𞤇𞤢𞤣𞤼𞤭𞤳𞤫 𞤲𞤭𞥅 𞤤𞤫𞤱𞤪𞤵 𞤵𞤴𞤳𞤭 𞤸𞤭𞤲𞤮 𞤧𞤢𞤯𞤭 𞤫 𞤲𞤣𞤫𞤪 𞤳𞤮𞤲𞤢𞥄𞤳𞤭𞤪𞤭⹁ 𞤥𞤢𞤤𞥆𞤢 𞤱𞤭𞤴𞤫𞤲 𞤫 𞤲𞤣𞤫𞤪 𞤺𞤭𞤲𞤫⹁
𞥟𞤳𞤮 𞤸𞤮𞤲𞤯𞤵𞤲 𞤱𞤮𞤲𞤭 𞤧𞤮𞤥𞤦𞤮 𞤥𞤵𞤲؟
𞤉 𞤱𞤮𞤴𞤭 𞤤𞤢𞤥𞤢𞤪𞤢𞥄𞤲𞤢 𞤶𞤢𞤤𞥆𞤮: 𞤴𞤫𞥅𞤴𞤮𞥅𞤱𞤮 𞤵𞤴𞤳𞤭⹁ 𞤺𞤮𞤤𞥆𞤭𞤣𞤫𞤼𞤫𞥅𞤯𞤮 𞤫 𞤺𞤭𞤲𞤫 𞤺𞤢𞥄𞤧𞤭 𞤸𞤮𞤤𞥆𞤭:
𞤳𞤮 𞤺𞤭𞤦𞤭 𞤤𞤢𞥄𞤥𞤵 𞤲𞤺𞤵𞤲⹁ 𞤮𞤥𞤦𞤭 𞤘𞤭𞤲𞤫 𞤺𞤢𞥄𞤧𞤭 𞤷𞤢𞤯𞤵𞤲𞤢𞤤 𞤵𞤴𞤳𞤭 𞤳𞤭𞤲 𞤬𞤵𞤯𞥆𞤭𞥅 𞤫 𞤲𞤣𞤫𞤪 𞤳𞤮𞤲𞤢𞥄𞤳𞤭𞤪𞤭⹁ 𞤧𞤢𞤦𞤵 𞤳𞤮 𞤩𞤫𞤲 𞤩𞤵𞤪𞤢𞤼𞤢 𞤢𞤣𞥆𞤵𞤣𞤫 𞤵𞤴𞤳𞤭 𞤫 𞤲𞤣𞤫𞤪 𞤺𞤭𞤲𞤫.
𞤳𞤮 𞤩𞤫 𞤮𞤥𞤦𞤭𞤪𞤭 𞤩𞤫 𞤳𞤮 𞤧𞤢𞤦𞤵 𞤩𞤫 𞤯𞤮𞤬𞤼𞤢𞥄𞤳𞤭 𞤧𞤢𞤪𞤭𞤴𞤢𞥄𞤶𞤭 𞤯𞤭 𞤩𞤫 𞤷𞤭𞥅𞤬𞤮𞤣𞤢𞤲𞤮𞥅 𞤯𞤭𞤲⹁ 𞤱𞤢𞤲𞤮: 𞤰𞤫𞤱𞤼𞤢𞤺𞤮𞤤 𞤼𞤮𞤨𞥆𞤭𞤼𞤮𞥅 𞤳𞤢 𞤵𞤴𞤳𞤭 𞤳𞤭𞤲 𞤥𞤢𞤪𞤮𞤼𞤮𞥅𞤯𞤮𞤲⹁ 𞤤𞤢𞤩𞥆𞤭𞤲𞤺𞤮𞤤 𞤲𞤮𞤳𞥆𞤵𞥅𞤪𞤫 𞤲𞤣𞤫𞤲⹁ 𞤫 𞤤𞤮𞥅𞤱𞤵𞤺𞤮𞤤 𞤱𞤢𞤯𞤭𞤪𞤯𞤭 bouteille 𞤯𞤭 𞤩𞤫 𞤴𞤢𞥄𞤲𞤢𞤲𞤢𞥄𞤳𞤢 𞤤𞤮𞥅𞤱𞤵𞤺𞤮𞤤. 𞤇𞤢𞤴 𞤲𞤮𞤲 𞤤𞤢𞥄𞤥𞤵 𞤲𞤺𞤵𞤲 𞤰𞤫𞤱𞤼𞤭𞤳𞤫 𞤩𞤫 𞤼𞤢𞥄𞤱𞤭𞥅 𞤩𞤫 𞤼𞤫𞤣𞥆𞤭𞤲𞤢𞥄𞤤𞤭 𞤧𞤢𞤪𞤭𞤴𞤢𞥄𞤶𞤭 𞤯𞤭𞤲⹁ 𞤩𞤫 𞤮𞤥𞤦𞤭 𞤦𞤢𞥄𞤬𞤫 𞤥𞤢𞤩𞥆𞤫 𞤯𞤫𞤲⹁ 𞤸𞤢𞥄 𞤩𞤫 𞤼𞤫𞤣𞥆𞤭𞤲𞤢 𞤧𞤢𞤪𞤭𞤼𞤢 𞤮𞤲.
𞤺𞤭𞤦𞤭 𞤲𞤮𞤲 𞤩𞤫𞤲𞤯𞤮𞤲 𞤮𞤥𞤦𞤢𞥄. 𞤷𞤢𞤯𞤵𞤲𞤢𞤤 𞤲𞤺𞤢𞤤 𞤬𞤵𞤯𞥆𞤭𞥅 𞤫 𞤲𞤣𞤫𞤪 𞤧𞤢𞤸𞤪𞤫 𞤲𞤣𞤫𞤲⹁ 𞤧𞤢𞤦𞤵 𞤳𞤮 𞤳𞤢𞤥𞤩𞤫 𞤩𞤵𞤪𞤭 𞤥𞤢𞤪𞤵𞤣𞤫 𞤳𞤭𞤤𞤭𞤴𞤢𞤲𞤩𞤫 𞤳𞤢 𞤧𞤢𞤸𞤪𞤫⹁ 𞤳𞤮 𞤦𞤵𞤼𞤫𞥅𞤴𞤶𞤫 𞤥𞤢𞤩𞥆𞤫 𞤯𞤫𞤲 𞤩𞤵𞤪𞤫𞤼𞤫𞥅 𞤺𞤮𞤤𞥆𞤭𞤪𞤫𞥅𞤣𞤫 𞥖𞥐% 𞤳𞤮 𞤦𞤵𞤼𞤫𞥅𞤴𞤶𞤫 𞤥𞤢𞤩𞥆𞤫 𞤶𞤮𞤺𞤭𞥅⹁ 𞤶𞤮𞥅𞤲𞤭 𞤲𞤮𞤲 𞤴𞤫𞤪𞤵 𞤥𞤢𞤪𞤵𞤩𞤫 𞤺𞤢𞤧𞤭 𞤩𞤫𞤲 𞤱𞤢𞤲𞤮: 𞤒𞤀𞥄 𞤘𞤀𞥄𞤅𞤋⹁ 𞤉𞤐 𞤆𞤋𞥅 𞤘𞤀𞥄𞤅𞤋⹁ 𞤑𞤀𞤃𞤀𞥄 𞤘𞤀𞥄𞤅𞤋⹁ 𞤉𞤑𞤐𞤍... 𞤶𞤢𞤩𞤢𞤼𞤢𞥄 𞤴𞤫𞥅𞤴𞤵𞤣𞤫 𞤧𞤭 𞤱𞤮𞤲𞤢𞥄 𞤶𞤮𞤺𞤭𞥅𞤩𞤫 𞤦𞤵𞤼𞤫𞥅𞤴𞤶𞤫 𞤥𞤢𞤩𞥆𞤫 𞤯𞤫𞤲. 𞤳𞤮 𞤯𞤵𞤲 𞤧𞤢𞤯𞤼𞤭𞤲𞤭 𞤥𞤵𞤪𞤢𞥄𞤣𞤵 𞤲𞤣𞤵𞤲 𞤶𞤮𞥅𞤲𞤭.
𞤳𞤮 𞤺𞤭𞤲𞤫 𞤺𞤢𞥄𞤧𞤭 𞤩𞤵𞤪𞤭 𞤱𞤫𞥅𞤩𞤭𞤲𞤣𞤫 𞤬𞤭𞥅 𞤵𞤴𞤳𞤭 𞤳𞤭𞤲 𞤺𞤭𞤲𞤫 𞤯𞤮𞥅⹁ 𞤧𞤢𞤦𞤵 𞤳𞤢𞤥𞤩𞤫 𞤩𞤫 𞤤𞤮𞥅𞤱𞤢𞤴 𞤳𞤢𞤤𞤢 𞤦𞤵𞤼𞤫𞥅𞤴𞤪𞤭 𞤲𞤣𞤭 𞤩𞤫 𞤲𞤢𞤩𞤢𞤲𞤢𞥄⹁ 𞤱𞤢𞤲𞤮 𞤥𞤭𞤲 𞤳𞤮 𞤴𞤫𞥅𞤴𞤵𞤺𞤮𞤤 𞤵𞤴𞤳𞤭 𞤱𞤮𞤲𞤭 𞤺𞤮𞤤𞥆𞤫 𞤢𞤥⹁ 𞤥𞤭𞤯𞤮 𞤥𞤢𞤪𞤭 𞤱𞤫𞤪𞤤𞤢𞥄𞤶𞤫 𞤼𞤢𞤼𞤭⹁ 𞤫 𞤺𞤮𞤤𞥆𞤮𞥅𞤩𞤫 𞥖⹁ 𞤳𞤮𞤲𞤮 𞤲𞤫𞥅𞤩𞤢𞤪𞤢𞥄 𞤩𞤵𞤪𞤢 𞤤𞤫𞤱𞤪𞤵 𞤸𞤢𞤪𞤢 𞤥𞤫𞤲 𞤢𞤤𞤢𞥄 𞤺𞤮𞤤𞥆𞤵𞤣𞤫 𞤲𞤮 𞤸𞤢𞥄𞤲𞤭𞤪𞤭⹁𞤥𞤭 𞤴𞤫𞥅𞤴𞤫𞤴 𞤫 𞤯𞤵𞥅𞤯𞤢𞤤 𞤳𞤢𞤻𞤵𞤲 𞤫 𞤬𞤢𞤥𞤯𞤢𞤤⹁
En gros et détaille
𞤸𞤢𞤪𞤭 𞤲𞤮 𞤥𞤫𞤲 𞤱𞤮𞤲 𞤺𞤮𞤤𞥆𞤭𞤪𞤣𞤫 𞤲𞤮𞤲⹁ 𞤥𞤮 𞤢𞤣𞥆𞤭𞥅 𞤦𞤵𞤼𞤫𞥅𞤴𞤪𞤭 𞤵𞤴𞤳𞤭 𞤳𞤢 𞤢𞤥𞤫𞤲 𞤯𞤮𞥅 𞤥𞤫𞤲 𞤼𞤫𞤬𞤢𞤼𞤢𞥄 𞤳𞤮 𞤸𞤮𞤲𞤯𞤵𞤲 𞤫 𞤲𞤮𞥅𞤲𞤫 𞤮 𞤢𞤣𞥆𞤭⹁ 𞤥𞤫𞤲 𞤴𞤫𞤴𞤢𞤴𞤲𞤮 𞤼𞤵𞤲⹁ 𞤮 𞤴𞤢𞤸𞤢 𞤸𞤢𞤴 𞤧𞤭 𞤱𞤮𞤲𞤭𞥅 𞤦𞤵𞤼𞤫𞥅𞤴𞤪𞤭 𞤲𞤣𞤭 𞤮 𞤢𞤣𞥆𞤭 𞤲𞤣𞤭𞤲 𞤲𞤢𞤲𞤣𞤢𞥄 𞤫 𞤳𞤮 𞤥𞤫𞤲 𞤶𞤮𞤺𞤭𞥅 𞤳𞤮𞤲 𞤬𞤫𞤱𞤲𞤣𞤮 𞤯𞤮𞤲⹁ 𞤯𞤵𞤲 𞤸𞤢𞤯𞤢𞤼𞤢𞥄 𞤥𞤫𞤲 𞤴𞤫𞥅𞤴𞤢𞤥𞤮. 𞤳𞤮 𞤯𞤵𞤲 𞤨𞤮𞤪𞤼𞤮𞥅𞤩𞤫 𞤩𞤫𞤲 𞤲𞤮𞤣𞥆𞤭𞤪𞤼𞤢 passe partout .
𞤳𞤮 𞤱𞤫𞥅𞤩𞤭𞤲𞤢𞤲𞥆𞤮𞥅 𞤥𞤫𞤲 𞤲𞤮𞤲 𞤺𞤮𞤤𞥆𞤭𞤪𞤺𞤮𞤤 𞤲𞤮𞤲 𞤲𞤺𞤮𞤤 𞤳𞤮 𞤘𞤭𞤲𞤫 𞤺𞤢𞥄𞤧𞤭⹁ 𞤧𞤢𞤦𞤵 𞤩𞤫𞤲𞤯𞤮𞤲 𞤳𞤢𞤣𞤭 𞤳𞤮 𞤥𞤫𞤲 𞤲𞤢𞤩𞤢𞤲𞤭𞤩𞤫 𞤱𞤮𞥅 𞤩𞤫 𞤩𞤫 𞤤𞤮𞥅𞤱𞤢𞤴 𞤼𞤵𞤲 𞤩𞤫 𞤼𞤫𞤬𞤢𞤼𞤢𞥄 𞤳𞤮 𞤸𞤫𞤣𞥆𞤭𞥅 𞤳𞤮𞤲⹁⹁ 𞤧𞤢𞤦𞤵 𞤸𞤢𞤪𞤭 𞤳𞤢𞤥𞤩𞤫 𞤯𞤮𞤲 𞤳𞤮 𞤳𞤢𞤻𞤵𞤲 𞤢𞤣𞤢𞤲𞤼𞤢 𞤸𞤮𞥅𞤪𞤫 𞤥𞤵𞤲 𞤵𞤴𞤳𞤭 𞤳𞤭 𞤴𞤫𞥅𞤴𞤢𞤼𞤢 𞤳𞤭𞤲.
𞤶𞤮𞥅𞤲𞤭 𞤲𞤮𞤲 𞤧𞤵𞥅𞤧𞤫𞥅𞤼𞤭𞥅𞤶𞤭 𞤸𞤫𞤣𞥆𞤭𞥅𞤯𞤭 𞤯𞤭𞤲 𞤸𞤭𞤲𞤮 𞤺𞤮𞤤𞥆𞤵𞤣𞤫⹁ 𞤳𞤮𞤲𞤮 𞤳𞤮 𞤫 𞤶𞤵𞥅𞤯𞤫 𞤤𞤢𞥄𞤥𞤵 𞤲𞤺𞤵𞤲 𞤩𞤫 𞤧𞤮𞥅𞤣𞤭𞤼𞤢𞤼𞤢 𞤳𞤮 𞤩𞤫 𞤴𞤫𞥅𞤴𞤭𞤼𞤢𞤼𞤢 𞤳𞤮𞤲⹁𞤩𞤫 𞤥𞤢𞤪𞤢𞥄 𞤬𞤫𞤸𞤪𞤫 𞤢𞤣𞥆𞤢𞤲𞤺𞤮𞤤 𞤸𞤮𞥅𞤪𞤫 𞤥𞤢𞤩𞥆𞤫⹁ 𞤳𞤮 𞤯𞤵𞤲 𞤱𞤢𞤯𞤭 𞤩𞤫 𞤶𞤢𞤩𞤢𞥄𞤼𞤢 𞤮𞤲 𞤲𞤮𞥅𞤲𞤫 𞤥𞤮 𞤥𞤫𞤲 𞤱𞤮𞥅𞤱𞤭𞤲𞤮𞤪𞤭 𞤲𞤮𞤲 𞤫 𞤺𞤭𞤲𞤫 𞤺𞤢𞥄𞤧𞤭⹁ 𞤳𞤢𞤥𞤩𞤫 𞤧𞤭 𞤩𞤫 𞤴𞤫𞥅𞤴𞤫𞤼𞤫 𞤵𞤴𞤳𞤭 𞤳𞤮 𞤦𞤫𞥅 𞤼𞤵𞤲 𞤸𞤢𞤪𞤢 𞤸𞤭𞤯𞤢 𞤥𞤢𞤪𞤭 𞤦𞤵𞤼𞤫𞥅𞤴𞤶𞤫 𞤥𞤢𞤩𞥆𞤫 𞤯𞤫𞤲⹁ 𞤧𞤭 𞤱𞤮𞤲𞤢𞥄 𞤯𞤵𞤲 𞤩𞤫 𞤴𞤫𞥅𞤴𞤢𞤼𞤢𞥄𞤥𞤢⹁
𞤲𞤣𞤫 𞤼𞤢𞤱𞤲𞤮𞥅 𞤲𞤮𞤲 𞤳𞤮 𞤩𞤵𞤪𞤭 𞤫 𞤯𞤵𞥅𞤯𞤵𞤣𞤫 𞤫 𞤱𞤮𞤲𞤵𞤩𞤫 𞤩𞤫𞤲 𞤺𞤮𞤤𞥆𞤭𞤪𞤣𞤫 𞤵𞤴𞤳𞤭⹁ 𞤳𞤮 𞤦𞤵𞤼𞤫𞥅𞤴𞤶𞤫 𞤺𞤭𞤲𞤫 𞤺𞤢𞥄𞤧𞤭 𞤯𞤫𞤲 𞤶𞤮𞤺𞤭𞥅⹁ 𞤥𞤢𞤤𞥆𞤢 𞤸𞤢𞤪𞤢 𞤳𞤮 𞤯𞤫 𞤥𞤢𞤪𞤢𞥄 𞤸𞤢𞤴 𞤶𞤮𞥅𞤥(𞤱𞤭𞤲𞤣𞤢𞥄𞤳𞤭 𞤶𞤫𞤴𞤯𞤮)⹁ 𞤩𞤫𞤲 𞤯𞤮𞤲 𞤬𞤮𞤱 𞤱𞤢𞥄𞤱𞤢𞤼𞤢𞥄 𞤲𞤭𞥅𞤲𞤭𞥅 𞤸𞤫𞤩𞤵𞤣𞤫 𞤵𞤴𞤳𞤭 𞤳𞤭𞤲⹁ 𞤳𞤮 𞤯𞤵𞤲 𞤱𞤢𞤯𞤭 𞤧𞤭 𞤤𞤢𞥄𞤥𞤵 𞤲𞤺𞤵𞤲 𞤸𞤮𞤤𞥆𞤭𞥅 𞤱𞤮𞤲𞤣𞤫 𞤷𞤢𞤯𞤵𞤲𞤢𞤤 𞤵𞤴𞤳𞤭 𞤢𞤤𞤢𞥄⹁ 𞤸𞤭𞤲𞤮 𞤱𞤮𞥅𞤣𞤭 𞤧𞤢𞤲𞥆𞤫⹁ 𞤳𞤮𞤲𞤮 𞤩𞤢𞤴 𞤵𞤴𞤳𞤭 𞤳𞤭𞤲 𞤳𞤮 𞤫 𞤲𞤣𞤫𞤪 𞤦𞤭𞥅𞤲𞤭𞥅𞤪𞤭 𞤤𞤮𞥅𞤱𞤫𞤼𞤫𞥅⹁ 𞤧𞤭 𞤢 𞤥𞤢𞤪𞤢𞥄 𞤦𞤭𞥅𞤲𞤭𞥅𞤶𞤫 𞤧𞤭𞤬𞤢 𞤶𞤮𞤺𞤭𞥅𞤩𞤫 𞤩𞤫𞤲 𞤲𞤭𞥅𞤲𞤭𞥅 𞤢 𞤱𞤢𞥄𞤱𞤢𞤼𞤢𞥄 𞤸𞤫𞤩𞤵𞤣𞤫⹁ 𞤱𞤢𞤲𞤮 𞤯𞤭𞥅 𞤧𞤵𞥅𞤧𞤫𞥅𞤼𞤭𞥅𞤶𞤭 𞤯𞤭 𞤶𞤢𞤲𞤼𞤭𞤯𞤫𞤲 𞤣𞤮𞤱𞤺𞤢𞥄.
𞤯𞤭𞤯𞤥𞤵𞤲 𞤯𞤵𞤲 𞤧𞤵𞥅𞤧𞤫𞥅𞤼𞤭 𞤩𞤵𞤪𞤮𞥅𞤱𞤮 𞤮𞤲 𞤢𞤣𞥆𞤵𞤣𞤫 𞤵𞤴𞤳𞤭 𞤮𞤥𞤦𞤢𞥄𞤥𞤢⹁ 𞤶𞤮𞥅𞤲𞤭 𞤳𞤮 𞤧𞤢𞤤𞤲𞤣𞤵 𞤸𞤵𞤥𞤭𞥅𞤲𞤣𞤵 𞤲𞤣𞤵𞤲 𞤫 𞤤𞤢𞥄𞤥𞤵 𞤲𞤺𞤵𞤲 𞤼𞤵𞤲 𞤱𞤮𞤲𞤭 𞤢𞤣𞥆𞤵𞤣𞤫(FAP GAZ) 𞤩𞤫𞤲𞤯𞤮𞤲 𞤲𞤮𞤲 𞤳𞤮 𞤢𞤣𞥆𞤢𞤼𞤢 𞤳𞤮𞤲 𞤯𞤵𞥅𞤯𞤢𞥄 𞤸𞤢𞤴 𞤧𞤫𞥅𞤯𞤢⹁ 𞤧𞤢𞤦𞤵 𞤲𞤭𞥅𞤲𞤭 𞤳𞤮 𞤼𞤮𞥅𞤲𞤵 𞥖𞥐𞥐 𞤩𞤫 𞤢𞤣𞥆𞤭⹁ 𞤶𞤮𞥅𞤲𞤭 𞤲𞤮𞤲 𞤸𞤢𞤪𞤭 𞤺𞤭𞤲𞤫 𞤺𞤢𞥄𞤧𞤭 𞤳𞤢𞤻𞤵𞤲 𞤸𞤭𞤲𞤮 𞤱𞤮𞥅𞤱𞤭 𞤢𞤣𞥆𞤵𞤣𞤫⹁ 𞤼𞤮𞥅𞤲𞤵 𞥑𞥕𞥐𞥐⹁ 𞤥𞤢𞤤𞥆𞤢 𞤼𞤮𞥅𞤲𞤵 𞥒𞥐𞥐𞥐 𞤧𞤮𞥅𞤲𞤣𞤮 𞤳𞤢𞤤𞤢.
𞤩𞤢𞤴 𞤲𞤮𞤲 𞤤𞤢𞥄𞤥𞤵 𞤲𞤺𞤵𞤲 𞤢𞤤𞤢𞥄 𞤳𞤢 𞤥𞤢𞤪𞤢 𞤲𞤭𞥅𞤲𞤭𞥅 𞤵𞤴𞤳𞤭 𞤥𞤵𞤲 𞤳𞤭𞤲⹁ 𞤥𞤢𞤲𞤳𞤭𞤪𞤣𞤫 𞤳𞤵𞤩𞥆𞤢𞤲𞤯𞤢𞤲 𞤯𞤢𞤲 𞤳𞤢 𞤧𞤵𞤥𞤵𞤲𞤮𞥅 𞤳𞤢𞤤𞤵𞥅𞤥⹁ 𞤩𞤫 𞤺𞤢𞤧𞤢𞥄𞤤𞤭 𞤥𞤮𞤰𞥆𞤭𞤲𞤺𞤮𞤤 𞤥𞤢𞤲𞤳𞤭𞤪𞤣𞤫 𞤵𞤴𞤳𞤭 𞤳𞤭𞤲 𞤼𞤢𞤱𞤮⹁ 𞤳𞤮 𞤯𞤵𞤲 𞤱𞤢𞤯𞤭 𞤩𞤫 𞤱𞤢𞥄𞤱𞤢𞤼𞤢𞥄 𞤢𞤣𞥆𞤵𞤣𞤫 𞤳𞤮 𞤯𞤵𞥅𞤯𞤭⹁ 𞤲𞤭𞥅𞤲𞤭𞥅⹁ 𞤴𞤫𞤪𞤵 𞤳𞤮 𞤩𞤫 𞤢𞤣𞥆𞤭 𞤱𞤮𞥅⹁ 𞤩𞤫 𞤲𞤢𞤩𞤢𞤲𞤢𞤴 𞤱𞤮𞤲𞤭 𞤧𞤵𞥅𞤧𞤫𞥅𞤼𞤭𞥅𞤶𞤭 𞤯𞤭𞤲 𞤳𞤢 𞤥𞤢𞤩𞥆𞤫 𞤳𞤭𞤧𞤢𞤲 𞤸𞤢𞤪𞤢 𞤩𞤫 𞤸𞤫𞤣𞥆𞤮𞤪𞤢𞥄⹁ 𞤸𞤢𞤴 𞤴𞤫𞤪𞤵 𞤳𞤮 𞤩𞤫 𞤥𞤢𞤪𞤭𞤼𞤮𞤪𞤼𞤢 𞤳𞤮𞤲 𞤳𞤮 𞤩𞤫𞤲𞤯𞤮𞤲 𞤩𞤫 𞤸𞤢𞤤𞤬𞤭𞤲𞤼𞤢.
𞤉𞤲 𞤢𞤪𞤼𞤮𞤴𞤢𞤴 𞤩𞤵𞤪𞤼𞤫𞤲 𞤩𞤢𞤲𞤺𞤭𞤲𞤣𞤫 𞤬𞤭𞥅 𞤲𞤺𞤢𞤤 𞤳𞤵𞤥𞤨𞤭𞤼𞤢𞤤 𞤬𞤮𞤼𞤢 𞤲𞤮𞤲⹁ 𞤬𞤭𞥅 𞤱𞤮𞤼𞤢 𞤶𞤵𞥅𞤼𞤵 𞤥𞤮𞤰𞥆𞤢.
✍️ 𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋
