𞤒𞤢𞤪𞤳𞤮 𞤱𞤮𞤲𞤢𞥄 𞤤𞤫𞤱𞤪𞤵 𞤣𞤢𞤦𞥆𞤵𞤲𞥋𞤣𞤫 𞤼𞤢𞤲. 𞤑𞤮 𞤤𞤫𞤱𞤪𞤵 𞤸𞤢𞤩𞤪𞤫⹁ 𞤶𞤮𞤺𞤮𞤲𞥋𞤣𞤭𞤪𞤢𞤤⹁ 𞤲𞤣𞤢𞤴𞤲𞤺𞤵 𞤸𞤮𞥅𞤪𞤫 𞤻𞤢𞤱𞤵 𞤱𞤮𞤲𞤵𞤲𞥋𞤺𞤵 𞤫 𞤪𞤢𞥄𞤩𞤵𞤣𞤫 𞤧𞤮𞤲𞥆𞤢𞥄𞤩𞤫 𞤩𞤫𞤲: 𞤦𞤢𞤧𞤵 𞤫𞤲𞤣𞤵.
𞤖𞤭𞤼𞤢𞥄𞤲𞤣𞤫 𞤦𞤫𞥅⹁ 𞤳𞤮 𞤩𞤵𞤪𞤭 𞤺𞤵𞤤𞤵𞥅𞤶𞤫 𞤧𞤮𞤲𞥆𞤢𞥄𞤩𞤫 𞤲𞤮 𞤪𞤢𞥄𞤩𞤫𞥅𞤣𞤫 𞤳𞤫𞤧𞤵𞤲.
𞤑𞤢𞤤𞤢 𞤧𞤮𞤲𞥆𞤢𞥄𞤶𞤮 𞤸𞤵𞤥𞤨𞤭𞤼𞤭𞥅𞤯𞤮 𞤱𞤮𞤲𞤣𞤫𞤥𞤢 𞤲𞤮 𞤱𞤮𞤲𞤣𞤭 𞤫 𞤥𞤢𞤺𞥆𞤵⹁ 𞤲𞤮 𞤱𞤵𞥅𞤪𞤵𞤣𞤫 𞤣𞤵𞥅𞤥𞤵𞤲𞥆𞤢 𞤧𞤢𞤯𞤼𞤵𞤯𞤢𞤲. 𞤖𞤭𞤩𞤫 𞤸𞤢𞤼𞤮𞤲𞤶𞤭𞤲𞤭 𞤫 𞤫𞤬𞤼𞤢𞤲𞤣𞤫⹁ 𞤺𞤭𞤯𞤺𞤮𞤤 𞤫 𞤼𞤢𞤥𞤰𞤭𞤲𞤢𞥄𞤪𞤫.
🌸 𞤖𞤮𞤤 𞤳𞤮 𞤱𞤢𞤯𞤭 𞤧𞤭 𞤒𞤢𞤪𞤳𞤮 𞤄𞤮𞤤𞤰𞤵 𞤲𞤮 𞤱𞤮𞤱𞤤𞤫𞥅𞤣𞤫 𞤬𞤭𞥅 𞤥𞤵𞥅𞤯𞤵𞤲؟
• 𞤑𞤮 𞤩𞤢𞤴 𞤱𞤭𞤰𞥆𞤭𞤼𞤢𞤺𞤮𞤤 𞤤𞤢𞤱 𞤲𞤮 𞤱𞤢𞥄𞤱𞤭 𞤣𞤢𞤯𞤭𞤲𞤣𞤫 𞤲𞤺𞤵𞥅𞤪𞤣𞤢𞤲𞤶𞤭
• 𞤇𞤢𞤴 𞤱𞤮𞤱𞤤𞤵𞤺𞤮𞤤 𞤬𞤭𞥅 𞤦𞤢𞤧𞤵 𞤫𞤲𞤣𞤵 𞤱𞤢𞤤𞥆𞤢𞤴 𞤬𞤢𞤤𞤼𞤢𞤺𞤮𞤤 𞤬𞤮𞤼𞤢
• 𞤇𞤢𞤴 𞤳𞤵𞥅𞤱𞤺𞤢𞤤 𞤦𞤫𞥅 𞤲𞤮 𞤸𞤭𞤼𞥆𞤭: 𞤩𞤮𞤪𞤲𞤢𞤺𞤮𞤤 𞤦𞤮𞤤𞤰𞤵⹁ 𞤧𞤫𞤲𞤣𞤵𞤺𞤮𞤤 𞤲𞤵𞤤𞤢𞤤⹁ 𞤫𞤬𞤼𞤵𞤺𞤮𞤤 𞤤𞤫𞤬𞤱𞤫𞤤𞤣𞤭𞥅𞤯𞤮.
👩🏾⚕️𞤏𞤭𞤰𞥆𞤭𞤼𞤢𞤺𞤮𞤤⹁ 𞤳𞤮 𞤸𞤭𞤱𞤭𞤼𞤢𞤺𞤮𞤤
𞤄𞤢𞤧𞤵 𞤫𞤲𞤣𞤵 𞤴𞤭𞤴𞤢𞥄𞤲𞤺𞤵 𞤤𞤢𞤱𞤵 𞤲𞤮 𞤱𞤢𞥄𞤱𞤫𞥅 𞤻𞤢𞤱𞤲𞤣𞤫𞥅𞤣𞤫 𞤢𞤣𞤮 𞤲𞤺𞤵 𞤼𞤭𞥅𞤯𞤵𞤣𞤫. 𞤉 𞤸𞤭𞤲𞤤𞤫 𞤧𞤮𞤲𞥆𞤢𞥄𞤩𞤫 𞤦𞤵𞤴 𞤲𞤮 𞤦𞤵𞤺𞤭𞤼𞤢𞥄𞤣𞤫 𞤲𞤺𞤢𞥄𞤤 𞤳𞤵𞥅𞤱𞤺𞤢𞤤 𞤲𞤫𞤱𞤭𞥅𞤲𞤺𞤢𞤤.
𞤒𞤢𞤪𞤳𞤮 𞤦𞤮𞤤𞤰𞤵 𞤲𞤮 𞤯𞤮𞤮 𞤲𞤺𞤢𞤥 𞤢𞤲𞤣𞤭𞤲𞤼𞤭𞤲𞤺𞤮𞤤 𞤣𞤢𞤯𞤲𞤭𞤼𞤢𞤲𞤣𞤫 𞤳𞤮 𞤸𞤭𞤼𞥆𞤢𞤲𞤣𞤫⹁ 𞤱𞤮𞤲𞤢𞥄 𞤬𞤮𞤣𞥆𞤢𞤤.
🔎 𞤖𞤮𞤤 𞤳𞤮 𞤱𞤮𞤲𞤭 𞤥𞤢𞥄𞤤𞤫 𞤥𞤢𞤺𞥆𞤵؟
• 𞤚𞤢𞤥𞤫𞤪𞤫 𞤲𞤣𞤫𞤪 𞤫𞤲𞤣𞤵 𞤲𞤣𞤵𞤲 𞤥𞤢𞤤𞥆𞤢 𞤤𞤫𞤧 𞤶𞤵𞥅𞤲𞤺𞤮 𞤲𞤺𞤮𞤲
• 𞤉𞤲𞤣𞤵 𞤱𞤢𞤴𞤤𞤮𞤼𞤮𞥅𞤲𞤣𞤵 𞤲𞤦𞤢𞥄𞤴𞤣𞤭 𞤲𞤢𞤤𞥆𞤢 𞤩𞤵𞤣𞥆𞤭
• 𞤃𞤵𞥅𞤧𞤫𞥅𞤲𞤣𞤭 𞤳𞤢 𞤲𞤣𞤫𞤪 𞤫𞤲𞤣𞤵 𞤲𞤢𞤤𞥆𞤢 𞤣𞤮𞤥𞤪𞤫
• 𞤄𞤮𞤯𞤫𞥅𞤲𞤣𞤭 𞤥𞤢𞤤𞥆𞤢 𞤩𞤢𞤤𞤲𞤣𞤵 𞤲𞤢𞤲𞤣𞤭𞤼𞤢𞤴𞤲𞤣𞤵 𞤫 𞤩𞤢𞤤𞤲𞤣𞤵 𞤲𞤢𞤪𞤩𞤢𞤼𞤢𞤱𞤵
• 𞤐𞤣𞤫𞥅𞤤𞤢𞤲 𞤴𞤢𞤤𞤼𞤢𞤴𞤯𞤢𞤲 𞤫 𞤣𞤮𞤥𞤪𞤫 𞤲𞤣𞤫𞤲 (𞤰𞤭𞥅𞤰𞤢𞤲⹁ 𞤲𞤣𞤫𞥅𞤤𞤢𞤲 𞤸𞤫𞤼𞥆𞤭𞥅𞤯𞤢𞤲…𞤫𞤳𞤲𞤯)
• 𞤁𞤮𞤥𞤪𞤫 𞤱𞤮𞤲𞤵𞤣𞤫 𞤫 𞤲𞤢𞥄𞤼𞤭𞤼𞤭𞤪𞤣𞤫 𞤲𞤣𞤫𞤪
• 𞤑𞤮𞤩𞤮𞤤𞥆𞤫 𞤲𞤢𞤤𞥆𞤢 𞤨𞤫𞤯𞥆𞤢𞤲𞤯𞤫 𞤣𞤮𞤱 𞤣𞤮𞤥𞤪𞤫 𞤲𞤣𞤫𞤲
• 𞤂𞤫𞥅𞤳𞤫 𞤩𞤵𞥅𞤼𞤵𞤯𞤫 𞤤𞤫𞤴 𞤶𞤵𞥅𞤲𞤺𞤮 𞤲𞤺𞤮𞤲 𞤥𞤢𞤤𞥆𞤢 𞤦𞤭𞤲𞤣𞤫 𞤣𞤢𞥄𞤲𞤣𞤫 𞤲𞤣𞤫𞤲
• 𞤉𞤲𞤣𞤵 𞤧𞤫𞥅𞤪𞤼𞤢𞤴𞤲𞤣𞤵 𞤫 𞤲𞤣𞤵𞤴𞤢
• 𞤈𞤮𞤲𞤳𞤫𞤪𞤫 𞤥𞤢𞤱𞤲𞤣𞤫 𞤲𞤢𞤤𞥆𞤢 𞤱𞤢𞥄𞤧𞤫𞥅𞤣𞤫 𞤼𞤫𞤣𞥆𞤫𞥅𞤲𞤣𞤭
🛡️ 𞤖𞤮𞤤𞤲𞤮 𞤣𞤢𞤯𞤲𞤭𞤼𞤮𞤪𞤼𞤫𞥅؟ 𞤖𞤭𞤲𞤮 𞤯𞤮𞤮 𞤧𞤫𞥅𞤯𞤢 𞤫 𞤳𞤵𞥅𞤱𞤯𞤫 𞤣𞤢𞤯𞤲𞤭𞤼𞤮𞤪𞤯𞤫 𞤲𞤫𞤱𞤭𞥅𞤯𞤫:
• 𞤏𞤢𞤯𞤵𞤺𞤮𞤤 𞤣𞤮𞤥𞤲𞤢𞤼𞤢𞤤 𞤣𞤵𞥅𞤩𞤭 𞤯𞤭𞤯𞤭 𞤳𞤢𞤤𞤢⹁ 𞤺𞤭𞤤𞤢 𞤣𞤵𞥅𞤩𞤭 𞥕𞥐 (𞤥𞤢𞤤𞥆𞤢 𞤧𞤭 𞤧𞤢𞤬𞤪𞤢𞤴𞤯𞤮 𞤮𞤲 𞤱𞤢𞥄𞤶𞤭𞤳𞤫 𞤮𞤲). 𞤑𞤮𞤲𞤮 𞤸𞤢𞤴 𞤩𞤫 𞤸𞤫𞤩𞤢𞥄𞤤𞤭 𞤯𞤭𞥅𞤲 𞤣𞤵𞥅𞤩𞤭 𞤯𞤮𞥅𞤲 𞤲𞤮 𞤸𞤢𞥄𞤲𞤭 𞤱𞤢𞤯𞤵𞤺𞤮𞤤.
• 𞤉𞤳𞥆𞤭𞤼𞤢𞤺𞤮𞤤 𞤱𞤢𞤯𞤢𞤲𞤺𞤮𞤤 𞤸𞤮𞤸𞤪𞤫 𞤥𞤵𞥅𞤯𞤵𞤲 𞤴𞤮𞤲𞤸𞤭𞥅𞤻𞤮 𞤫𞤲𞤯𞤭 𞤯𞤭𞤲 𞤲𞤣𞤫 𞤱𞤮𞥅𞤼𞤫𞤪𞤫 𞤫 𞤲𞤣𞤫𞤪 𞤤𞤫𞤱𞤪𞤵 𞤲𞤣𞤵𞤲
• 𞤒𞤢𞤸𞤵𞤺𞤮𞤤 𞤳𞤢 𞤧𞤢𞤬𞤪𞤢𞤴𞤯𞤮 𞤮𞤲 𞤧𞤭 𞤮𞤲 𞤧𞤮𞤺𞤭𞤼𞤭𞤳𞤫 𞤱𞤢𞤴𞤤𞤢𞤤
• 𞤖𞤫𞤩𞤵𞤺𞤮𞤤 𞤲𞤺𞤵𞥅𞤪𞤫 𞤻𞤭𞥅𞤩𞤵𞤲𞥋𞤣𞤫 𞤫 𞤱𞤢𞤯𞤵𞤺𞤮𞤤 𞤧𞤫𞥅𞤯𞤢 𞤳𞤵𞥅𞤱𞤺𞤢𞤤 𞤩𞤢𞤤𞤲𞤣𞤭𞤲𞤳𞤮𞤱𞤢𞤤
• 𞤖𞤢𞥄𞤯𞤼𞤭𞤲 𞤳𞤮𞤲𞤶𞤢𞤥 𞤫 𞤢𞤷𞥆𞤵𞤺𞤮𞤤 𞤬𞤮𞥅𞤯𞤵𞤺𞤮𞤤
• 𞤒𞤫𞤱𞤼𞤭𞤣𞤵𞤺𞤮𞤤 𞤫 𞤧𞤢𞤬𞤪𞤢𞤴𞤯𞤮 𞤥𞤵𞤵𞤲 𞤧𞤮 𞤼𞤢𞤱𞤭𞥅 𞤫𞤯𞤫𞤲 𞤶𞤮𞤺𞤭𞥅 𞤩𞤫 𞤦𞤢𞤧𞤵 𞤫𞤲𞤣𞤵 𞤪𞤢𞥄𞤩𞤭 𞤫 𞤩𞤫𞤧𞤤𞤫 𞤥𞤫𞥅𞤯𞤫𞤲 𞤯𞤫𞤲
👫🏾 𞤉 𞤲𞤣𞤵𞥅 𞤤𞤫𞤱𞤪𞤵 𞤯𞤮𞤮⹁ 𞤫𞤲 𞤬𞤮𞤬 𞤫𞤯𞤫𞤲 𞤱𞤢𞥄𞤱𞤭 𞤱𞤢𞤯𞤵𞤣𞤫 𞤺𞤮𞥅𞤼𞤯𞤵𞤲:
🎗️𞤇𞤮𞤪𞤲𞤢𞤺𞤮𞤤 𞤦𞤮𞤤𞤰𞤵 𞤬𞤭𞥅 𞤸𞤮𞤤𞥆𞤵𞤺𞤮𞤤 𞤫𞤬𞤼𞤢𞤲𞤣𞤫 𞤥𞤫𞥅𞤯𞤫𞤲
💬 𞤒𞤫𞤱𞤼𞤵𞤺𞤮𞤤 𞤱𞤮𞤲𞤣𞤭𞤯𞤩𞤫 𞤥𞤫𞥅𞤯𞤫𞤲 𞤬𞤭𞥅 𞤱𞤭𞤰𞥆𞤭𞤼𞤢𞤲𞤣𞤫
🤝🏾 𞤉𞤬𞤼𞤵𞤺𞤮𞤤 𞤥𞤮𞤶𞤮𞤦𞤫 𞤱𞤮𞤲𞤵𞤯𞤫 𞤫 𞤱𞤢𞤤𞥆𞤭𞤼𞤢𞥄𞤣𞤫 𞤻𞤢𞤱𞤧𞤵𞤩𞤫
💖 𞤅𞤮𞤲𞥆𞤢𞥄𞤩𞤫 𞤱𞤮𞤲𞤵𞤩𞤫 𞤫 𞤸𞤢𞤩𞤭𞤣𞤵𞤣𞤫⹁ 𞤬𞤮𞥅𞤤𞤵𞤩𞤫 𞤻𞤢𞤱𞤵 𞤲𞤺𞤵𞤲⹁ 𞤫 𞤩𞤫 𞤥𞤫𞤲 𞤴𞤫𞤶𞥆𞤭𞤼𞤢𞤼𞤢𞥄 𞤬𞤭𞥅 𞤥𞤵𞥅𞤯𞤵𞤲 𞤨𞤮𞥅𞤥𞤢: 𞤳𞤮 𞤸𞤮𞤲 𞤣𞤮𞥅𞤤𞤫 𞤢𞤥𞤫𞤲⹁ 𞤼𞤵𞥅𞤺𞤭𞤲𞤮𞤪𞤩𞤫 𞤢𞤥𞤫𞤲⹁ 𞤱𞤢𞤳𞥆𞤭𞤤𞤭𞥅𞤩𞤫.
🌷 𞤉 𞤲𞤣𞤵𞥅 𞤤𞤫𞤱𞤪𞤵 𞤯𞤮𞤮⹁ 𞤱𞤮𞤲𞤫𞤲 𞤶𞤮𞤺𞤮𞤲𞥋𞤣𞤭𞤪𞤩𞤫. 𞤊𞤭𞥅 𞤸𞤢𞤩𞥆𞤫. 𞤊𞤭𞥅 𞤥𞤫𞥅𞤯𞤫𞤲. 𞤊𞤭𞥅 𞤶𞤢𞤲𞤺𞤮.
✍️𞤑𞤓𞤍𞤌𞤂: 𞤕.𞤋𞤅𞤃𞤀𞤒𞤂𞤀 𞤔𞤀𞤂𞥆𞤌
