𞤖𞤫𞤩𞤼𞤢𞥄𞤪𞤫 𞤱𞤮𞤲𞤢𞥄 𞤳𞤮 𞤼𞤮𞤪𞤫𞤼𞤫𞥅⹁ 𞤳𞤮 𞤼𞤭𞤨𞥆𞤭𞤪𞤢𞤲𞤼𞤫𞥅𞤲𞤣𞤫⹁ 𞤳𞤮 𞤳𞤮 𞤨𞤭𞥅𞤪𞤢𞤲𞤼𞤫𞥅⹁ 𞤳𞤢 𞤪𞤫𞤲𞤣𞤮𞥅𞤶𞤭 𞤸𞤭𞤲𞤮 𞤸𞤫𞥅𞤱𞤭 𞤳𞤢 𞤲𞤢𞤲𞤢𞤼𞤢𞥄 𞤬𞤭𞥅 𞤸𞤫𞤩𞤼𞤢𞥄𞤪𞤫 𞤲𞤮 𞤴𞤫𞤱𞤼𞤫𞥅 𞤬𞤭𞥅 𞤥𞤵𞤲⹁ 𞤸𞤢𞤪𞤢 𞤴𞤭𞤥𞤩𞤫 𞤸𞤭𞤲𞤮 𞤴𞤫𞤱𞤼𞤢 𞤬𞤭𞥅 𞤥𞤢𞤴𞤪𞤫 𞤫 𞤧𞤮𞥅𞤦𞤫𞥅⹁ 𞤸𞤭𞤩𞤫 𞤱𞤭𞤲𞤣𞤭 𞤯𞤵𞤲 𞤳𞤢 𞤣𞤫𞤬𞤼𞤫⹁ 𞤳𞤢 𞤲𞤶𞤵𞤩𞥆𞤵𞤤𞤭 𞤶𞤮𞤳𞥆𞤮𞤲𞤣𞤭𞤪𞤫⹁ 𞤳𞤢 𞤯𞤮𞤱𞤮𞤪𞤯𞤫⹁ 𞤸𞤭𞤩𞤫 𞤱𞤭𞤲𞤣𞤭 𞤳𞤢 𞤺𞤭𞤥𞤯𞤭⹁ 𞤸𞤭𞤩𞤫 𞤱𞤭𞤲𞤣𞤭 𞤳𞤢𞤣𞤭 𞤳𞤢 𞤼𞤵𞥅𞤺𞤮𞤪𞤯𞤫⹁ 𞤥𞤢𞤤𞥆𞤢 𞤳𞤢 𞤣𞤮𞤧𞤼𞤮𞤪𞤯𞤫.
𞤑𞤮𞤲𞤮 𞤳𞤢 𞤸𞤢𞤹𞤭𞥅𞤹𞤢 𞤸𞤭𞤲𞤮 𞤧𞤮𞥅𞤥𞤭𞥅 𞤩𞤢𞥄𞤱𞤮 𞤥𞤵𞤲⹁ 𞤺𞤮𞥅𞤲𞤺𞤭𞤲𞤺𞤮𞤤 𞤫 𞤨𞤫𞤤𞥆𞤭𞤼𞤢𞤤.
𞤊𞤢𞥄𞤤𞤫 𞤸𞤫𞤩𞤼𞤢𞥄𞤪𞤫 𞤱𞤮𞤲𞤢𞥄 𞤼𞤵𞤲 𞤳𞤢 𞤴𞤫𞤤𞤢𞤺𞤮𞤤⹁ 𞤳𞤮 𞤬𞤫𞤤𞥆𞤭𞤼𞤢𞤲𞤺𞤮𞤤 𞤸𞤵𞥅𞤲𞤣𞤫 𞤲𞤣𞤫𞤲⹁ 𞤫 𞤣𞤢𞤪𞤢𞤲𞤢𞤺𞤮𞤤 𞤲𞤣𞤫⹁ 𞤼𞤵𞤯𞤮𞥅 𞤣𞤮𞤤𞥆𞤫 𞤼𞤢𞤥𞤨𞤫𞤪𞤫 𞤫 𞤩𞤭𞤯𞤼𞤢𞥄𞤪𞤫⹁ 𞤳𞤮 𞤱𞤮𞤲𞤭 𞤫 𞤶𞤭𞤨𞥆𞤭𞤪𞤢𞤲𞤺𞤮𞤤 𞤲𞤣𞤫 𞤳𞤮𞤲⹁ 𞤧𞤮𞥅𞤣𞤢 𞤲𞤣𞤫 𞤳𞤢𞤤𞤢 𞤷𞤵𞤺𞥆𞤵 𞤳𞤮 𞤲𞤣𞤫 𞤶𞤢𞤪𞤢𞤼𞤢 𞤸𞤢𞤪𞤢 𞤴𞤭𞤤𞤼𞤮𞤪𞤢𞥄𞤤𞤭 𞤩𞤢𞥄𞤱𞤮⹁
𞤏𞤮𞤲𞤣𞤵𞤣𞤫 𞤫 𞤸𞤭𞤱𞤵𞤺𞤮𞤤 𞤲𞤣𞤭𞤥𞤢𞥄𞤺𞤵 𞤥𞤵𞤲.
𞤼𞤭𞤲𞤣𞤮𞤤 𞤸𞤭𞤲𞤮 𞤱𞤭𞤴𞤭: 𞤧𞤭 𞤼𞤢𞤱𞤭𞥅 𞤪𞤫𞤲𞤣𞤮 𞤸𞤭𞤲𞤮 𞤬𞤢𞥄𞤤𞤢𞥄 𞤸𞤫𞤩𞤼𞤢𞥄𞤣𞤫 𞤪𞤭𞤥𞤯𞤢⹁ 𞤲𞤺𞤮 𞤸𞤢𞥄𞤲𞤢𞥄 𞤱𞤢𞤴𞤵𞤣𞤫 𞤱𞤢 𞤶𞤭𞤺𞤢𞤱𞤢𞤤⹁ 𞤸𞤢𞤦𞥆𞤭𞥅𞤲𞤺𞤢𞤤 𞤱𞤢𞤪𞤢𞤲𞤫𞥅𞤣𞤫 𞤲𞤦𞤢𞤪𞤮𞥅𞤣𞤭(𞤳𞤵𞤤𞥆𞤵𞤲) 𞤥𞤵𞤲 𞤳𞤮 𞤬𞤢𞤺𞥆𞤮𞤪𞤼𞤮𞥅 𞤳𞤮𞤲.
𞤅𞤢𞤦𞤵 𞤶𞤭𞤺𞤢𞤱𞤢𞤤 𞤲𞤺𞤢𞤤 𞤳𞤢𞤻𞤵𞤲⹁𞤲𞤺𞤢𞤤 𞤱𞤢𞥄𞤻𞤢𞤼𞤢𞥄⹁ 𞤲𞤺𞤢𞤤 𞤨𞤭𞥅𞤪𞤭𞤣𞤫𞤼𞤢𞥄𞤳𞤫⹁ 𞤸𞤭𞤲'𞤺𞤢𞤤 𞤧𞤢𞤦𞥆𞤭𞥅 𞤼𞤵𞤲⹁ 𞤴𞤮 𞤺𞤮𞤤𞥆𞤫 𞤯𞤫𞤲 𞤺𞤢𞤧𞤵⹁ 𞤳𞤮 𞤸𞤫𞥅𞤱𞤭 𞤳𞤮𞤲⹁𞤸𞤢𞤪𞤢 𞤳𞤮 𞤤𞤢𞤳𞥆𞤫𞤪𞤫 𞤺𞤮𞤯𞥆𞤮 𞤲𞤺𞤢𞤤 𞤧𞤢𞤦𞥆𞤭𞥅.
𞤃𞤢𞤤𞥆𞤢 𞤧𞤭 𞤱𞤮𞤲𞤢𞥄 𞤯𞤵𞤲⹁ 𞤳𞤮 𞤳𞤮 𞤶𞤭𞥅𞤦𞤭 𞤼𞤵𞤲 𞤲𞤺𞤢𞤤 𞤻𞤢𞥄𞤥𞤢𞤼𞤢⹁ 𞤧𞤭 𞤱𞤮𞤲𞤢𞥄 𞤯𞤵𞤲 𞤸𞤢𞤪𞤢𞤴 𞤳𞤮 𞤳𞤫𞤤𞤯𞤭 𞤳𞤮𞤲 𞤬𞤮𞤱 𞤫 𞤼𞤫𞥅𞤱𞤵 𞤲𞤺𞤵𞤲 𞤰𞤫𞤼𞥆𞤢𞥄𞤥𞤢 𞤧𞤭 𞤳𞤢𞤲𞤺𞤢𞤤 𞤲𞤺𞤢𞤤 𞤩𞤢𞤣𞤼𞤮𞥅 𞤲𞤮𞤲 𞤲𞤺𞤢𞤤 𞤰𞤫𞤼𞥆𞤢 𞤺𞤫𞤩𞤢𞤤 𞤥𞤢𞤺𞥆𞤢𞤤 𞤲𞤺𞤢𞤤.
𞤈𞤫𞤬𞤼𞤭 𞤲𞤺𞤢𞤤 𞤢𞤪𞤢 𞤲𞤮𞤲⹁ 𞤲𞤺𞤢𞤤 𞤸𞤢𞥄𞤶𞤭𞤼𞤮𞤪𞤢 𞤳𞤮 𞤤𞤵𞤼𞥆𞤭 𞤳𞤮𞤲⹁ 𞤸𞤢𞤪𞤢 𞤸𞤢𞤴 𞤬𞤮𞤱𞤪𞤵 𞤲𞤣𞤵𞤲 𞤸𞤢𞥄𞤶𞤢𞥄𞤳𞤢 𞤫 𞤥𞤵𞤲 𞤳𞤢𞤣𞤭.
𞤳𞤮𞤲𞤮 𞤪𞤫𞤲𞤣𞤮 𞤴𞤮𞤲𞤣𞤭𞤲𞤮𞤪𞤼𞤢𞥄 𞤤𞤵𞤼𞥆𞤢𞤲𞤣𞤫 𞤸𞤫𞤩𞤼𞤢𞥄𞤪𞤫⹁ 𞤲𞤺𞤮 𞤧𞤢𞤦𞥆𞤮𞤪𞤼𞤢𞥄 𞤳𞤢𞤣𞤭 𞤺𞤮𞤯𞥆𞤮 𞤳𞤮 𞤢𞤪𞤢 𞤸𞤫𞤦𞤤𞤢𞤲𞤢 𞤲𞤺𞤮 𞤬𞤫𞤱𞤼𞤭𞤼𞤢𞤲𞤣𞤫 𞤥𞤢𞤺𞥆𞤮.
𞤖𞤫𞤩𞤼𞤢𞥄𞤪𞤫 𞤼𞤭𞤺𞤭𞥅𞤪𞤫 𞤲𞤣𞤫𞤲⹁ 𞤸𞤭𞤲𞤮 𞤤𞤢𞤲𞤣𞤭𞥅 𞤬𞤢𞤱𞤼𞤫𞥅𞤣𞤫⹁ 𞤦𞤢𞤤𞥆𞤮𞤲𞤣𞤭𞤪𞤢𞤤 𞤲𞤺𞤫𞥅𞤼𞤵𞥅𞤶𞤭⹁ 𞤫 𞤱𞤢𞤳𞥆𞤭𞤤𞤢𞥄𞤪𞤫 𞤼𞤭𞤥𞥆𞤵𞤲'𞤣𞤫⹁𞤯𞤵𞤲 𞤸𞤭𞤲𞤮 𞤬𞤭𞤪𞤼𞤭⹁ 𞤲𞤫𞤸𞤼𞤮𞤪𞤺𞤮𞤤 𞤯𞤫𞤲𞤺𞤢𞤤 𞤥𞤵𞤲 𞤲𞤺𞤢𞤤⹁ 𞤸𞤢𞤪𞤢 𞤱𞤮𞤲𞤢𞥄 𞤯𞤫𞤲𞤯𞤫 𞤶𞤻𞤲𞤢𞤲𞤫 𞤯𞤫𞤲 𞤩𞤫 𞤸𞤵𞥅𞤼𞤮𞤪𞤼𞤢 𞤳𞤢 𞤪𞤫𞤲𞤣𞤮 𞤥𞤢𞤩𞥆𞤫⹁ 𞤸𞤢𞤴 𞤧𞤭 𞤩𞤫 𞤶𞤻𞤲𞤺𞤢𞤴 𞤯𞤫 𞤳𞤮 𞤩𞤫𞤴𞤣𞤭𞤼𞤢𞤲𞤢𞤴 𞤱𞤮𞤲𞤢𞥄 𞤬𞤵𞤯𞥆𞤮𞤪𞤺𞤮𞤤.
𞤉𞤼𞤮𞥅 𞤲𞤮 𞤺𞤢𞤲𞤣𞤫 𞤱𞤮𞤲𞤢𞥄𞤯𞤫 𞤪𞤭𞤨𞥆𞤭𞤪𞤢𞤲𞤫𞥅𞤣𞤫 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲⹁ 𞤢𞤪𞤼𞤭𞤪𞤢 𞤳𞤢 𞤯𞤫𞤲𞤺𞤢𞤤 𞤥𞤢𞤳𞥆𞤮⹁ 𞤣𞤫𞤬𞤼𞤫 𞤣𞤭𞥅𞤲𞤢 𞤥𞤢𞤳𞥆𞤮 𞤳𞤢𞤲 𞤳𞤢𞤣𞤭 𞤢𞤪𞤼𞤭𞤪𞤫𞥅 𞤳𞤢 𞤯𞤫𞤲𞤺𞤢𞤤 𞤥𞤢𞤳𞥆𞤮⹁ 𞤮 𞤼𞤢𞤥𞤦𞤭𞤼𞤮𞥅 𞤳𞤢𞤣𞤭 𞤷𞤮𞤧𞤢𞥄𞤲𞤫 𞤥𞤢𞤳𞥆𞤮 𞤯𞤫𞤲⹁ 𞤸𞤭𞤱𞤵𞤺𞤮𞤤 𞤬𞤭𞤲𞤢𞥄𞤼𞤢𞤱𞤢𞥄 𞤥𞤵𞤲 𞤯𞤭𞤲⹁ 𞤸𞤭𞤱𞤢 𞤤𞤫𞤴𞤯𞤫 𞤥𞤵𞤲 𞤯𞤫𞤲⹁ 𞤼𞤫𞤣𞥆𞤭𞤲𞤢 𞤥𞤢𞥄𞤥𞤢𞥄𞤩𞤫 𞤥𞤵𞤲 𞤩𞤫𞤲⹁ 𞤱𞤭𞤲𞤣𞤢 𞤼𞤢𞥄𞤪𞤭𞥅𞤳𞤢 𞤥𞤢𞤩𞤱𞤩𞤫 𞤥𞤵𞤲 𞤬𞤫𞤰𞥆𞤵𞤩𞤫⹁ 𞤫 𞤼𞤢𞥄𞤪𞤭𞥅𞤳𞤢 𞤤𞤢𞤪𞤫 𞤥𞤢𞤩𞥆𞤫⹁ 𞤸𞤢𞤪𞤢 𞤳𞤮 𞤯𞤭𞤲 𞤼𞤢𞥄𞤪𞤭𞥅𞤳𞤢𞥄𞤶𞤭 𞤩𞤭𞤩𞥆𞤫 𞤥𞤢𞤩𞥆𞤫 𞤩𞤫𞤲 𞤣𞤵𞤯𞥆𞤮𞤪𞤼𞤢 𞤶𞤢𞤲𞤺𞤲𞤣𞤫 𞤼𞤢𞥄𞤪𞤭𞥅𞤳𞤢.
𞤸𞤫𞤦𞤤𞤵𞤺𞤮𞤤 𞤩𞤭𞤩𞥆𞤫 𞤥𞤵𞤲 𞤩𞤫𞤲 𞤫 𞤬𞤫𞤱𞤼𞤭𞤼𞤢𞤲𞤣𞤫 𞤲𞤫𞤸𞤣𞤭 𞤫 𞤲𞤣𞤭𞤥𞤢𞥄𞤺𞤵⹁ 𞤸𞤢𞤪𞤢 𞤧𞤭 𞤩𞤫 𞤲𞤶𞤢𞤲𞤯𞤭𞥅 𞤸𞤭𞤲𞤮 𞤱𞤮𞥅𞤣𞤭 𞤳𞤮 𞤩𞤫 𞤥𞤢𞤲𞤼𞤮𞤪𞤢 𞤸𞤢𞤪𞤢 𞤱𞤮𞤲𞤢𞥄 𞤳𞤮 𞤥𞤢𞥄𞤥𞤢𞥄𞤩𞤫 𞤱𞤮𞤩𞥆𞤫 𞤺𞤮𞥅 𞤴𞤢𞤲𞤺𞤢𞤲𞤭𞥅⹁ 𞤧𞤢𞤦𞤵 𞤥𞤮 𞤲𞤫𞤸𞤢𞤲𞤭𞥅𞤥𞤢 𞤶𞤢𞤩𞤼𞤭𞥅𞤥𞤢.
𞤃𞤮 𞤶𞤢𞤲𞥆𞤢𞥄𞤥𞤢 𞤼𞤢𞥄𞤪𞤭𞥅𞤳𞤢 𞤥𞤢𞤱𞤯𞤮 𞤺𞤮𞤯𞥆𞤮⹁ 𞤮 𞤶𞤢𞤲𞥆𞤢𞥄𞤳𞤢 𞤼𞤢𞥄𞤪𞤭𞥅𞤳𞤢 𞤥𞤢𞤱𞤯𞤮 𞤥𞤢𞤳𞥆𞤮 𞤮𞤲⹁ 𞤳𞤮 𞤼𞤢𞥄𞤪𞤭𞥅𞤳𞤢 𞤩𞤫 𞤮 𞤶𞤢𞤲𞥆𞤢𞥄𞤩𞤫 𞤮 𞤱𞤢𞤷𞥆𞤢𞤼𞤢⹁ 𞤳𞤮 𞤳𞤢𞤥𞤩𞤫 𞤳𞤢𞤣𞤭 𞤮 𞤫𞤩𞥆𞤢𞤼𞤢 𞤲𞤢𞤲𞤣𞤭𞤲𞤼𞤭𞤲𞤢𞥄𞤣𞤫.
𞤏𞤮𞤲𞤵𞤺𞤮𞤤 𞤸𞤫𞤼𞥆𞤭𞥅𞤯𞤮 𞤳𞤮 𞤶𞤮𞤺𞤢𞤺𞤮𞤤 𞤷𞤵𞥅𞤷𞤢𞤤⹁ 𞤫 𞤱𞤮𞤲𞤢 𞤲𞤫𞤯𞥆𞤮 𞤣𞤢𞤪𞤼𞤢𞤲𞤭𞥅𞤯𞤮 𞤸𞤮𞥅𞤪𞤫 𞤥𞤵𞤲⹁ 𞤼𞤮𞥅𞤱𞤵𞤯𞤮 𞤸𞤭𞤥𞥆𞤫 𞤥𞤮 𞤧𞤢𞤦𞥆𞤮𞤪𞤢𞥄 𞤺𞤮𞤯𞥆𞤮 𞤺𞤮𞥅 𞤦𞤢𞤤𞥆𞤢𞤤⹁
𞤑𞤮 𞤢𞤪𞤢 𞤭𞤼𞥆𞤢𞤲𞤢 𞤫𞤲 𞤶𞤮𞤤𞤮𞤳𞤮𞥅𞤳𞤫 𞤯𞤫 𞤶𞤮𞤤𞤳𞤢𞤲𞤮 𞤯𞤫𞤲⹁ 𞤸𞤢𞤴 𞤫𞤲𞤫𞤲 𞤫 𞤴𞤫𞤶𞥆𞤭𞤼𞤭𞥅 𞤸𞤭𞤯𞤫 𞤽𞤢𞤲𞥆𞤭 𞤫𞤲.
𞤖𞤭𞤯𞤫𞤲 𞤸𞤢𞥄𞤲𞤭 𞤼𞤫𞤪𞤼𞤢𞤺𞤮𞤤 𞤰𞤫𞥅𞤱𞤵𞤺𞤮𞤤 𞤼𞤵𞤲 𞤨𞤫𞤰𞥆𞤭 𞤥𞤫𞤲 𞤫 𞤥𞤢𞤲𞤭𞤼𞤢𞤺𞤮𞤤⹁ 𞤫 𞤭𞤲𞥆𞤵𞤺𞤮𞤤 𞤨𞤵𞤤𞥆𞤮 𞤳𞤮 𞤷𞤵𞥅𞤷𞤮⹁ 𞤨𞤵𞤤𞥆𞤮 𞤶𞤢𞤩𞤢𞤼𞤢𞥄 𞤴𞤢𞤱𞤪𞤫⹁ 𞤫𞤲𞤫𞤲 𞤼𞤭𞤺𞤭 𞤱𞤮𞤲𞤫𞤲 𞤣𞤢𞤪𞤼𞤭𞥅𞤩𞤫⹁ 𞤬𞤫𞤤𞥆𞤭𞤼𞤵𞤩𞤫⹁ 𞤺𞤮𞤤𞥆𞤮𞥅𞤩𞤫 𞤳𞤢 𞤩𞤭𞤩𞥆𞤫 𞤥𞤫𞤲 𞤳𞤢𞤣𞤭 𞤲𞤣𞤢𞥄𞤪𞤼𞤮𞤴𞤮𞥅 𞤻𞤫𞤥𞤦𞤭𞤲𞤢⹁ 𞤥𞤢𞤲𞤼𞤮𞤪𞤢⹁ 𞤦𞤵𞤲𞤺𞤭𞤪𞤢⹁ 𞤤𞤫𞥅𞤰𞤮𞤪𞤢 𞤫𞤲 𞤧𞤭 𞤫𞤲𞤫𞤲 𞤳𞤢𞤣𞤭 𞤫𞤲 𞤬𞤫𞤰𞥆𞤭𞥅.
𞤑𞤢𞤤𞤢 𞤤𞤫𞤻𞤮𞤤 𞤸𞤫𞤩𞤼𞤵𞤲'𞤺𞤮𞤤 𞤸𞤮𞥅𞤪𞤫 𞤥𞤵𞤲⹁ 𞤳𞤮 𞤸𞤫𞤩𞤭 𞤲𞤣𞤫 𞤳𞤮 𞤫 𞤸𞤮𞥅𞤪𞤫 𞤥𞤵𞥅𞤧𞤫𞥅𞤲𞤣𞤭⹁ 𞤫 𞤸𞤮𞥅𞤪𞤫 𞤨𞤮𞤼𞥆𞤢𞤤 𞤳𞤢𞤻𞤵𞤲 𞤫 𞤱𞤢𞤤𞥆𞤮𞤲𞤣𞤭𞤪𞤢𞤤. 𞤬𞤫𞤱𞤼𞤵𞤩𞤫 𞤲𞤮𞤳𞥆𞤵𞤲 𞤺𞤮𞥅𞤼𞤵𞤲⹁𞤥𞤢𞤱𞤩𞤫 𞤥𞤫𞤲 𞤳𞤮 𞤲𞤮𞤲 𞤬𞤮𞥅𞤤𞤭𞤪𞤲𞤮𞥅 𞤳𞤢 𞤢𞤪𞤢𞤲𞤵𞤲 𞤢𞤼𞥆𞤮 𞤨𞤮𞤪𞤼𞤮 𞤣𞤮𞥅𞤤𞤵𞤣𞤫 𞤩𞤫⹁ 𞤥𞤢𞤲𞤼𞤮𞤪𞤫𞤲 𞤯𞤵𞤲⹁ 𞤳𞤮𞤲𞤮 𞤱𞤮𞤼𞤢 𞤫𞤲 𞤶𞤮𞥅𞤯𞤮 𞤼𞤵𞤲 𞤫 𞤶𞤢𞤲𞤼𞤢𞤺𞤮𞤤 𞤨𞤫𞤰𞥆𞤭 𞤴𞤢𞤱𞤼𞤵𞤩𞤫 𞤥𞤫𞤲 𞤼𞤵𞤲 𞤸𞤢𞤪𞤢 𞤫𞤲 𞤣𞤢𞤪𞤢𞤲𞤢𞥄𞤳𞤭 𞤸𞤢𞤴 𞤫 𞤸𞤵𞥅𞤲𞤣𞤫.
𞤉𞤲𞤫𞤲 𞤳𞤢𞤣𞤭 𞤸𞤭𞤯𞤫𞤲 𞤸𞤢𞥄𞤲𞤭 𞤪𞤫𞤱𞤼𞤵𞤣𞤫 𞤫 𞤦𞤢𞤯𞤼𞤫𞥅𞤶𞤭 𞤥𞤢𞤩𞥆𞤫⹁𞤻𞤫𞤥𞤦𞤫𞤲𞤩𞤫 𞤱𞤢𞤲𞤮 𞤨𞤵𞤤𞤢𞤪 𞤱𞤭𞤴𞤭𞤪𞤼𞤢 𞤲𞤮𞤲⹁ 𞤲𞤣𞤭𞤴𞤢𞤲 𞤪𞤫𞤱𞤼𞤢𞤴 𞤫 𞤭𞤤𞤮𞤤.
𞤓𞤣𞥆𞤭𞤼𞤫𞤲 𞤣𞤢𞤥𞤫 𞤺𞤮𞥅⹁ 𞤯𞤫 𞤳𞤢𞤥𞤩𞤫 𞤯𞤫 𞤩𞤫 𞤴𞤫𞤶𞥆𞤭𞤼𞤵𞤲𞤮𞥅 𞤥𞤢𞤤𞥆𞤢 𞤩𞤫 𞤪𞤮𞤲𞤳𞤭 𞤸𞤫𞤩𞤢𞤲𞤣𞤫 𞤯𞤫 𞤬𞤫𞤸𞤪𞤫⹁ 𞤧𞤢𞤦𞤵 𞤲𞤮 𞤢𞤣𞤵𞤲𞤢 𞤮𞤲 𞤴𞤢𞤸𞤪𞤢𞤼𞤢 𞤲𞤮𞤲 𞤳𞤮 𞤲𞤮𞤲 𞤨𞤭𞥅𞤶𞤭 𞤳𞤫𞤧𞤭 𞤱𞤮𞤲𞤭 𞤴𞤢𞤤𞤼𞤭𞤪𞤣𞤫⹁ 𞤫 𞤲𞤫𞤱𞤫𞥅𞤲𞤣𞤫𞥅𞤶𞤭.
𞤏𞤢𞤲𞤮 𞤲𞤫𞤱𞤭𞤲𞤺𞤮𞤤 𞤲𞤮 𞤦𞤭𞤲𞤣𞤭 𞤥𞤫𞤲 𞤯𞤭𞤲⹁ 𞤬𞤮𞤤𞥆𞤭𞤼𞤭𞤪𞤫𞥅 𞤫 𞤳𞤢𞤤𞤢 𞤢𞥄𞤤𞤢 𞤴𞤢𞤤𞤼𞤵𞤯𞤮⹁ 𞤼𞤫𞤲𞤼𞤭𞤲𞤭𞥅 𞤲𞤮𞤲 𞤲𞤺𞤫𞥅𞤼𞤵 𞤫𞤧𞤼𞤵𞤲'𞤺𞤵 𞤲𞤺𞤵𞤲.
𞤥𞤮 𞤳𞤢𞤤𞤢 𞤫 𞤥𞤫𞤲 𞤸𞤭𞤲𞤮 𞤸𞤢𞥄𞤲𞤭 𞤤𞤢𞤲𞤣𞤭𞤼𞤢𞥄𞤣𞤫 𞤸𞤮𞥅𞤪𞤫 𞤥𞤵𞤲
⹁ 𞥟𞤸𞤢𞤪𞤢 𞤳𞤮 𞤥𞤭 𞤶𞤭𞤺𞤢𞤱𞤢𞤤 𞤧𞤢𞤦𞥆𞤭𞥅 𞤲𞤺𞤢𞤤 𞤱𞤢𞤪𞤢𞤲𞤫𞥅𞤣𞤫 𞤲𞤦𞤢𞤪𞤮𞥅𞤣𞤭 𞤧𞤭 𞤥𞤭 𞤸𞤭𞥅𞤪𞤼𞤮𞥅 𞤥𞤢𞤤𞥆𞤢 𞤥𞤭 𞤧𞤮𞤷𞥆𞤢؟
𞤉 𞤺𞤢𞤲𞤣𞤢𞤤 𞤫 𞤶𞤢𞤱𞤣𞤭 𞤴𞤫𞤪𞤵 𞤳𞤮 𞤀𞤂𞤂𞤀𞤖𞤓 𞤮𞤳𞥆𞤵 𞤥𞤢𞥄 𞤳𞤮𞤲⹁ 𞤳𞤮 𞤸𞤮𞤲𞤯𞤵𞤲 𞤱𞤮𞤲𞤵𞤯𞤢𞥄 𞤼𞤢𞤥𞤦𞤭𞤼𞤮𞤪𞤣𞤫 𞤨𞤵𞤤𞤢𞥄𞤳𞤵 𞤲𞤺𞤵𞤲 𞤸𞤢𞤪𞤢 𞤱𞤮𞤲𞤢𞥄 𞤸𞤢𞥄𞤤𞤢 𞤩𞤮𞤤𞤢 𞤼𞤵𞤲.
𞤥𞤮 𞤳𞤢𞤤𞤢 𞤴𞤮 𞤶𞤢𞥄𞤦𞤢𞤲𞤮 𞤸𞤮𞥅𞤪𞤫 𞤥𞤵𞤲.
✍️𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋.
