.
𞤳𞤮 𞤯𞤵𞤲 𞤱𞤢𞤯𞤭 𞤥𞤮 𞤲𞤢𞤩𞤭𞥅 𞤦𞤭𞤲𞤣𞤭 𞤴𞤵𞤩𞥆𞤫𞤼𞤫𞥅𞤯𞤭 𞤳𞤢 𞤴𞤵𞤲𞤭𞤳𞤮𞤣 𞤸𞤢𞤪𞤢 𞤳𞤮 𞤭𞤱𞤪𞤵𞤯𞤭 𞤸𞤭𞥅𞤪𞤲𞤢 𞤀𞤊𞤈𞤋𞤑𞤋⹁ 𞤳𞤮 𞤸𞤫𞥅𞤱𞤭 𞤳𞤮𞤲 𞤩𞤫 𞤧𞤢𞤨𞥆𞤭𞤲𞤢𞤴𞤥𞤮 𞤱𞤭𞤲𞤣𞤭𞤪𞤺𞤮𞤤 𞤢𞤣𞤤𞤢𞤥⹁ 𞤸𞤢𞤴 𞤧𞤭 𞤩𞤫 𞤧𞤢𞤤𞤮𞤼𞤮⹁ 𞤳𞤮𞤲𞤮 𞤸𞤭𞤲𞤮 𞤱𞤢𞤯𞤵𞤣𞤫.
𞤳𞤮 𞤯𞤵𞤲 𞤱𞤢𞤯𞤭 𞤦𞤭𞤲𞤣𞤮𞤤 𞤶𞤫𞤴𞤢𞥄𞤲𞤺𞤮𞤤 𞤸𞤭𞥅𞤪𞤲𞤢 𞤀𞤊𞤈𞤋𞤑𞤋 𞤴𞤮 𞤴𞤵𞤩𞥆𞤫 𞤼𞤮𞤲 𞤱𞤫𞤤𞤢𞤼𞤢𞥄 𞤬𞤭𞥅 𞤳𞤢 𞤧𞤢𞤳𞥆𞤭𞤼𞤮𞤪𞤵𞤲 𞤯𞤮𞥅.
𞤂𞤢𞤲𞥆𞤭𞤼𞤮𞤪𞤫𞤲 𞤢𞤲𞤣𞤭𞤲𞤺𞤮𞤤 𞤳𞤢𞤣𞤭⹁ 𞤳𞤮 𞤢𞤣𞤤𞤢𞤥 𞤺𞤮𞤤𞥆𞤭 𞤳𞤮𞤲 𞤫 𞤲𞤣𞤫𞤪 𞤣𞤵𞥅𞤩𞤭 𞥑𞥐⹁ 𞤸𞤢𞤴 𞤺𞤮𞥅𞤼𞤮 𞤫 𞤦𞤭𞤲𞤣𞤭 𞤢𞤬𞤪𞤭𞤳𞤭 𞤯𞤭𞤲 𞤱𞤢𞤯𞤢𞥄𞤤𞤭 𞤧𞤭𞤬𞤢 𞤯𞤵𞤲 𞤸𞤢𞤪𞤭⹁ 𞤳𞤮 𞤯𞤵𞤲 𞤱𞤢𞤯𞤭 𞤸𞤭𞤯𞤫𞤲 𞤸𞤢𞥄𞤲𞤭 𞤱𞤫𞤤𞤼𞤮𞤪𞤺𞤮𞤤 𞤢𞤣𞤤𞤢𞤥⹁ 𞤢𞤲𞤣𞤫𞤲 𞤳𞤮 𞤸𞤵𞥅𞤲𞤣𞤫 𞤥𞤢𞤱𞤲𞤵𞤲'𞤣𞤫 𞤲𞤭𞥅⹁ 𞤱𞤮𞤼𞤢 𞤫𞤲 𞤼𞤫𞤱𞤼𞤮 𞤢𞤴𞤦𞤭𞤲𞤮𞥅𞤩𞤫⹁ 𞤳𞤮 𞤲𞤢𞤱𞤤𞤭𞥅𞤺𞤵 𞤫 𞤲𞤺𞤢𞤻𞤢𞤲𞤫𞥅𞤲𞤣𞤭 𞤩𞤫 𞤱𞤮𞤲𞤣𞤭 𞤫 𞤥𞤵𞤲.
✍️ 𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋.
