𞤊𞤋𞤂𞥆𞤋𞤚𞤌𞤂

𞤊𞤭𞤤𞥆𞤭𞤼𞤮𞤤.

𞤃𞤭 𞤶𞤵𞥅𞤤𞤭 𞤧𞤵𞤦𞤢𞤳𞤢 𞤼𞤵𞤲 𞤥𞤭 𞤲𞤢𞤲𞤺𞤢𞤲𞤭 𞤺𞤢𞤴𞤲𞤭𞤼𞤢𞤺𞤮𞤤 𞤸𞤢𞤱𞤵𞤺𞤮𞤤 𞤩𞤮𞤺𞥆𞤭⹁ 𞤴𞤢𞤸𞤢𞤴𞤲𞤮𞥅𞤯𞤭 𞤳𞤢 𞤰𞤢𞤱𞤲𞤺𞤢𞤤 𞤱𞤵𞤪𞤮 𞤥𞤮𞥅𞤣𞤭 𞤳𞤫𞤲𞤣𞤢𞥄⹁ 𞤬𞤫𞤰𞥆𞤭𞤲𞤲𞤮𞥅𞤩𞤫 𞤴𞤮𞤲𞤭𞥅 𞤲𞤭𞥅 𞤤𞤫𞤦𞥆𞤭 𞥔.

𞤃𞤭 𞤸𞤢𞥄𞤤𞤢𞤲𞤭𞥅𞤲𞤮 𞤩𞤫𞤴𞤲𞤺𞤵 𞤢𞤥⹁ 𞤴𞤮 𞤮 𞤱𞤢𞤤𞥆𞤢𞤥 𞤲𞤦𞤮𞤴𞤪𞤭 𞤲𞤣𞤭𞤲 𞤸𞤫𞤩𞤼𞤮𞥅 𞤤𞤢𞤱⹁ 𞤧𞤢𞤦𞤵 𞤲𞤢𞥄𞤲𞤺𞤫 𞤬𞤵𞤯𞤢𞤴 𞤼𞤵𞤲 𞤥𞤭 𞤣𞤢𞤱𞤢 𞤩𞤮𞤪𞤮𞤴𞤺𞤮𞤤 𞤱𞤢𞥄𞤪𞤫 𞤸𞤵𞤯𞤮.

𞤃𞤭 𞤰𞤫𞤼𞥆𞤭 𞤱𞤮𞤪𞤼𞤮𞤱𞤢𞤤 𞤲𞤺𞤢𞤤⹁ 𞤫 𞤩𞤮𞤺𞥆𞤭 𞤸𞤢𞤩𞤭𞤪𞤯𞤭 𞤯𞤭𞤲⹁ 𞤥𞤭 𞤤𞤢𞤲𞤣𞤭𞤼𞤭𞥅𞤥𞤮 𞤲𞤦𞤮𞤴𞤪𞤭 𞤲𞤣𞤭𞤲⹁ 𞤮 𞤸𞤮𞤤𞥆𞤭𞤥𞥆𞤭 𞤸𞤭𞤲𞤣𞤭 𞤸𞤫𞤣𞥆𞤭𞥅 𞤧𞤫𞥅𞤯𞤢 𞤩𞤫𞤲𞤣𞤵𞤺𞤮𞤤⹁ 𞤧𞤢𞤦𞤵 𞤥𞤭 𞤢𞤪𞤵𞤲𞤮 𞤧𞤢𞤺𞥆𞤭𞤲𞤺𞤮𞤤 𞤳𞤢 𞤬𞤫𞤱𞤲𞤣𞤮 𞤧𞤵𞤦𞤢𞤳𞤢 𞤥𞤭 𞤼𞤢𞤱𞤭 𞤶𞤢𞤳𞤢 𞤲𞤢𞤭 𞤥𞤮𞥅𞤣𞤭 𞤵𞤥𞤢𞤪𞤵 𞤯𞤭𞤲⹁ 𞤲𞤢𞥄𞤼𞤵𞤲𞤮 𞤺𞤢𞥄 𞤶𞤫𞤥𞥆𞤢 𞤯𞤭 𞤴𞤢𞤪𞤭 𞤲𞤣𞤭𞤴𞤢𞤲 𞤳𞤮 𞤥𞤭 𞤢𞤷𞥆𞤵𞤲𞤮𞥅 𞤳𞤮𞤲 𞤬𞤮𞤱 𞤳𞤭𞥅𞤳𞤭𞥅𞤯𞤫⹁ 𞤼𞤢𞤱𞤭 𞤦𞤫𞥅 𞤥𞤭 𞤰𞤮𞥅𞤺𞤮𞤴𞤢 𞤳𞤢 𞤩𞤵𞤤𞤲𞤣𞤵 𞤧𞤭 𞤥𞤭 𞤢𞤪𞤼𞤢 𞤥𞤭 𞤧𞤢𞤺𞥆𞤭𞤲𞤢⹁ 𞤴𞤢𞥄𞤬𞤫𞥅𞤤𞤢𞤥 𞤧𞤫𞥅𞤯𞤢 𞤴𞤢𞤲𞤣𞤭⹁ 𞤥𞤭 𞤼𞤫𞤱𞤢𞥄𞤳𞤭.

𞤃𞤭 𞤱𞤭𞤨𞥆𞤭𞤼𞤭𞥅 𞤥𞤭 𞤰𞤫𞤼𞥆𞤭 𞤩𞤫𞤪𞤲𞤣𞤫⹁ 𞤥𞤭 𞤧𞤮𞤲𞤳𞤭⹁ 𞤩𞤢𞤴 𞤯𞤵𞤲𞤯𞤮𞥅 𞤱𞤮𞤲𞤢𞥄 𞤸𞤢𞥄𞤶𞤵𞤥𞤢𞥄⹁ 𞤢 𞤸𞤭𞤼𞥆𞤭𞤲𞤼𞤢𞥄 𞤴𞤵𞤥𞥆𞤭𞤪𞤢𞥄𞤱𞤮⹁.. 𞤥𞤭 𞤥𞤵𞥅𞤼𞤮𞤣𞤭 𞤫 𞤯𞤵𞤲 𞤳𞤢 𞤺𞤢𞤤𞥆𞤫 𞤢𞤥.

𞤑𞤢 𞤥𞤭 𞤴𞤢𞤱𞤼𞤢𞤼𞤢 𞤯𞤮𞤲 𞤳𞤢 𞤲𞤢𞥄𞤪𞤵𞤺𞤮𞤤 𞤸𞤮𞤺𞥆𞤮 𞤥𞤭𞤯𞤮 𞤸𞤢𞤱𞤶𞤭⹁ 𞤳𞤢𞤬𞤼𞤢𞤲𞤵𞤲 𞤢𞤥 𞤳𞤵𞤲 𞤩𞤭𞤤𞤭𞥅 𞤫 𞤤𞤫𞤺𞥆𞤢𞤤⹁ 𞤳𞤵𞤲 𞤤𞤢𞤱𞤼𞤭𞥅 𞤺𞤭𞤦𞤭 𞤸𞤢𞤳𞥆𞤵𞤲𞤣𞤫 𞤸𞤢𞥄 𞤤𞤫𞤴⹁ 𞤥𞤭 𞤬𞤭𞤩𞤭𞤲𞤣𞤭𞤪𞤭 𞤳𞤵𞤲 𞤬𞤭𞥅 𞤱𞤮𞤼𞤢 𞤴𞤭𞤥𞤩𞤫 𞤩𞤫𞤲 𞤧𞤭𞤳𞥆𞤵 𞤳𞤮 𞤱𞤢𞤪𞤢𞤥𞤦𞤢 𞤥𞤭 𞤱𞤢𞤯𞤼𞤭𞥅.

𞤃𞤭 𞤴𞤢𞤤𞤼𞤭 𞤼𞤵𞤲 𞤲𞤢𞥄𞤪𞤵𞤺𞤮 𞤲𞤺𞤮𞤲 𞤼𞤢𞤱𞤭 𞤲𞤢𞤺𞥆𞤫 𞤸𞤭𞤲𞤮 𞤥𞤫𞤼𞥆𞤢 𞤸𞤢𞤴𞤪𞤫 𞤩𞤮𞤤𞤣𞤫 𞤩𞤢𞤯𞤼𞤫 𞤳𞤢 𞤤𞤢𞤥𞤯𞤢𞤲 𞤸𞤭𞤦𞥆𞤫𞤼𞤫𞥅⹁ 𞤥𞤭 𞤫𞤩𞥆𞤭 𞤧𞤮𞤺𞥆𞤵𞤺𞤮𞤤 𞤲𞤺𞤫 𞤥𞤭 𞤬𞤫𞤰𞥆𞤢⹁ 𞤳𞤮𞤲𞤮 𞤸𞤢𞤪𞤭 𞤢 𞤧𞤭𞤳𞥆𞤢𞤴 𞤸𞤭𞤲𞤺𞤫 𞤩𞤵𞤪𞤭𞤥𞥆𞤭 𞤧𞤫𞤴𞤼𞤭𞤲𞤣𞤫⹁ 𞤲𞤺𞤫 𞤱𞤵𞤦𞥆𞤢𞤲𞤭𞤥𞥆𞤭⁏ 𞤥𞤭 𞤷𞤮𞤱𞤼𞤭𞥅 𞤥𞤭 𞤣𞤮𞤺𞤭 𞤬𞤭𞥅 𞤱𞤮𞤼𞤢 𞤲𞤺𞤫 𞤶𞤵𞤪𞤮 𞤤𞤢𞤥⹁ 𞤥𞤭 𞤬𞤢𞤪𞤤𞤭𞥅 𞤫 𞤧𞤭𞤤𞤩𞤢𞤣𞤫𞤪𞤫⹁ 𞤥𞤭 𞤴𞤢𞤲𞤭 𞤥𞤭 𞤺𞤮𞤪𞤼𞤭 𞤳𞤮𞤨𞥆𞤭 𞤢𞤥 𞤯𞤭𞤲 𞤯𞤭𞤯𞤭𞥅 𞤲𞤮𞤲.
𞤰𞤭𞥅𞤰𞤢𞤲 𞤬𞤵𞤯𞥆𞤭𞥅 𞤴𞤢𞤤𞤼𞤵𞤺𞤮𞤤 𞤥𞤭 𞤧𞤫𞤯𞤭 𞤲𞤦𞤵𞤤𞥆𞤢 𞤧𞤫𞥅𞤯𞤢 𞤥𞤭 𞤬𞤢𞤱𞤭 𞤫 𞤸𞤮𞥅𞤪𞤫 𞤦𞤢𞤪𞤥𞤫 𞤯𞤫𞤲⹁ 𞤯𞤢𞤲 𞤢𞤷𞥆𞤭 𞤴𞤢𞤤𞤼𞤵𞤺𞤮𞤤 𞤥𞤭 𞤬𞤫𞤰𞥆𞤭.

𞤳𞤢 𞤥𞤭 𞤥𞤵𞥅𞤼𞤭𞥅 𞤯𞤮𞤲 𞤧𞤫𞥅𞤯𞤢 𞤥𞤭 𞤸𞤢𞤴𞤲𞤭𞥅 𞤻𞤢𞤤𞤵𞤲 𞤸𞤢𞤩𞥆𞤢𞤲𞤢𞥄𞤳𞤵𞤲 𞤼𞤮𞤲𞤰𞤫⹁ 𞤳𞤵𞤲 𞤬𞤵𞤯𞥆𞤮𞤼𞤮 𞤼𞤵𞤲 𞤥𞤵𞤴𞤲𞤭𞤺𞤮𞤤 𞤼𞤮𞤲𞤰𞤫 𞤯𞤫𞤲 𞤷𞤵𞤳𞥆𞤢 𞤴𞤫𞤴𞤪𞤫 𞤲𞤫𞥅𞤲𞤫 𞤥𞤢𞤳𞥆𞤵𞤲⹁ 𞤲𞤺𞤫 𞤷𞤮𞤱𞤼𞤮𞥅 𞤳𞤭𞤧𞤢𞤲.
𞤳𞤵𞤲 𞤬𞤫𞤰𞥆𞤭𞥅 𞤥𞤵𞤴𞤲𞤵𞤺𞤮𞤤 𞤧𞤢𞤦𞤵 𞤳𞤵𞤲 𞤩𞤵𞤪𞤲𞤭𞥅 𞤣𞤵𞥅𞤩𞤭 𞥒 𞤳𞤮 𞤯𞤵𞤲 𞤱𞤮𞤲𞤭 𞤧𞤢𞤦𞤵 𞤳𞤵𞤲 𞤸𞤢𞤩𞥆𞤢𞤲𞤢𞥄 𞤯𞤫𞤲 𞤼𞤮𞤲𞤰𞤫.

𞤥𞤭 𞤸𞤫𞤱𞤼𞤭 𞤫 𞤸𞤮𞤯𞤮 𞤼𞤢𞤱𞤭 𞤥𞤭 𞤳𞤮𞥅𞤰𞤢𞤥𞤢𞥄⹁ 𞤥𞤭 𞤸𞤢𞤴𞤲𞤭𞥅 𞤤𞤫𞤥𞤵𞤲𞥆𞤫𞤸𞤭 𞤪𞤭𞤥𞤵𞤳𞤭 𞤸𞤢𞥄 𞤤𞤭𞥅𞤰𞤭𞥅⹁ 𞤥𞤭 𞤪𞤫𞤱𞤭 𞤬𞤭𞥅 𞤸𞤫𞤩𞤵𞤺𞤮𞤤 𞤯𞤫 𞤯𞤭𞤯𞤭 𞤥𞤭 𞤴𞤢𞤪𞤢 𞤬𞤭𞥅 𞤤𞤫𞤳𞥆𞤭 𞤦𞤮𞤲𞤯𞤫⹁ 𞤥𞤭 𞤬𞤵𞤯𞥆𞤭𞥅 𞤸𞤮𞤷𞥆𞤵𞤣𞤫 𞤬𞤵𞤼𞥆𞤵𞤯𞤫 𞤯𞤫𞤲⹁ 𞤥𞤭 𞤼𞤢𞤱𞤭 𞤳𞤮 𞤲𞤦𞤵𞤪𞤣𞤵𞥅𞤶𞤫⹁ 𞤥𞤭 𞤰𞤫𞤽𞤭𞥅 𞤬𞤭𞥅 𞤸𞤫𞤱𞤼𞤵𞤺𞤮𞤤 𞤤𞤫𞥅𞤥𞤵𞤲𞥆𞤫𞥅𞤶𞤫 𞤲𞤶𞤢𞤲𞤫 𞤯𞤫𞤲⹁ 𞤥𞤭 𞤤𞤫𞤧𞤭𞤪𞤭 𞤱𞤮𞤪𞤼𞤮𞤱𞤢𞤤 𞤢𞤥 𞤲𞤺𞤢𞤤⹁ 𞤥𞤭 𞤼𞤢𞤱𞤭 𞤶𞤢𞤳𞤢 𞤳𞤮 𞤨𞤢𞤰𞤢𞥄𞤶𞤫⹁ 𞤸𞤭𞤯𞤫 𞤱𞤮𞤶𞥆𞤭 𞤳𞤮𞤲𞤮 𞤴𞤢𞤸𞤪𞤢𞤼𞤢𞥄 𞤫 𞤸𞤵𞤲𞤣𞤵𞤳𞤮⹁ 𞤫𞤤𞥆𞤫𞥅 𞤳𞤮 𞤯𞤫 𞤤𞤢𞤥𞥆𞤭.
𞤃𞤭 𞤼𞤢𞤱𞤭 𞤼𞤭𞤲𞤣𞤮𞤤 𞤱𞤭𞤴𞤵𞤺𞤮𞤤 𞤴𞤭𞥅𞤼𞤫𞤪𞤫 𞤴𞤢𞤪𞤢𞤼𞤢𞥄 𞤤𞤫𞤥𞤵𞤲𞥆𞤫⹁ 𞤳𞤮𞤲𞤮 𞤸𞤭𞤲𞤮 𞤢𞤲𞤣𞤭 𞤱𞤫𞤤𞤯𞤫 𞤬𞤫𞤲𞥆𞤢𞥄𞤥𞤢 𞤯𞤮𞥅.

𞤃𞤭 𞤬𞤫𞤰𞥆𞤭 𞤧𞤫𞥅𞤯𞤢 𞤥𞤭 𞤸𞤢𞤴𞤲𞤭𞥅 𞤳𞤵𞤤𞤢𞤥𞤦𞤢 𞤲𞤦𞤫𞥅𞤱𞤢 𞤱𞤢𞤯𞤢𞤲𞤢𞥄𞤲𞤦𞤢 𞤳𞤮𞤤𞤮𞤥𞤦𞤮𞤱𞤢𞤤 𞤸𞤭𞤲𞤮 𞤢𞤧𞤭𞤪𞤢 𞤳𞤮𞤴𞤯𞤫 𞤯𞤫𞤲 𞤯𞤢𞤯𞤮𞤤 𞤦𞤢𞤲𞤼𞤢𞤪𞤢⹁ 𞤥𞤭 𞤪𞤢𞤯𞤭𞥅 𞤲𞤦𞤢⹁ 𞤥𞤭 𞤧𞤮𞤪𞤼𞤭 𞤯𞤢𞤯𞤮𞤤 𞤦𞤢𞤲𞤼𞤢𞤪𞤢 𞤲𞤺𞤮𞤤⹁ 𞤥𞤭 𞤤𞤫𞤧𞤭 𞤥𞤭 𞤰𞤢𞤳𞥆𞤭⹁ 𞤳𞤮𞤲𞤮 𞤸𞤢𞤪𞤭 𞤳𞤮 𞤳𞤫𞥅𞤥𞤵𞤲𞤺𞤢𞤤⹁ 𞤥𞤭 𞤰𞤢𞤳𞥆𞤭 𞤼𞤵𞤲 𞤬𞤭𞥅 𞤱𞤮𞤼𞤢 𞤥𞤭 𞤴𞤢𞤲𞤵 𞤳𞤮𞥅𞤰𞤫.

𞤃𞤭 𞤥𞤭𞥅𞤶𞤭𞤼𞤭𞥅 𞤬𞤭𞥅 𞤲𞤦𞤢𞥄 𞤳𞤵𞤤𞤢𞤥𞤦𞤢 𞤲𞤦𞤫𞥅𞤱𞤢⹁ 𞤥𞤭 𞤭𞤲𞥆𞤭 𞤥𞤭 𞤼𞤮𞥅𞤻𞤭𞥅 𞤲𞤦𞤢𞥄 𞤸𞤮𞤲𞥆𞤮⹁ 𞤥𞤭 𞤶𞤢𞤩𞤼𞤭𞥅 𞤳𞤮 𞤲𞤦𞤢 𞤱𞤢𞤳𞥆𞤭𞤤𞤭𞥅 𞤲𞤦𞤢 𞤢𞤧𞤭 𞤣𞤵𞤥𞤵𞤲𞥆𞤢⹁ 𞤳𞤮𞤲𞤮 𞤥𞤭 𞤭𞤲𞥆𞤭 𞤲𞤦𞤢𞥄 𞤳𞤢𞤣𞤭 𞤸𞤭𞤲𞤮 𞤦𞤮𞤲𞤭 𞤣𞤫𞤴⹁ 𞤸𞤭𞤲𞤦𞤢 𞤱𞤢𞤯𞤼𞤢𞤲𞤢𞥄 𞤳𞤮𞤤𞤮𞤥𞤦𞤮⹁ 𞤳𞤮𞤲𞤮 𞤲𞤦𞤢 𞤫𞤼𞤭𞤳𞤫 𞤸𞤢𞥄 𞤲𞤦𞤢 𞤲𞤢𞥄𞤼𞤭𞥅 𞤳𞤢 𞤦𞤢𞤲𞤼𞤢𞤪𞤢𞥄𞤶𞤫 𞤩𞤫𞤴𞤢⹁ 𞤫 𞤢𞤧𞤵𞤺𞤮𞤤 𞤦𞤢𞤲𞤼𞤢𞤪𞤢 𞤰𞤢𞤳𞥆𞤢⹁ 𞤸𞤭𞤲𞤦𞤢 𞤢𞤷𞥆𞤭 𞤸𞤵𞤯𞤮 𞤴𞤢𞥄𞤧𞤭⹁ 𞤥𞤭 𞤭𞤲𞥆𞤭⹁ 𞤥𞤭𞤲 𞤳𞤢𞤣𞤭 𞤸𞤢𞤴 𞤧𞤭 𞤥𞤭𞤯𞤮 𞤦𞤮𞤲𞤭⹁ 𞤥𞤭𞤯𞤮 𞤩𞤵𞤪𞤭 𞤲𞤦𞤢𞥄𞤯𞤮𞥅 𞤥𞤮𞤰𞥆𞤭𞤺𞤮𞤤.

𞤥𞤭 𞤤𞤵𞤥𞤦𞤭 𞤷𞤢𞤲𞤳𞤵𞤲⹁ 𞤥𞤭 𞤪𞤢𞤰𞤭𞤼𞤭 𞤣𞤵𞤲𞤳𞤭𞥅𞤪𞤫⹁ 𞤳𞤢 𞤷𞤢𞥄𞤱𞤢 𞤯𞤵𞥅𞤯𞤭⹁𞤸𞤢𞤪𞤭 𞤯𞤫 𞤺𞤢𞤴𞤲𞤢𞥄𞤤𞤭 𞤧𞤢𞥄𞤥𞤵𞤺𞤮𞤤⁏ 𞤥𞤭 𞤸𞤫𞤱𞤼𞤭 𞤳𞤢 𞤦𞤮𞥅𞤱𞤢𞤤.
𞤥𞤭 𞤱𞤢𞤤𞥆𞤭𞤲𞤭 𞤩𞤮𞤳𞥆𞤮 𞤳𞤮𞤲⹁ 𞤫 𞤤𞤫𞤴 𞤫𞤲𞤯𞤢𞤥𞥆𞤢𞤸𞤭⹁ 𞤥𞤭 𞤼𞤵𞤪𞤭𞥅 𞤩𞤮𞤪𞤵𞤺𞤮𞤤 𞤸𞤵𞤯𞤮 𞤳𞤮𞤲 𞤸𞤫𞤻𞤢⹁ 𞤳𞤮 𞤼𞤭𞤪𞤤𞤢𞤲𞤯𞤫 𞥑𞥐 𞤱𞤮𞥅𞤱𞤥𞤭 𞤸𞤢𞤩𞥆𞤵𞤣𞤫 𞤱𞤢𞤯𞤢 𞤱𞤢𞥄𞤪𞤫 𞤸𞤵𞤯𞤮⹁ 𞤳𞤮𞤲𞤮 𞤲𞤣𞤫𞤲 𞤻𞤢𞤤𞤲𞤣𞤫 𞤥𞤭 𞤱𞤢𞤯𞤭 𞤯𞤫 𞥑𞥒.

𞤑𞤢 𞤥𞤭 𞤬𞤵𞤯𞥆𞤭𞥅 𞤸𞤢𞤩𞥆𞤵𞤣𞤫 𞤯𞤮𞤲 𞤱𞤢𞥄𞤪𞤫 𞤸𞤵𞤯𞤮 𞤲𞤣𞤫𞤲⹁ 𞤻𞤢𞥄𞤪𞤭 𞤲𞤢𞥄𞤼𞤢𞤲𞤭𞤥𞥆𞤭⹁ 𞤲𞤣𞤫 𞤬𞤮𞤱 𞤲𞤣𞤫 𞤴𞤵𞤲𞤺𞤭𞥅⹁ 𞤩𞤮𞤺𞥆𞤮𞤤 𞤲𞤺𞤮𞤤 𞤥𞤭 𞤢𞤼𞥆𞤭𞤲𞤮𞥅 𞤸𞤢𞤩𞥆𞤮𞤣𞤫 𞤲𞤺𞤮𞤤 𞤳𞤢 𞤦𞤭𞤲𞤣𞤫𞥅𞤪𞤫⹁ 𞤢𞤪𞤼𞤭𞤪𞤭 𞤳𞤢 𞤲𞤶𞤵𞤦𞤵𞥅𞤪𞤵.
𞤩𞤢𞤴 𞤳𞤮 𞤸𞤵𞤯𞤮 𞤦𞤮𞥅𞤱𞤢𞤤 𞤸𞤭𞤳𞤮 𞤩𞤮𞤱𞤪𞤭 𞤬𞤮𞤼𞤢⹁ 𞤸𞤢𞤪𞤭 𞤳𞤮 𞤬𞤵𞤺𞤵𞤤𞤭 𞤥𞤢𞤤𞥆𞤢 𞤨𞤵𞤳𞤭 𞤱𞤮𞥅𞤱𞤭𞤪𞤥𞤭 𞤻𞤢𞤨𞥆𞤭𞤪𞤣𞤫 𞤷𞤵𞥅𞤯𞤭 𞤢𞤥 𞤯𞤭𞤲⹁ 𞤳𞤮𞤲𞤮 𞤳𞤮𞤲 𞤸𞤵𞤯𞤮 𞤯𞤮𞤲 𞤳𞤫𞤤𞤯𞤢𞥄⹁ 𞤸𞤭𞤼𞤢𞥄𞤲𞤣𞤫 𞤳𞤢𞤤𞤢 𞤢 𞤻𞤢𞤨𞥆𞤢𞤴⁏ 𞤸𞤭𞤳𞥆𞤢 𞤥𞤭 𞤫𞤩𞥆𞤭 𞤩𞤮𞤪𞤵𞤺𞤮𞤤 𞤸𞤵𞤯𞤮 𞤦𞤮𞥅𞤱𞤢𞤤 𞤼𞤵𞤲⹁ 𞤧𞤢𞤦𞤵 𞤳𞤮𞤲𞤯𞤮𞤲 𞤳𞤮 𞤣𞤵𞥅𞤩𞤭 𞥒 𞤻𞤢𞤨𞥆𞤭𞤪𞤼𞤢𞥄 𞤥𞤢𞤤𞥆𞤢 𞤼𞤢𞤼𞤭.

𞤃𞤭 𞤪𞤮𞤲𞤳𞤭 𞤱𞤢𞥄𞤱𞤵𞤣𞤫 𞤸𞤢𞤩𞥆𞤵𞤣𞤫 𞤸𞤵𞤯𞤮 𞤳𞤮𞤲⹁ 𞤲𞤮 𞤱𞤮𞥅𞤱𞤭𞤪𞤭 𞤲𞤮𞤲 𞤬𞤭𞥅 𞤲𞤮 𞤥𞤭 𞤪𞤮𞤲𞤣𞤮𞤪𞤢.
𞤃𞤭 𞤢𞤤𞤼𞤭𞤲𞤣𞤭𞤪𞤭𞤳𞤮 𞤥𞤭 𞤸𞤢𞤩𞥆𞤭 𞤥𞤭 𞤪𞤮𞤲𞤣𞤭𞥅⹁ 𞤼𞤢𞤱𞤭 𞤮𞤲𞤫 𞤸𞤵𞤯𞤮 𞤺𞤮𞥅 𞤸𞤭𞤲𞤮 𞤧𞤮𞤪𞤼𞤮𞥅 𞤳𞤢 𞤥𞤭 𞤪𞤮𞤲𞤣𞤭𞥅 𞤯𞤮𞤲 𞤴𞤢𞤲𞤢 𞤳𞤢 𞤤𞤫𞤴𞤣𞤭⹁ 𞤫𞤤𞥆𞤫𞥅 𞤲𞤣𞤫 𞤸𞤢𞤩𞥆𞤢𞥄𞤳𞤭 𞤸𞤢𞥄 𞤥𞤮𞤰𞥆𞤭.

𞤇𞤫 𞤥𞤭 𞤬𞤮𞤼𞥆𞤭 𞤱𞤮𞥅 𞤶𞤢𞤤𞤢 𞤭𞤲𞥆𞤢 𞤢𞤱𞤢 𞤲𞤣𞤵𞥅 𞤻𞤢𞥄𞤪𞤭𞥅𞤪𞤵 𞤼𞤭𞤤𞤬𞤭𞥅 𞤩𞤫𞥅𞤯𞤮𞥅 𞤳𞤢 𞤦𞤭𞤥𞤦𞤭 𞤯𞤮𞥅⹁ 𞤥𞤭 𞤫𞤱𞤲𞤮𞥅 ⹁ 𞤥𞤭𞤯𞤮 𞤴𞤫𞤲𞥆𞤭 𞤦𞤫𞤲 𞤳𞤢𞤤𞤢 𞤶𞤢𞤤𞤵𞤯𞤮 𞤤𞤢𞤥⹁.. 𞤥𞤭 𞤬𞤫𞤰𞥆𞤢.
𞤃𞤭 𞤸𞤫𞤱𞤼𞤭𞤼𞤭𞤪𞤭 𞤳𞤢𞤪𞤢𞤸𞤢𞤲 𞤫𞤤𞥆𞤫𞥅 𞤳𞤮𞥅𞤰𞤫⹁ 𞤫 𞤼𞤫𞤣𞥆𞤫𞥅𞤲𞤣𞤭 𞤸𞤵𞤯𞤮 𞤳𞤮𞤲⹁ 𞤳𞤮 𞤱𞤮𞥅𞤱𞤭 𞤳𞤮 𞤴𞤮 𞤥𞤭 𞤷𞤭𞤳𞥆𞤵 𞤦𞤢𞤸𞤫 𞤸𞤵𞤯𞤮 𞤯𞤫𞤲⹁ 𞤳𞤮𞤲𞤮 𞤫 𞤲𞤺𞤢𞤤𞤯𞤮𞥅⹁ 𞤥𞤭 𞤱𞤢𞤤𞥆𞤭𞤲 𞤫 𞤸𞤮𞥅𞤪𞤫 𞤯𞤢𞤳𞥆𞤵𞤲 𞤧𞤢𞤦𞤵 𞤱𞤢𞥄𞤪𞤫 𞤸𞤵𞤯𞤮 𞤢𞤤𞤼𞤭𞤲𞤣𞤭𞤪𞤢𞥄𞤲𞤣𞤫 𞤸𞤢𞤩𞥆𞤢𞥄 𞤷𞤭𞤳𞥆𞤮𞤼𞤢𞥄𞤳𞤮.

𞤃𞤭 𞤸𞤫𞤱𞤼𞤭𞤼𞤭 𞤳𞤢 𞤺𞤢𞤤𞥆𞤫 𞤢𞤥⹁ 𞤩𞤫𞤴𞤲𞤺𞤵 𞤢𞤥 𞤤𞤢𞤲𞤣𞤭𞥅 𞤧𞤭 𞤥𞤭 𞤼𞤢𞤥𞤨𞤮𞤴𞤢𞥄𞤤𞤭 𞤬𞤮𞤼𞤢⹁ 𞤥𞤭 𞤶𞤢𞥄𞤦𞤢𞥄𞤳𞤭⹁ 𞤌 𞤤𞤢𞤲𞤣𞤭𞥅 𞤧𞤭 𞤴𞤮 𞤮 𞤢𞤣𞥆𞤵 𞤲𞤦𞤮𞤴𞤪𞤭 𞤲𞤣𞤭𞤲؟ 𞤥𞤭 𞤤𞤭𞤰𞥆𞤭 𞤸𞤮𞥅𞤪𞤫 𞤲𞤣𞤫𞤲.

𞤌 𞤢𞤣𞥆𞤭 𞤲𞤣𞤭⹁ 𞤼𞤢𞤱𞤭 𞤳𞤮 𞤲𞤦𞤮𞤴𞤪𞤭 𞤲𞤦𞤵𞥅𞤼𞤭𞤪𞤭⹁ 𞤤𞤢𞤥𞥆𞤭𞤲𞤣𞤭𞤪𞤢𞥄𞤲𞤣𞤭 𞤬𞤮𞤤𞥆𞤫𞤪𞤫 𞤦𞤮𞤯𞤫⹁ 𞤸𞤭𞤲𞤣𞤭 𞤣𞤫𞤬𞤢𞥄 𞤸𞤢𞥄 𞤼𞤫𞤳𞥆𞤭⹁ 𞤮 𞤶𞤮𞥅𞤯𞥆𞤭𞤲𞤭 𞤸𞤮𞤪𞤣𞤫 𞤲𞤦𞤮𞤴𞤪𞤭 𞤲𞤣𞤫𞤲⹁ 𞤫 𞤸𞤮𞥅𞤪𞤫 𞤼𞤫𞤳𞥆𞤫𞤪𞤫⹁

𞤮 𞤩𞤢𞤣𞤲𞤮𞤪𞤭 𞤰𞤫𞤯𞤣𞤵𞤳𞤵𞤲⹁ 𞤥𞤭
𞤴𞤢𞤪𞤭 𞤬𞤮𞤱⹁ 𞤸𞤢𞤴 𞤥𞤭 𞤸𞤫𞤣𞥆𞤭𞤲𞤢𞥄𞤤𞤭⹁ 𞤥𞤭 𞤴𞤢𞤪𞤭 𞤲𞤣𞤭𞤴𞤢𞤲 𞤩𞤵𞥅𞤩𞤵𞤯𞤢𞤲⹁ 𞤥𞤭 𞤴𞤭𞤤𞤼𞤭𞤲𞤣𞤭𞤪𞤭 𞤣𞤢𞥄𞤲𞤣𞤫 𞤢𞤥 𞤲𞤣𞤫𞤲⹁ 𞤲𞤣𞤫 𞤽𞤫𞤰𞥆𞤭⹁
𞤳𞤮 𞤲𞤣𞤫 𞤥𞤵𞥅𞤧𞤢𞤼𞤢 𞤦𞤢𞤯𞤼𞤫 𞤣𞤮𞤲𞤺𞤢𞤤 𞤲𞤺𞤢𞤤 𞤯𞤵𞤴𞤼𞤭𞥅⹁ 𞤼𞤢𞤱𞤭 𞤲𞤢𞥄𞤲𞤺𞤫 𞤲𞤺𞤫𞤲 𞤬𞤵𞤯𞥆𞤭𞤳𞤫 𞤱𞤵𞤤𞤵𞤣𞤫.
𞤥𞤭 𞤱𞤫𞤰𞥆𞤭𞤼𞤭 𞤺𞤢𞤼𞤵𞤲 𞤫 𞤤𞤫𞤴 𞤤𞤫𞥅𞤥𞤵𞤲𞥆𞤫 𞤸𞤵𞤲 𞤯𞤮𞤱𞤣𞤭𞤲𞤳𞤵𞤲⹁ 𞤳𞤢 𞤥𞤭 𞤬𞤮𞤱𞤼𞤮𞥅 𞤧𞤫𞥅𞤯𞤢⹁ 𞤧𞤭 𞤥𞤭 𞤴𞤢𞤸𞤢 𞤲𞤢𞤲𞤺𞤢𞤲𞤺𞤮𞤤 𞤺𞤮𞤯𞥆𞤵𞤲 𞤺𞤮𞥅.

𞤃𞤭 𞤥𞤭𞥅𞤶𞤭𞥅 𞤳𞤢 𞤩𞤫𞤪𞤲𞤣𞤫 𞤢𞤥⹁ 𞤺𞤭𞤦𞤭 𞤲𞤣𞤫𞤲 𞤻𞤢𞤤𞤲𞤣𞤫 𞤥𞤭 𞤴𞤢𞤤𞤼𞤢𞤼𞤢𞥄 𞤳𞤢 𞤢𞤥⹁ 𞤥𞤭 𞤱𞤮𞤻𞤢𞥄𞤤𞤭 𞤳𞤮𞥅𞤰𞤫⹁ 𞤢𞤻𞤵𞤺𞤮𞤤 𞤻𞤢𞥄𞤥𞤫𞤼𞤫𞥅 𞤳𞤮 𞤼𞤢𞤥𞤨𞤫𞤪𞤫 𞤶𞤮𞥅𞤥 𞤥𞤵𞤲⹁ 𞤸𞤢𞤴 𞤧𞤭 𞤥𞤫𞤼𞥆𞤢𞤴 𞤣𞤫𞤬𞤵𞤯𞤮 𞤮𞤲.

✍️𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋.
#ADLaM #mo_dogoussaly #pulaar