𞤇𞤢𞥄𞤱𞤮 𞤳𞤮 𞤮 𞤸𞤫𞤱𞤼𞤭𞤪𞤭 𞤳𞤢 𞤼𞤵𞤬𞤵𞤲𞤣𞤫 𞤳𞤢𞤪𞤢𞤥𞤮𞤳𞤮 𞤀𞤤𞤬𞤢𞥄 𞤥𞤮 𞤤𞤢𞤦𞤫⹁ 𞤢𞤪𞤣𞤮 𞤶𞤢𞥄𞤺𞤮𞤪𞤢𞤤 𞤺𞤭𞤲𞤫 𞤲𞤺𞤢𞤤⹁ 𞤼𞤭𞤲𞤼𞤭𞤣𞤵𞤲𞤮 𞤫 𞤸𞤫𞤧𞤤𞤮𞥅𞤩𞤫 𞤩𞤫𞤲 𞤫 𞤲𞤣𞤫𞤪 𞤶𞤮𞥅𞤯𞤲𞤣𞤫 𞤪𞤢𞤩𞥆𞤭𞤯𞤵𞤲𞤣𞤫 𞤳𞤢 𞤮 𞤬𞤮𞤣𞤭𞤩𞤫 𞤣𞤢𞤪𞤲𞤢𞤲𞤺𞤮𞤤𞤩𞤫 𞤧𞤵𞥅𞤣𞤵 𞤸𞤫𞤧𞤤𞤮𞥅𞤩𞤫.
𞤌 𞤸𞤮𞤤𞥆𞤭:
𞤑𞤮 𞤢𞤣𞤼𞤭𞥅 𞤳𞤮𞤲 𞤳𞤮 𞤸𞤫𞤱𞤼𞤭𞤲𞤭 𞤥𞤫𞤲 𞤯𞤮𞥅 𞤳𞤮 𞤳𞤮 𞤱𞤫𞤤𞤼𞤢𞤺𞤮𞤤 𞤶𞤢𞤥𞤢𞥄 𞤂𞤢𞤦𞤫 𞤮𞤲⹁ 𞤳𞤮 𞤯𞤵𞤲 𞤂𞤢𞥄𞤥𞤯𞤮 𞤤𞤫𞤧𞤣𞤭 𞤲𞤣𞤭𞤲 𞤃𞤢𞥄𞤥𞤢𞤣𞤭𞥅 𞤣𞤵𞤥𞤦𞤵𞤴𞤢𞥄 𞤲𞤫𞤤𞤭 𞤥𞤫𞤲⹁ 𞤧𞤢𞤦𞤵 𞤱𞤢𞤳𞥆𞤭𞤤𞤢𞥄𞤪𞤫 𞤥𞤮𞤲 𞤳𞤮 𞤱𞤢𞤯𞥆𞤮𞤲 𞤻𞤢𞤤𞤲𞤣𞤫 𞥒𞥑 𞤧𞤫𞥅𞤼𞤮 𞥒𞥐𞥒𞥕 𞤳𞤢 𞤬𞤭𞥅 𞤣𞤭𞥅𞤧𞤲𞤺𞤮 𞤣𞤮𞤧𞤼𞤫𞤪𞤫 𞤤𞤫𞤧𞤣𞤭 𞤺𞤭𞤲𞤫 𞤲𞤣𞤭𞤲.
𞤅𞤢𞤦𞤵 𞤤𞤢𞤦𞤫 𞤲𞤮𞤣𞥆𞤭𞤼𞤢𞥄𞤥𞤢 𞤸𞤮𞤤𞥆𞤭𞤼𞤢𞥄𞤥𞤢 𞤣𞤮𞤧𞤼𞤫𞤪𞤫 𞤲𞤣𞤫𞤲⹁ 𞤩𞤫 𞤶𞤢𞤩𞤭𞤪𞤭 𞤲𞤣𞤫 𞤳𞤢𞤣𞤭 𞤶𞤵𞥅𞤯𞤫 𞤯𞤭𞤯𞤭⹁ 𞤯𞤵𞤲 𞤯𞤮𞤲 𞤳𞤮 𞤦𞤵𞤴 𞤱𞤮𞤲𞤢𞤲𞤣𞤫 𞤤𞤫𞤧𞤣𞤭 𞤥𞤫𞤫𞤲 𞤲𞤣𞤭𞤲.
𞤑𞤮𞤲𞤮 𞤳𞤮 𞤩𞤵𞤪𞤭 𞤥𞤫𞤲 𞤱𞤫𞤤𞤼𞤭𞤲𞤺𞤮𞤤 𞤳𞤮 𞤼𞤢𞤱𞤭 𞤳𞤮𞤲 𞤣𞤭𞥅𞤧𞤲𞤺𞤮 𞤲𞤺𞤮𞤲 𞤬𞤫𞤰𞥆𞤭𞤪𞤭𞥅 𞤲𞤮 𞤸𞤢𞥄𞤲𞤭𞤪𞤭⹁ 𞤼𞤢𞤱𞤭 𞤨𞤭𞥅𞤪𞤮 𞤫 𞤧𞤮𞤲𞤳𞤮 𞤱𞤢𞤯𞤢𞥄𞤤𞤭⹁ 𞤯𞤵𞤲 𞤯𞤮𞥅 𞤳𞤢𞤣𞤭 𞤳𞤮 𞤨𞤮𞥅𞤤𞤺𞤢𞤤 𞤲𞤶𞤢𞤲𞤢𞤤 𞤱𞤮𞤲𞤢𞤲𞤣𞤫 𞤤𞤫𞤧𞤣𞤭 𞤥𞤫𞤫𞤲 𞤲𞤣𞤭𞤲⹁ 𞤧𞤢𞤦𞤵 𞤳𞤮 𞤢𞤪𞤢𞤲𞤵𞤲 𞤯𞤵𞤲 𞤲𞤭𞥅 𞤷𞤮𞤬𞤼𞤫 𞤸𞤭𞤲𞤮 𞤱𞤢𞤯𞤫𞥅 𞤼𞤢𞤱𞤢 𞤨𞤭𞥅𞤪𞤢𞥄𞤳𞤢 𞤥𞤢𞤤𞥆𞤢 𞤧𞤮𞤲𞤳𞤢𞥄.
𞤖𞤢𞤪𞤢𞤴 𞤳𞤢𞤣𞤭 𞤸𞤫𞤦𞤤𞤮𞤯𞤫𞤲 𞤬𞤭𞥅 𞤳𞤮 𞤢𞤪𞤢𞤼𞤢 𞤳𞤮𞤲⹁ 𞤺𞤫𞤪𞤣𞤫𞤲 𞤲𞤭𞥅⹁ 𞤸𞤢𞤪𞤢 𞤫𞤲 𞤨𞤭𞥅𞤪𞤢𞥄𞤤𞤭⹁ 𞤫𞤲 𞤣𞤵𞤳𞤭𞤲𞤣𞤭𞤪𞤢𞥄𞤤𞤭⹁ 𞤫𞤲 𞤤𞤢𞤲𞤷𞤢𞥄𞤤𞤭 𞤸𞤢𞤳𞥆𞤵𞤲𞤣𞤫𞥅𞤶𞤭 𞤥𞤫𞥅𞤯𞤫𞤲⹁ 𞤳𞤮 𞤯𞤵𞤲 𞤯𞤮𞤲 𞤩𞤫𞤴𞤣𞤢𞤼𞤢 𞤲𞤢𞤩𞤪𞤵𞤣𞤫 𞤤𞤫𞤧𞤣𞤭 𞤥𞤫𞤫𞤲 𞤲𞤣𞤭𞤲 𞤴𞤫𞥅𞤧𞤮.
𞤄𞤢𞥄 𞤱𞤵𞥅𞤪𞤭 𞤢𞤪𞤣𞤮 𞤶𞤢𞥄𞤺𞤮𞤪𞤢𞤤 𞤺𞤭𞤲𞤫 𞤲𞤺𞤢𞤤 𞤳𞤢𞤣𞤭 𞤩𞤫𞤴𞤣𞤭𞤼𞤭⹁ 𞤮𞤲𞤮𞤲 𞤸𞤫𞤧𞤤𞤮𞥅𞤩𞤫 𞤤𞤢𞤦𞤫 𞤩𞤫𞤲 𞤮𞤲 𞤤𞤢𞤲𞤣𞤭𞤳𞤫 𞤬𞤭𞥅 𞤸𞤫𞤩𞤵𞤺𞤮𞤤 𞤧𞤵𞥅𞤣𞤵 𞤸𞤫𞤧𞤤𞤮𞥅𞤩𞤫⹁ 𞤸𞤢𞤪𞤢𞤴 𞤯𞤵𞤲 𞤯𞤮𞤲 𞤥𞤭𞤲 𞤫 𞤺𞤵𞤱𞤫𞤪𞤲𞤫𞥅𞤪 𞤮𞤲 𞤥𞤫𞤲 𞤩𞤫𞤴𞤣𞤢𞤴 𞤺𞤵𞤲𞤣𞤮𞤣𞤵𞤣𞤫 𞤬𞤭𞥅 𞤲𞤮 𞤯𞤵𞤲 𞤯𞤮𞤲 𞤤𞤢𞥄𞤼𞤮𞤪𞤢 𞤳𞤢 𞤲𞤫𞥅𞤩𞤢𞥄 𞤧𞤭 𞤀𞤂𞤂𞤀𞤖𞤓 𞤶𞤢𞤩𞤭𞥅.
𞤖𞤢𞤪𞤢 𞤮𞤲𞤮𞤲 𞤸𞤫𞤧𞤤𞤮𞥅𞤩𞤫 𞤩𞤫𞤲 𞤮𞤲 𞤸𞤫𞤩𞤢𞤴 𞤳𞤢 𞤼𞤭𞤲𞤣𞤮𞤲 𞤴𞤫𞤱𞤼𞤮𞤲 𞤰𞤫𞤼𞥆𞤮𞤲 𞤨𞤫𞤸𞤫⹁ 𞤷𞤢𞥄𞤼𞤮𞤲 𞤳𞤢𞤤𞤢 𞤥𞤮 𞤬𞤢𞥄𞤤𞤢𞤯𞤮𞤲⹁ 𞤸𞤢𞤪𞤢 𞤴𞤭𞤥𞤩𞤫 𞤩𞤫𞤲 𞤳𞤮 𞤲𞤢𞤲𞤭𞤪𞤼𞤢 𞤮𞤲 𞤳𞤮 𞤳𞤮 𞤧𞤫𞤤𞥆𞤭⹁ 𞤱𞤮𞤲𞤢𞥄 𞤲𞤢𞤲𞤭-𞤲𞤢𞤲𞤭 𞤼𞤵𞤲⹁ 𞤷𞤮𞤬𞤼𞤫 𞤦𞤵𞤴 𞤸𞤭𞤲𞤮 𞤧𞤢𞥄𞤼𞤭𞥅⹁ 𞤶𞤮𞥅𞤲𞤭 𞤲𞤮𞤲 𞤴𞤭𞤥𞤩𞤫 𞤩𞤫𞤲 𞤸𞤭𞤲𞤮 𞤧𞤭𞤳𞥆𞤢 𞤱𞤮𞤲𞤣𞤫 𞤳𞤮 𞤱𞤮𞤲𞤭 𞤱𞤢𞥄𞤱𞤵𞤺𞤮𞤤 𞤣𞤢𞤱𞤪𞤮 𞤳𞤮 𞤲𞤮 𞤬𞤫𞤲𞤢𞥄𞤲𞤣𞤫 𞤲𞤣𞤫𞤲 𞤼𞤭𞥅𞤯𞤭𞤪𞤭 𞤱𞤮𞥅 𞤳𞤮 𞤯𞤵𞤲 𞤯𞤮𞤲 𞤶𞤮𞤳𞥆𞤫𞤼𞤫𞥅⹁ 𞤶𞤮𞥅𞤲𞤭 𞤲𞤮𞤲 𞤫𞤲𞤫𞤲 𞤫𞤲 𞤬𞤢𞥄𞤤𞤢𞥄𞤳𞤢 𞤯𞤵𞤲 𞤯𞤮𞤲.
𞤃𞤮 𞤳𞤢𞤤𞤢 𞤸𞤭𞤲𞤮 𞤱𞤢𞥄𞤱𞤭 𞤬𞤮𞤣𞤵𞤣𞤫 𞤸𞤮𞤤𞥆𞤭𞤼𞤢 𞤶𞤢𞥄𞤥𞤢𞥄 𞤥𞤵𞤲 𞤮𞤲 𞤫𞤩𞥆𞤮𞥅𞤪𞤫 𞤥𞤵𞤲 𞤲𞤣𞤫𞤲⹁ 𞤳𞤮𞤲𞤮 𞤶𞤮𞥅𞤯𞤮𞥅 𞤫 𞤬𞤫𞤲𞤵𞤺𞤮𞤤⹁ 𞤶𞤭𞥅𞤩𞤢 𞤵𞤳𞥆𞤭𞤲𞤣𞤭𞤪𞤢 𞤴𞤭𞤥𞤩𞤫⹁ 𞤫𞤲 𞤬𞤢𞥄𞤤𞤢𞥄𞤳𞤢 𞤯𞤵𞤲 𞤯𞤮𞤲 𞤶𞤮𞥅𞤲𞤭⹁ 𞤳𞤮 𞤬𞤫𞤰𞥆𞤭 𞤳𞤮𞤲 𞤴𞤮 𞤱𞤮𞤲𞤢𞤲 𞤫𞤲 𞤱𞤢𞥄𞤶𞤵 𞤬𞤭𞥅 𞤲𞤮 𞤣𞤢𞤯𞤭𞤪𞤫𞤲 𞤳𞤮 𞤢𞤪𞤮𞤴𞤼𞤢 𞤳𞤮𞤲.
𞤖𞤢𞤪𞤢𞤴 𞤮𞤲𞤮𞤲 𞤸𞤫𞤧𞤤𞤮𞥅𞤩𞤫 𞤩𞤫𞤲 𞤮𞤲 𞤱𞤢𞤤𞥆𞤢𞤴 𞤫𞤲⹁ 𞤶𞤢𞤥𞤢𞥄 𞤮𞤲 𞤳𞤢𞤣𞤭 𞤼𞤫𞤣𞥆𞤭𞤲𞤫𞥅⹁ 𞤧𞤢𞤦𞤵 𞤸𞤭𞤲𞤮 𞤶𞤫𞤴𞤢𞥄 𞤫 𞤴𞤢𞤱𞤢𞤺𞤮𞤤 𞤴𞤭𞤥𞤩𞤫 𞤬𞤫𞤲𞤢𞤲𞤺𞤮𞤤𞤩𞤫⹁ 𞤧𞤭 𞤢 𞤸𞤢𞥄𞤤𞤢𞤲𞤭𞥅 𞤺𞤮𞤯𞥆𞤮 𞤺𞤮𞥅𞤲𞤺𞤢 𞤸𞤢𞤪𞤢𞤴 𞤢 𞤼𞤫𞤣𞥆𞤭𞤲𞤥𞤮⹁ 𞤸𞤢𞤪𞤢𞤴 𞤮𞤲𞤮𞤲 𞤸𞤫𞤧𞤤𞤮𞥅𞤩𞤫 𞤩𞤫𞤲 𞤼𞤫𞤣𞥆𞤭𞤲𞤫𞥅 𞤶𞤢𞤥𞤢𞥄𞤶𞤭 𞤯𞤭𞤲⹁ 𞤸𞤢𞥄𞤤𞤢𞤲𞤫𞥅 𞤴𞤭𞤥𞤩𞤫 𞤩𞤫𞤲 𞤲𞤮 𞤨𞤭𞥅𞤶𞤭 𞤯𞤭𞤲 𞤱𞤮𞤲𞤭 𞤬𞤫𞤰𞥆𞤭𞤪𞤣𞤫 𞤲𞤮𞤲⹁ 𞤱𞤫𞤤𞤭 𞤥𞤫𞤼𞥆𞤭 𞤴𞤮 𞤺𞤮𞥅𞤲𞤺𞤢 𞤳𞤢𞤲 𞤴𞤫𞤱𞤼𞤫 𞤳𞤮 𞤯𞤵𞤲 𞤯𞤮𞤲 𞤱𞤢𞤤𞥆𞤢𞤼𞤢 𞤫𞤲.
𞤑𞤮 𞤯𞤭𞥅 𞤳𞤮𞤲𞤺𞤵𞤯𞤭 𞤯𞤮𞥅 𞤄𞤢𞥄 𞤱𞤵𞥅𞤪𞤭 𞤧𞤢𞤳𞥆𞤭𞤼𞤮𞤪𞤭 𞤳𞤢 𞤼𞤭𞤲𞤼𞤭𞤣𞤢𞤤 𞤥𞤢𞤳𞥆𞤮 𞤫 𞤸𞤫𞤧𞤤𞤮𞥅𞤩𞤫 𞤩𞤫𞤲.
✍️ 𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋.
