𞤀𞤏𞤁𞤋𞥅𞤔𞤋 𞤂𞤉𞤘𞤍𞤉 𞤀𞤊𞤈𞤋𞤑𞤋 𞤍𞤉𞤐 𞤁𞤀𞤐𞤑𞤀𞥄𞤑𞤀 𞤖𞤀𞤈𞤀 𞤑𞤌 𞤖𞤌𞤐𞤍𞤓𞤐 𞤏𞤌𞤐𞤀𞤚𞤀 𞤏𞤀𞤍𞤚𞤀𞤐𞤁𞤉 𞤃𞤀𞤔𞥆𞤉 ؟

𞤑𞤮 𞤸𞤮𞤲𞤯𞤵𞤲 𞤱𞤮𞤲𞤢𞤼𞤢 𞤬𞤫𞤱𞤼𞤭𞤼𞤢𞤲𞤣𞤫 𞤢𞤱𞤣𞤭 𞤤𞤫𞤺𞤯𞤫 𞤥𞤫𞤲 𞤢𞤬𞤪𞤭𞤳.

𞤆𞤭𞥅𞤶𞤭 𞤦𞤵𞤴 𞤢 𞤲𞤢𞤲𞤢𞤴 𞤭𞤲𞤣𞤫 𞤣𞤢𞤪𞤢𞤲𞤭𞥅𞤩𞤫 𞤱𞤮𞤼𞤢 𞤴𞤫𞤱𞤵⹁ 𞤱𞤢𞤲𞤮: 𞤯𞤫𞤲𞤯𞤫⹁ 𞤦𞤭𞤲𞤣𞤭⹁ 𞤨𞤫𞤰𞥆𞤭⹁ 𞤣𞤫𞤬𞤼𞤫⹁ 𞤳𞤮𞤯𞤮𞥅𞤤𞤭 𞤉𞤑𞤐𞤍..

𞤑𞤮𞤲𞤮 𞤸𞤢𞥄 𞤸𞤢𞤲𞤣𞤫 𞤥𞤭 𞤴𞤭𞤴𞤢𞥄𞤤𞤭⹁ 𞤥𞤭 𞤲𞤢𞤲𞤢𞥄𞤤𞤭 𞤸𞤭𞤲𞤮 𞤴𞤫𞤱𞤼𞤫𞥅 𞤬𞤭𞥅 𞤸𞤭𞤱𞤵𞤺𞤮𞤤 𞤢𞤱𞤣𞤭𞥅𞤶𞤭 𞤤𞤫𞤺𞤯𞤫 𞤢𞤬𞤪𞤭𞤳𞤭 𞤯𞤫𞤲.
𞤇𞤢𞤴 𞤳𞤮 𞤬𞤵𞥅𞤼𞤢 𞤥𞤭 𞤲𞤶𞤢𞤲𞤯𞤭 𞤥𞤭 𞤱𞤮𞤱𞤤𞤢 𞤬𞤭𞥅 𞤼𞤮𞤲 𞤴𞤫𞤪𞤵 𞤢𞤲𞤣𞤵𞤲 𞤢𞤥 𞤳𞤵𞤲.

𞤅𞤭 𞤫𞤲 𞤲𞤣𞤢𞥄𞤪𞤭𞥅 𞤼𞤵𞤼𞤢𞤴𞤩𞤫 𞤤𞤫𞤺𞤯𞤫 𞤯𞤫𞤲 𞤳𞤢 𞤥𞤫𞤫𞤲 𞤲𞤭𞥅𞤲𞤭𞥅 𞤱𞤢𞤲𞤮 𞤥𞤢𞤲𞤺𞤮⹁ 𞤢 𞤼𞤢𞤴𞤱𞤢𞤴 𞤫𞤲 𞤢𞤤𞤢𞥄 𞤼𞤵𞤼𞤵𞤣𞤫 𞤥𞤢𞤲𞤺𞤮𞥅𞤶𞤫 𞤥𞤫𞤫𞤲 𞤯𞤫𞤲⹁ 𞤶𞤮𞥅𞤲𞤭 𞤳𞤮 𞤥𞤢𞤲𞤺𞤮 𞤺𞤫𞤪𞤫𞥅𞤬𞤫𞥅 𞤼𞤵𞤲 𞤱𞤮𞤲𞤵𞤯𞤫𞤲 𞤼𞤵𞤼𞤵𞤣𞤫⹁𞤱𞤢𞤲𞤮 𞤥𞤢𞤲𞤺𞤮 𞤧𞤫𞥅𞤲𞤭 𞤫 𞤥𞤢𞤲𞤺𞤮 𞤬𞤵𞥅𞤼𞤢 𞤫𞤲 𞤸𞤢𞥄𞤶𞤢𞥄𞤳𞤢 𞤫 𞤥𞤵𞤵𞤲 𞤶𞤮𞥅𞤲𞤭 𞤧𞤭 𞤱𞤮𞤲𞤢𞥄 𞤸𞤢𞤪𞤢 𞤯𞤫𞤲 𞤬𞤵𞤯𞤢𞤲 𞤸𞤮𞥅𞤪𞤫 𞤥𞤢𞤶𞥆𞤫⹁ 𞤶𞤮𞥅𞤲𞤭 𞤲𞤮𞤲 𞤱𞤮𞤲𞤢𞥄 𞤬𞤭𞥅 𞤥𞤢𞤲𞤺𞤮 𞤺𞤫𞤪𞤫𞥅𞤬𞤫𞥅 𞤸𞤭𞤲𞤮 𞤯𞤵𞥅𞤯𞤭⹁ 𞤳𞤮𞤲𞤮 𞤳𞤮 𞤥𞤢𞤲𞤺𞤮𞥅𞤶𞤫 𞤯𞤫 𞤼𞤢𞤱𞤪𞤵𞤯𞤫𞤲 𞤯𞤫𞤲 𞤥𞤢𞤱𞤩𞤫 𞤥𞤫𞤫𞤲 𞤩𞤫𞤲 𞤩𞤵𞤪𞤫𞤼𞤫𞥅 𞤻𞤢𞥄𞤥𞤫𞥅𞤣𞤫⹁ 𞤳𞤮 𞤳𞤢𞤲𞤶𞤫 𞤳𞤢𞤣𞤭 𞤩𞤵𞤪𞤭 𞤱𞤫𞤤𞤵𞤣𞤫 𞤧𞤭 𞤣𞤫𞤬𞤢𞥄𞤥𞤢.

𞤚𞤫𞤲𞤼𞤭𞤲𞤭𞥅 𞤲𞤮𞤲 𞤥𞤢𞤲𞤺𞤮𞥅𞤶𞤫 𞤬𞤵𞥅𞤼𞤢 𞤯𞤫𞤲 𞤯𞤫𞤲𞤯𞤮𞤲 𞤳𞤢𞤲 𞤲𞤫𞥅𞤩𞤢𞤼𞤢𞥄 𞤸𞤢𞤪𞤢 𞤯𞤫 𞤴𞤫𞤱𞤭𞥅 𞤫 𞤲𞤣𞤫𞤪 𞤬𞤵𞥅𞤼𞤢⹁ 𞤧𞤭 𞤼𞤢𞤱𞤭𞥅 𞤸𞤫𞤩𞥆𞤭𞤼𞤢𞥄𞤳𞤢 𞤳𞤮 𞤤𞤢𞤱𞤯𞤭.

𞤅𞤭 𞤬𞤫𞤰𞥆𞤭𞥅 𞤯𞤮𞤲⹁ 𞤯𞤫𞥅 𞤬𞤵𞤯𞤢𞤴𞤯𞤫 𞤳𞤢 𞤦𞤵𞤪𞤵𞥅𞤶𞤭⹁ 𞤻𞤢𞥄𞤥𞤫𞤼𞤫𞥅𞤯𞤫 𞤫 𞤯𞤫 𞤻𞤢𞥄𞤥𞤫𞤼𞤢𞥄𞤳𞤫⹁ 𞤧𞤭 𞤫𞤲 𞤰𞤫𞤼𞥆𞤭𞥅 𞤱𞤢𞤲𞤮 𞤻𞤢𞥄𞤥𞤫𞤼𞤫𞥅𞤯𞤫 𞤯𞤫𞤲:
𞤏𞤢𞤲𞤮⹁ 𞤳𞤵𞤪𞤢⹁ 𞤦𞤮𞥅𞤼𞤮⹁ 𞤲𞤫𞤼𞤫⹁ 𞤤𞤢𞥄𞤪𞤫⹁ 𞤥𞤫𞥅𞤳𞤮⹁ 𞤳𞤢𞥄𞤪𞤫⹁ 𞤩𞤮𞤸𞤫⹁ 𞤉𞤑𞤐𞤍....
𞤍𞤫𞥅𞤯𞤮𞥅 𞤧𞤭 𞤬𞤫𞤰𞥆𞤭𞥅 𞤳𞤮 𞤱𞤮𞤲𞤭 𞤳𞤮𞤲 𞤬𞤵𞤯𞤢𞤲𞤣𞤫 𞤸𞤮𞥅𞤪𞤫 𞤥𞤵𞤲 𞤳𞤮𞤲 𞤳𞤢 𞤤𞤢𞤣𞥆𞤫⹁ 𞤢𞤤𞤢𞥄𞤳𞤢 𞤫 𞤼𞤵𞤼𞤫𞥅𞤣𞤫 𞤬𞤫𞤱⹁ 𞤫 𞤳𞤮 𞤥𞤭 𞤸𞤵𞤥𞤨𞤭𞤼𞤭𞥅 𞤳𞤮𞤲.
𞤏𞤢𞤲𞤮 𞤲𞤮𞤲 𞤇𞤌𞤖𞤉⹁ 𞤐𞤉𞤚𞤉⹁ 𞤑𞤀𞥄𞤈𞤉⹁ 𞤄𞤓𞤃𞥆𞤉⹁ 𞤯𞤫𞥅𞤯𞤮𞥅 𞤤𞤫𞤺𞤯𞤫 𞤸𞤭𞤲𞤮 𞤼𞤢𞤦𞤭𞤼𞤭 𞤱𞤮𞤲𞤣𞤫 𞤥𞤢𞤱𞤩𞤫 𞤥𞤫𞤫𞤲 𞤩𞤫𞤲 𞤼𞤵𞤼𞤢𞤴𞤲𞤮 𞤯𞤫 𞤬𞤭𞥅 𞤳𞤮 𞤱𞤢𞤤𞥆𞤭𞤼𞤮𞤪𞤫𞥅 𞤳𞤢 𞤲𞤺𞤵𞥅𞤪𞤫𞥅⹁ 𞤧𞤢𞤦𞤵 𞤯𞤭𞥅 𞤳𞤮 𞤨𞤭𞥅𞤶𞤭 𞤩𞤵𞤪𞤲𞤮𞥅𞤯𞤭 𞤸𞤭𞤼𞥆𞤵𞤣𞤫⹁ 𞤫 𞤲𞤺𞤵𞤪𞤲𞤣𞤢𞤲 𞤥𞤢𞤩𞥆𞤫⹁ 𞤳𞤮 𞤯𞤭𞤲 𞤱𞤢𞤯𞤫𞤼𞤫𞤲𞤮𞥅 𞤥𞤢𞥄𞤬𞤫⹁ 𞤳𞤮 𞤸𞤢𞥄𞤳𞤮 𞤩𞤮𞤸𞤫⹁ 𞤱𞤮𞤲𞤭 𞤥𞤢𞥄𞤬𞤫 𞤼𞤮𞥅𞤪𞤭⹁ 𞤳𞤮 𞤼𞤫𞤼𞤫⹁ 𞤱𞤢𞤯𞤫𞤼𞤫𞥅 𞤮𞤶𞥆𞤭⹁ 𞤳𞤮 𞤶𞤢𞤩𞥆𞤫 𞤤𞤢𞤥𞥆𞤭𞤲𞤭𞤪𞤼𞤫𞥅⹁ 𞤳𞤮 𞤳𞤢𞥄𞤪𞤫 𞤱𞤢𞤯𞤫𞤼𞤫𞥅 𞤲𞤫𞤦𞥆𞤢𞤲⹁ 𞤸𞤢𞤪𞤭 𞤯𞤫𞥅 𞤤𞤫𞤺𞤯𞤫 𞤯𞤮𞥅 𞤸𞤭𞤲𞤮 𞤸𞤭𞤱𞤢𞥄 𞤥𞤮𞤰𞥆𞤢⹁ 𞤳𞤢 𞤦𞤵𞤪𞤵𞥅𞤶𞤭 𞤫 𞤳𞤢 𞤳𞤮𞤱𞤤𞤫 𞤬𞤮𞤱.

𞤑𞤮𞤲𞤮 𞤶𞤮𞥅𞤲𞤭 𞤥𞤮 𞤴𞤢𞤸𞤭𞥅 𞤳𞤢 𞤳𞤮𞤯𞤮𞥅𞤤𞤭 𞤥𞤫𞤫𞤲⹁ 𞤧𞤭 𞤱𞤮𞤲𞤢𞥄 𞤳𞤮 𞤥𞤢𞤱𞤩𞤫 𞤥𞤫𞤫𞤲 𞤼𞤵𞤼𞤵𞤲𞤮𞥅 𞤳𞤮𞤲⹁ 𞤢 𞤴𞤭𞤴𞤢𞤼𞤢𞥄 𞤺𞤮𞤯𞥆𞤮 𞤸𞤭𞤲𞤮 𞤼𞤵𞤼𞤢 𞤣𞤢𞤲𞤳𞤮𞥅 𞤧𞤭𞤬𞤢 𞤯𞤫𞤲 𞤤𞤫𞤺𞤯𞤫⹁ 𞤸𞤢𞤴 𞤩𞤵𞤪𞤯𞤫 𞤯𞤫𞤲 𞤧𞤮𞤨𞥆𞤢𞥄𞤥𞤢 𞤺𞤮𞤯𞥆𞤫 𞤴𞤭𞥅𞤼𞤫 𞤧𞤵𞤲𞥆𞤭𞥅⹁ 𞤸𞤭𞤯𞤫 𞤱𞤢𞤪𞤫𞥅𞤣𞤫 𞤯𞤫 𞤢𞤤𞤢𞥄𞤳𞤢 𞤫 𞤤𞤮𞤲𞤼𞤭𞤲𞤫𞥅𞤣𞤫⹁ 𞤧𞤭 𞤱𞤢𞤳𞥆𞤭𞤤𞤢𞥄𞤳𞤢 𞤳𞤮 𞤧𞤢𞤳𞥆𞤭𞤼𞤮𞤪𞤢𞤴𞤯𞤫 𞤴𞤫𞤱𞤵𞤺𞤮𞤤.

𞤅𞤭 𞤯𞤮𞤲 𞤬𞤫𞤰𞥆𞤭𞥅⹁ 𞤯𞤫𞥅 𞤤𞤫𞤺𞤯𞤫 𞤸𞤵𞥅𞤩𞤵𞤼𞤵𞤯𞤫 𞤦𞤵𞤪𞤵𞥅𞤶𞤭 𞤥𞤫𞤫𞤲 𞤯𞤭𞤲⹁ 𞤯𞤵𞤲 𞤳𞤮 𞤤𞤫𞤺𞤯𞤫 𞤢𞤲𞤣𞤢𞥄𞤯𞤫 𞤬𞤮𞤼𞤢 𞤳𞤢 𞤦𞤵𞤪𞤵𞥅𞤪𞤫⹁ 𞤯𞤵𞤲 𞤳𞤮 𞤱𞤢𞤲𞤮: 𞤑𞤀𞤖𞤋⹁ 𞤄𞤀𞤐𞤚𞤀𞤐⹁ 𞤉𞤐𞤍𞤀𞤃𞥆𞤀⹁ 𞤚𞤉𞤂𞤋⹁ 𞤂𞤉𞤐𞤘𞤉⹁ 𞤕𞤉𞥅𞤑𞤉⹁ 𞤑𞤓𞤈𞤀⹁ 𞤆𞤉𞤂𞥆𞤋𞤚𞤌𞤈𞤌⹁ 𞤏𞤀𞤈𞤐𞤀𞤐𞥆𞤀⹁ 𞤑𞤉𞥅𞤈𞤋⹁ 𞤚𞤋𞤄𞤋⹁ 𞤄𞤀𞤐𞤋⹁ 𞤅𞤓𞤐𞤘𞤀𞤂𞤀. 𞤉𞤳𞤲𞤯...

𞤅𞤭 𞤫𞤲 𞤤𞤭𞤥𞤼𞤭𞥅 𞤯𞤮𞥅 𞤸𞤢𞥄 𞤶𞤢𞤲𞤺𞤮 𞤫𞤲 𞤺𞤢𞤴𞤲𞤢𞤼𞤢𞥄 𞤤𞤭𞤥𞤼𞤵𞤣𞤫⹁ 𞤤𞤫𞤺𞤯𞤫 𞤱𞤮𞤲𞤣𞤵𞤯𞤫 𞤫 𞤲𞤢𞤬𞤮𞥅𞤶𞤫⹁ 𞤬𞤮𞤯𞥆𞤫 𞤳𞤮 𞤣𞤫𞤤𞤦𞤭⹁ 𞤺𞤮𞤯𞥆𞤫 𞤳𞤢𞤣𞤭 𞤳𞤮 𞤣𞤢𞤪𞤭𞥅𞤯𞤫. 𞤘𞤮𞤯𞥆𞤫 𞤳𞤮 𞤻𞤢𞥄𞤥𞤫𞤼𞤫𞥅𞤯𞤫⹁ 𞤳𞤮𞤯𞥆𞤫 𞤳𞤮 𞤻𞤻𞤨𞥆𞤭𞤪𞤯𞤫⹁ 𞤺𞤮𞤯𞥆𞤫 𞤳𞤮 𞤧𞤭𞤼𞤫𞤼𞤫𞥅𞤯𞤫 𞤩𞤮𞤳𞥆𞤮⹁ 𞤺𞤮𞤯𞥆𞤫 𞤳𞤮 𞤻𞤢𞤱𞤲𞤣𞤮𞤪𞤯𞤫.

𞤏𞤢𞤲𞤮 𞤧𞤭 𞤫𞤲 𞤰𞤫𞤼𞥆𞤭𞥅 𞤤𞤢𞥄𞤪𞤫⹁ 𞤳𞤮 𞤸𞤵𞥅𞤲𞤣𞤫 𞤻𞤢𞥄𞤥𞤫𞤼𞤫𞥅𞤲𞤣𞤫 𞤬𞤮𞤼𞤢 𞤳𞤢 𞤪𞤫𞤲𞤣𞤮 𞤥𞤫𞤫𞤲⹁ 𞤳𞤮𞤲𞤮 𞤲𞤣𞤫 𞤢𞤤𞤢𞥄𞤳𞤢 𞤫 𞤼𞤵𞤼𞤫𞥅𞤣𞤫⹁ 𞤬𞤵𞤯𞤢𞤲𞤢𞤴𞤼𞤵𞤲 𞤱𞤮𞤲𞤭 𞤸𞤮𞥅𞤪𞤫 𞤥𞤵𞤲 𞤳𞤢 𞤦𞤵𞤪𞤵𞥅𞤪𞤫 𞤴𞤭𞤥𞤩𞤫 𞤩𞤫𞤲 𞤴𞤢𞤸𞤢 𞤼𞤫𞤼𞥆𞤢⹁ 𞤢𞤤𞤢𞥄𞤳𞤢 𞤫 𞤼𞤵𞤼𞤫𞥅𞤣𞤫⹁ 𞤱𞤢𞤲𞤮 𞤯𞤵𞤲𞤯𞤮𞤲 𞤳𞤮 𞤣𞤫𞤤𞤦𞤭 𞤱𞤢𞤯𞤢𞤼𞤢 𞤥𞤮 𞤧𞤮𞤨𞥆𞤭𞥅 𞤲𞤺𞤫𞤧𞤢 𞤥𞤵𞤲 𞤳𞤢 𞤤𞤢𞥄𞤪𞤫 𞤬𞤵𞤯𞤭 𞤮 𞤱𞤢𞤪𞤢𞤴𞤯𞤫 𞤬𞤮𞤱⹁ 𞤸𞤢𞤪𞤢 𞤮 𞤼𞤵𞤼𞤭𞤼𞤢𞤼𞤢𞥄.

𞤳𞤵𞤪𞤢: 𞤳𞤮 𞤸𞤵𞥅𞤲𞤣𞤫 𞤻𞤢𞥄𞤥𞤫𞤼𞤫𞥅𞤲𞤣𞤫 𞤳𞤵𞤲𞤣𞤭𞤲𞤶𞤭 𞤥𞤵𞤲 𞤯𞤭𞤲 𞤱𞤢𞤯𞤫𞥅 𞤤𞤫𞤳𞥆𞤭 𞤳𞤮𞤲𞤮 𞤢𞤤𞤢𞥄𞤳𞤢 𞤫 𞤼𞤵𞤼𞤫𞥅𞤣𞤫⹁ 𞤸𞤭𞤯𞤫 𞤯𞤵𞤴𞤼𞤮𞥅 𞤼𞤵𞤲 𞤳𞤢 𞤤𞤢𞤣𞥆𞤫.


𞤑𞤢𞤸𞤭⹁ 𞤫 𞤦𞤢𞤲𞤼𞤢𞤲: 𞤳𞤮 𞤤𞤫𞤺𞤯𞤫 𞤲𞤶𞤢𞤲𞤯𞤢𞤴𞤯𞤫⹁ 𞤸𞤭𞤯𞤫 𞤸𞤵𞥅𞤼𞤮𞤪𞤫𞥅 𞤳𞤢𞤣𞤭 𞤬𞤮𞤼𞤢 𞤬𞤭𞥅 𞤥𞤮𞤰𞥆𞤭𞤲𞤺𞤮𞤤 𞤣𞤢𞤲𞤯𞤫 𞤫 𞤳𞤮 𞤲𞤢𞤲𞤣𞤭 𞤫 𞤥𞤵𞤵𞤲⹁ 𞤥𞤢𞤤𞥆𞤢 𞤻𞤢𞤨𞥆𞤭𞤪𞤢 𞤷𞤵𞥅𞤯𞤭⹁ 𞤯𞤫 𞤺𞤢𞤴𞤲𞤢𞥄𞤥𞤢 𞤧𞤫𞥅𞤳𞤫𞥅𞤣𞤫 𞤳𞤢 𞤦𞤵𞤪𞤵𞥅𞤶𞤭⹁ 𞤱𞤢𞤯𞤢 𞤥𞤢𞤣𞤭𞤪𞤭𞤴𞤫𞥅⹁ 𞤳𞤮𞤲𞤮 𞤯𞤫 𞤢𞤤𞤢𞥄𞤳𞤢 𞤫 𞤼𞤵𞤼𞤫𞥅𞤣𞤫⹁ 𞤲𞤮 𞤸𞤵𞤤𞤢𞥄 𞤱𞤮𞤼𞤢 𞤯𞤫 𞤴𞤫𞤱𞤵 𞤫 𞤣𞤵𞥅𞤩𞤭 𞤢𞤪𞤮𞥅𞤶𞤭⹁ 𞤥𞤮 𞤴𞤢𞤸𞤭𞥅 𞤲𞤭𞥅𞤲𞤭 𞤳𞤢 𞤦𞤵𞤪𞤵𞥅𞤶𞤭 𞤯𞤵𞥅𞤯𞤢𞤼𞤢𞥄 𞤴𞤭𞤴𞤵𞤣𞤫 𞤦𞤢𞤲𞤼𞤢𞤲𞤸𞤭 𞤥𞤢𞤤𞥆𞤢 𞤳𞤢𞤸𞤭𞤸𞤭 𞤲𞤶𞤢𞤲𞤯𞤵𞤳𞤭 𞤳𞤮 𞤼𞤮𞤧𞤮𞤳𞤮𞤴 𞤳𞤮𞤴 𞤼𞤵𞤲 𞤸𞤫𞤣𞥆𞤭𞥅⹁ 𞤬𞤵𞤯𞥆𞤭𞥅𞤲𞤺𞤢𞤤 𞤲𞤶𞤢𞤲𞤯𞤵𞤣𞤫 𞤱𞤮𞥅 𞤸𞤭𞤲𞤮 𞤧𞤮𞤨𞥆𞤫𞥅𞤣𞤫.

𞤅𞤭 𞤫𞤲 𞤤𞤭𞤥𞤼𞤭𞥅 𞤲𞤢𞤬𞤢 𞤤𞤫𞤺𞤯𞤫 𞤯𞤫 𞤼𞤢𞤱𞤴𞤯𞤫𞤲 𞤳𞤢 𞤦𞤵𞤪𞤵𞥅𞤶𞤭 𞤥𞤫𞤫𞤲 𞤲𞤢𞤬𞤢 𞤥𞤢𞤶𞥆𞤫⹁ 𞤫 𞤳𞤮 𞤳𞤮 𞤯𞤫 𞤻𞤢𞤱𞤲𞤣𞤢𞤼𞤢 𞤫𞤲 𞤱𞤢𞥄𞤱𞤢𞤼𞤢𞥄 𞤺𞤢𞤴𞤲𞤵𞤣𞤫⹁ 𞤧𞤢𞤦𞤵 𞤯𞤵𞤲 𞤸𞤫𞤰𞤢𞤼𞤢𞥄 𞤸𞤢𞤴 𞤫 𞤣𞤫𞤬𞤼𞤫 𞤧𞤢𞤨𞥆𞤮 𞤱𞤮𞤲𞤢𞥄 𞤬𞤭𞥅 𞤳𞤢𞤲 𞤱𞤭𞤲𞤣𞤢𞤲𞤣𞤫 𞤱𞤮𞥅𞤼𞤫𞤪𞤫⹁𞤫𞤲 𞤩𞤢𞤰𞥆𞤭𞤲𞤢𞤴 𞤼𞤵𞤲 𞤱𞤮𞤲𞤭 𞤼𞤮𞤩𞥆𞤫𞤪𞤫 𞤲𞤣𞤫𞤲.

𞤖𞤢𞤴 𞤳𞤫𞤲𞤳𞤫𞤤𞤭𞤦𞤢 𞤳𞤮 𞤼𞤢𞤱𞤢𞤼𞤢 𞤸𞤭𞤯𞤫𞤲 𞤸𞤵𞥅𞤼𞤮𞤪𞤢 𞤬𞤮𞤼𞤢⹁ 𞤳𞤢 𞤲𞤶𞤢𞤪𞤢𞤥 𞤥𞤫𞤫𞤲 𞤳𞤢𞤬𞤫⹁ 𞤫𞤲 𞤢𞤤𞤢𞥄 𞤫 𞤼𞤵𞤼𞤵𞤣𞤫 𞤯𞤵𞤲 𞤤𞤫 𞤢𞤣𞤵𞤲𞤢 𞤮𞤲 𞤬𞤮𞤱 𞤸𞤭𞤲𞤮 𞤬𞤮𞤼𞥆𞤭 𞤳𞤮 𞤤𞤫𞤳𞥆𞤭.

𞥟𞤔𞤮𞥅𞤲𞤭 𞤲𞤮𞤲 𞤳𞤮 𞤤𞤫𞤺𞤯𞤫 𞤸𞤮𞤲𞤯𞤫 𞤱𞤮𞤲𞤢𞥄 𞤼𞤵𞤼𞤫𞥅𞤣𞤫؟

𞤂𞤢𞥄𞤥𞤵 𞤲𞤺𞤵𞤲 𞤫 𞤥𞤮𞤶𞤮𞤦𞤫 𞤢𞤣𞤵𞤲𞤢𞤴𞤢𞤲𞤳𞤮𞥅𞤶𞤫 𞤯𞤫𞤲 𞤸𞤭𞤲𞤮 𞤱𞤢𞤳𞥆𞤭𞤤𞤭𞥅 𞤬𞤭𞥅 𞤼𞤵𞤼𞤵𞤺𞤮𞤤 𞤤𞤫𞤺𞤯𞤫 𞤸𞤢𞤪𞤢 𞤦𞤵𞤪𞤵𞥅𞤶𞤭 𞤯𞤭𞤲 𞤫 𞤷𞤢𞤲𞤯𞤭 𞤯𞤭𞤲 𞤴𞤫𞥅𞤦𞤢𞥄𞤳𞤢⹁ 𞤳𞤮𞤲𞤮 𞤳𞤮 𞤸𞤮𞤲𞤯𞤵𞤲 𞤫 𞤤𞤫𞤺𞤯𞤫 𞤱𞤮𞤲𞤢𞥄 𞤼𞤵𞤼𞤫𞥅𞤣𞤫 𞤫 𞤯𞤵𞤲⹁ 𞤧𞤢𞤦𞤵 𞤸𞤭𞤼𞤢𞥄𞤲𞤣𞤫 𞤳𞤢𞤤𞤢 𞤤𞤫𞤺𞤯𞤫 𞤦𞤵𞤴 𞤼𞤵𞤼𞤫𞤼𞤫.

𞤉 𞤲𞤣𞤫𞤪 𞤳𞤮 𞤥𞤭 𞤼𞤢𞤧𞤳𞤭𞥅 𞤳𞤮𞤲 𞤫 𞤳𞤮 𞤥𞤭 𞤴𞤭𞤴𞤭 𞤳𞤮𞤲⹁ 𞤳𞤮 𞤢𞤱𞤣𞤭 𞤤𞤫𞤺𞤯𞤫 𞤶𞤢𞤲𞤢𞤲𞤫 𞤼𞤵𞤲 𞤱𞤮𞤲𞤢𞥄 𞤫 𞤼𞤵𞤼𞤫𞥅𞤣𞤫 𞤳𞤢 𞤥𞤫𞤫𞤲 𞤶𞤮𞥅𞤲𞤭.

𞤃𞤭 𞤢𞤲𞤣𞤢𞥄 𞤭𞤲𞤯𞤫 𞤥𞤢𞤶𞥆𞤫 𞤳𞤮𞤲𞤮 𞤳𞤮 𞤱𞤮𞤲𞤢𞥄 𞤼𞤵𞤼𞤫𞥅𞤣𞤫 𞤳𞤮: 𞤥𞤫𞤤𞤭𞤲𞤢𞥄⹁ 𞤧𞤢𞤨𞤫𞤲⹁ 𞤫 𞤳𞤲𞤯.... 𞤀𞤱𞤣𞤭𞥅𞤶𞤭 𞤤𞤫𞤺𞤯𞤫 𞤶𞤢𞤲𞤢𞤲𞤫.

𞤉𞤲 𞤢𞤻𞤢𞥄 𞤴𞤮 𞤯𞤫𞤲 𞤤𞤫𞤺𞤯𞤫 𞤼𞤵𞤼𞤫 𞤩𞤢𞤴 𞤯𞤫 𞤴𞤢𞥄𞤱𞤢𞤴 𞤲𞤶𞤢𞤲𞤯𞤵𞤣𞤫⹁ 𞤳𞤮𞤲𞤮 𞤶𞤭𞤤𞥆𞤫𞤲𞤯𞤫 𞤫 𞤤𞤫𞤺𞤯𞤫 𞤥𞤫𞤫𞤲 𞤯𞤫𞤲 𞤳𞤢𞤣𞤭 𞤸𞤢𞤪𞤢 𞤼𞤵𞤼𞤵𞤺𞤮𞤤𞤯𞤫⹁ 𞤱𞤫𞤣𞥆𞤭𞤼𞤢𞥄𞤳𞤢.

𞤉𞤲 𞤢𞤲𞤣𞤭𞤼𞤭𞤲𞤢𞤴 𞤼𞤵𞤲 𞤤𞤫𞤺𞤯𞤫 𞤸𞤫𞥅𞤱𞤵𞤯𞤫 𞤯𞤫 𞤼𞤢𞤱𞤢𞤼𞤢 𞤯𞤭𞤯𞤭 𞤥𞤵𞤲 𞤯𞤭𞤲 𞤳𞤮 𞤻𞤢𞤱𞤲𞤣𞤭𞤪𞤯𞤭 𞤤𞤫𞤺𞥆𞤢𞤤 𞤢𞤧𞤢𞥄𞤲𞤺𞤢𞤤 𞤱𞤮𞥅 𞤸𞤭𞤲𞤮 𞤥𞤢𞥄𞤴𞤵𞤣𞤫⹁ 𞤩𞤢𞤴 𞤩𞤫 𞤭𞤪𞤦𞤭𞤼𞤢𞤴 𞤯𞤢𞤯𞤭 𞤯𞤭𞤲 𞤬𞤮𞤱⹁ 𞤸𞤢𞤪𞤢 𞤩𞤫𞤲 𞤻𞤢𞤱𞤲𞤣𞤮𞥅𞤩𞤫 𞤢𞤤𞤢𞥄 𞤼𞤵𞤼𞤵𞤣𞤫 𞤤𞤮𞤲𞤼𞤭𞤲𞤢 𞤫 𞤢𞤲𞤣𞤢𞤤 𞤢𞤥.

𞤉𞤲 𞤩𞤵𞤪𞤼𞤢𞤴 𞤢𞤪𞤼𞤮𞤴𞤣𞤫 𞤬𞤫𞤲𞤧𞤭𞤼𞤢 𞤬𞤭𞥅 𞤥𞤵𞤲 𞤩𞤵𞤪𞤭 𞤲𞤭𞥅 𞤧𞤭 𞤀𞤂𞤂𞤀𞤖𞤓 𞤶𞤢𞤩𞤭𞥅.

✍️ 𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋.